ପୁଟିନଙ୍କ ଘାରିଛି କୋଭିଡ୍ ଭୟ: ଭୂତାଣୁ ଭୟରେ ବ୍ୟବହାର କରୁନାହାଁନ୍ତି ମୋବାଇଲ ଓ ଇଣ୍ଟରନେଟ୍
କନକ ବ୍ୟୁରୋ: ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ୍ଙ୍କୁ ଘାରିଛି କୋଭିଡ ଭୟ । ପୁଟିନ୍ ଭୁତାଣୁ ଭୟରେ ଏତେ ଭୟଭିତ ଯେ, କାଳେ କରୋନା ସଂକ୍ରମଣ ହୋଇଯିବ, ସେହି ଆଶଙ୍କାରେ ନା’ ମୋବାଇଲ ଫୋନ୍ ବ୍ୟବହାର କରୁଛନ୍ତି ନା’ ଇଂଟରନେଟ୍ ବ୍ୟବହାର କରୁଛନ୍ତି । ଅତି ଜରୁରୀ ପଡ଼ିଲେ ସେ, ଯେଉଁ ଜାଗାକୁ ଯାଉଛନ୍ତି, ସ୍ୱତନ୍ତ୍ର ଟ୍ରେନ୍ରେ ଯାଉଛନ୍ତି । କିମ୍ବା ସ୍ୱତନ୍ତ୍ର ବିମାନରେ ଯାଉଛନ୍ତି । ଏହି ଯାତ୍ରାକୁ ସଂପୂର୍ଣ୍ଣ ଭାବରେ ଗୁପ୍ତ ରଖାଯାଉଛି । ଲୋକଙ୍କ ସଂସ୍ପର୍ଶ ଠାରୁ ଦୂରେଇ ରହୁଛନ୍ତି ପୁଟିନ୍ । ରୁଷିଆର ଫେଡେରାଲ ଗାର୍ଡ ସର୍ଭିସର ପୂର୍ବତନ କ୍ୟାପଟେନ୍ ‘ଗ୍ଲେଭ୍ କାରାକୁଲୋଭ୍’ ଏଭଳି ଏକ ଚାଂଚଲ୍ୟକର ତଥ୍ୟ ସାମ୍ନାକୁ ଆଣିଛନ୍ତି । ହତ୍ୟା ଭୟ ଆଶଙ୍କା ଭିତରେ ଥିବା ପୁଟିନ୍ କୋଭିଡ୍ ସଂକ୍ରମଣକୁ ନେଇ ଏବେ ଆହୁରି ସଚେତନ ରହୁଛନ୍ତି । ନିଜ ବାସଭବନ ‘କଙ୍କର୍ସ’ରେ ଅଧିକାଂଶ ସମୟ ବିତାଉଥିବା ବେଳେ କୋଭିଡ୍ ଲକ୍୍ଡାଉନ୍ ଭଳି ଜୀବନ ବିତାଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବର୍ତମାନ ସମୟରେ ପୁଟିନ୍ ହେଉଛନ୍ତି ଏଭଳି ଜଣେ ରାଷ୍ଟ୍ରପତି ଯିଏ ବିଶ୍ୱଠାରୁ କିମ୍ବା ବିଶ୍ୱନେତାଙ୍କଠାରୁ ସବୁଠୁ ଅଧିକ ଦୂରେଇ ରହୁଛନ୍ତି । ବଡ଼ କଥା ହେଉଛି, ଯେଉଁ ଅଧିକାରୀଙ୍କ ସହ ପୁଟିନ୍ କୌଣସି ବୈଠକ କିମ୍ବା ଆଲୋଚନା କରୁଛନ୍ତି । ଏହି ବୈଠକ କିମ୍ବା ଆଲୋଚନା ପୂର୍ବରୁ ସେହି ଅଧିକାରୀମାନଙ୍କୁ ଦୁଇ ସପ୍ତାହର କଡ଼ା