ଶରଦ ପାୱାର ଅଧ୍ୟକ୍ଷ ପଦ ଛାଡିବା ପରେ ମହାରାଷ୍ଟ୍ର ରାଜନୀତି ସରଗରମ। ପଦ ଛାଡିବାକୁ ଗ୍ରହଣ କରିପାରୁ ନାହାଁନ୍ତି ଜୟନ୍ତ ପାଟିଲ, ଅଜିତ୍ ପାୱାର କହିଲେ ଏଭଳି କଥା
କନକ ବ୍ୟୁରୋ : ଏନସିପି ନେତା ଶରଦ ପାୱାର ଦଳର ଅଧ୍ୟକ୍ଷ ପଦ ଛାଡିବା ନେଇ ଘୋଷଣା କରିଛନ୍ତି । ଶରଦ ପାୱାରଙ୍କ ଇସ୍ତଫା ଘୋଷଣା ପରେ ଭାବୁକ ହୋଇପଡିଛନ୍ତି ଜୟନ୍ତ ପାଟିଲ । ସେ କହିଛନ୍ତି, ଶରଦ ପାୱାର ଏଭଳି ଭାବେ ଇସ୍ତଫା ଦେବା କଥା ନୁହେଁ । ପାୱାରଙ୍କ ନିଷ୍ପତ୍ତି ଜୟନ୍ତ ପାଟିଲଙ୍କର ପସନ୍ଦ ନୁହେଁ ବୋଲି ସେ କହିଛନ୍ତି । ପାୱାରଙ୍କ ବିନା ଜନତାଙ୍କ ପାଖକୁ କିଭଳି ଯିବେ ବୋଲି ଜୟନ୍ତ ପାଟିଲ କହିଛନ୍ତି । ଏହାସହ ଦଳୀୟ କାର୍ଯ୍ୟରେ ପାୱାର ଯୋଡି ହୋଇ ରୁହନ୍ତୁ ବୋଲି ଜୟନ୍ତ ପାଟିଲ ଅନୁରୋଧ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଶରଦ ପାୱାରଙ୍କ ଇସ୍ତଫା ପରେ ମହାରାଷ୍ଟ୍ର ବିଧାନସଭାର ବିରୋଧୀଦଳ ନେତା ତଥା ଶରଦ ପାୱାରଙ୍କ ଭଣଜା ଅଜିତ ପାୱାର କହିଛନ୍ତି , ଶରଦ ପାୱାର ଦଳର ଅଧ୍ୟକ୍ଷ ପଦରେ ରହିବାର ଆବଶ୍ୟକତା ରହିଛି । ଏହାସହ ଶରଦ ପାୱାର ଦଳୀୟ କମିଟିର ନିଷ୍ପତ୍ତିକୁ ଗ୍ରହଣ କରିବା ଦରକାର ବୋଲି ସେ କହିଛନ୍ତି । ଏହାକୁ ନେଇ ପ୍ରଥମେ କମିଟି ମଧ୍ୟରେ ଚର୍ଚ୍ଚା ହେବ ଓ କମିଟି ଯାହା ନିଷ୍ପତ୍ତି ନେବ ତାହା ଶରଦ ପାୱାର ଗ୍ରହଣ କରନ୍ତୁ ବୋଲି ଅଜିତ ପାୱାର କହିଛନ୍ତି । ଅନ୍ୟପଟେ ଛଗନ ଭୁଜବଳ କହିଛନ୍ତି କି ଶରଦ ପାୱାର ଏନସିପିର ଅଧ୍ୟକ୍ଷ ପଦରେ ରହିବା ଦରକାର ।
ସୂଚନା ଥାଉକି ୧୯୯୯ ମସିହାରେ ଏନସିପି ଗଠନ ହୋଇଥିଲା । ସେବେଠାରୁ ଆଜି ପର୍ଯ୍ୟନ୍ତ ଅର୍ଥାତ ୨୪ ବର୍ଷ ଧରି ଶରଦ ପାୱାର ଏନସିପିର ଅଧ୍ୟକ୍ଷ ଭାବେ କାର୍ଯ୍ୟ କରୁଥିଲେ । ହେଲେ ଆଜି ଦଳର ଅଧ୍ୟକ୍ଷ ପଦରୁ ଇସ୍ତଫା ନେଇ ଘୋଷଣା କରିବା ପରେ ଶରଦ ପାୱାର କହିଛନ୍ତି କି, ଆଗାମୀ ଦିନରେ ସେ ମହାରାଷ୍ଟ୍ର ସମେତ ଦେଶର ବିଭିନ୍ନ ପ୍ରସଙ୍ଗ ଉପରେ ସେ ଧ୍ୟାନ କେନ୍ଦ୍ରିତ କରିବେ ।