କ୍ୱାରେଂଟିନ୍ରେ ରହିବାକୁ ପଡ଼ୁଛି । କିଛି ହାତ ଗଣତି ଅଧିକାରୀଙ୍କୁ ଚୟନ କରାଯାଉଛି, ସେମାନେ ଦୁଇ ସପ୍ତାହ ଯାଏଁ କ୍ୱରେଂଟିନ୍ରେ ରହିବା ପରେ ପୁଟିନ୍ଙ୍କ ସହ ବୈଠକ ସ୍ଥିର ହେଉଛି । ଏମିତି କି ମାତ୍ର ୧୦ରୁ ୨୦ ମିନିଟର ବୈଠକ ପାଇଁ ମଧ୍ୟ ଏହି ଦୁଇ ସପ୍ତାହ ବିଶିଷ୍ଟ କ୍ୱରେଂଟିନ୍ ବାଧ୍ୟତାମୂଳକ କରାଯାଉଛି । ଫୋନ ଓ ଇଂଟରନେଟଠାରୁ ଦୂରେଇ ରହୁଥିବାରୁ ସେ ଅନେକ ସମୟରେ ବିଶ୍ୱର ଅନେକ ଗୁରୁତ୍ୱପୂର୍ଣ୍ଣ ସୂଚନାଠାରୁ ସେ ଦୁରେଇ ରହୁଛନ୍ତି । ତେବେ ଅତିବିଶ୍ୱସ୍ତ ଲୋକଙ୍କ ସୂତରୁ ହିଁ ଖବର ସମ୍ପର୍କରେ ଅବଗତ ହେଉଛନ୍ତି ପୁଟିନ୍ । ଦୂରସ୍ଥାନକୁ ଯାତ୍ରା କରିବା ପାଇଁ ବ୍ୟକ୍ତିଗତ ଟ୍ରେନର ବ୍ୟବହାର କରୁଛନ୍ତି । ଯାହା ସର୍ବସାଧାରଣ ଲୋକଙ୍କଠାରୁ ଦୂରରେ ରହୁଛି ଏହି ଟ୍ରେନ୍ ଯାତ୍ରା । ସେହିଭଳି କେଉଁ ବିମାନରେ ସେ ଯାତ୍ରା କରୁଛନ୍ତି, ସେ ସମ୍ପର୍କରେ ମଧ୍ୟ ସୂଚନାକୁ ଗୁପ୍ତ ରଖାଯାଉଛି । ଏମିତି କି କଡ଼ା ସତର୍କତା ଭିତରେ ନିୟମିତ ବ୍ୟବଧାନରେ ସ୍ୱାସ୍ଥ୍ୟ ପରୀକ୍ଷାର ଯାଂଚ କରୁଛନ୍ତି ବୋଲି କହିଛନ୍ତି ଏଫ୍ଏସଓ’ର ଏହି ପୂର୍ବତନ ଅଧିକାରୀ ।
ପୁଟିନଙ୍କୁ କୋଭିଡ୍ ଭୟ
-ରୁଷ ରାଷ୍ଟ୍ରପତିଙ୍କୁ ଘାରିଛି କରୋନା ଭୟ
– ବ୍ୟବହାର କରୁନାହାଁନ୍ତି ମୋବାଇଲ୍ ଫୋନ୍
-ଇଂଟରନେଟ୍ଠାରୁ ଦୂରେଇ ରହୁଛନ୍ତି ପୁଟିନ୍
-ବ୍ୟକ୍ତିଗତ ଟ୍ରେନରେ କରୁଛନ୍ତି ଯାତ୍ରା
-ଯାତ୍ରା ସମ୍ପର୍କରେ ଗୁପ୍ତ ରଖାଯାଉଛି ସୂଚନା
-ବିମାନଯାତ୍ରାକୁ ଗୋପନୀୟ ରଖାଯାଉଛି
-ଅଧିକାଂଶ ସମୟ ନିଜ ଘରେ ରହୁଛନ୍ତି ପୁଟିନ୍
-ଲକ୍ଡାଉନ ଭଳି ଜୀବନ ବଂଚୁଛନ୍ତି ପୁଟିନ୍
-ନିୟମିତ ବ୍ୟବଧାନରେ କରୁଛନ୍ତି ସ୍ୱାସ୍ଥ୍ୟ ପରୀକ୍ଷା