କଂଗ୍ରେସ ଅଧ୍ୟକ୍ଷ ନିର୍ବାଚନରେ କେଉଁମାନେ ଦେଇଥାନ୍ତି ଭୋଟ ? ନିର୍ବାଚନ ପ୍ରକ୍ରିୟା ଓ କାର୍ଯ୍ୟକାଳ ଅବଧି, ଜାଣନ୍ତୁ ସବୁକିଛି
କନକ ବ୍ୟୁରୋ : ଦୀର୍ଘଦିନର ଅପେକ୍ଷା ପରେ ଦଳର ଅଧ୍ୟକ୍ଷ ନିର୍ବାଚନ ପାଇଁ ଆଜି କଂଗ୍ରେସ ତରଫରୁ ତାରିଖ ଘୋଷଣା କରାଯାଇଛି । ଘୋଷଣା ମୁତାବକ ଅକ୍ଟୋବର ୧୭ ତାରିଖରେ କଂଗ୍ରେସ ଅଧ୍ୟକ୍ଷ ପଦ ପାଇଁ ଭୋଟ ଗ୍ରହଣ ହେବ ଓ ୧୯ ତାରିଖରେ ଭୋଟ ଗଣତି ହେବ । ଏନେଇ ପ୍ରାର୍ଥୀମାନେ ସେପ୍ଟେମ୍ବର ୨୪ ତାରିଖରୁ ୩୦ ମଧ୍ୟରେ ନାମାଙ୍କନ ଭରିପାରିବେ । ଏନେଇ ସେପ୍ଟେମ୍ବର ୨୨ ତାରିଖରେ ବିଜ୍ଞପ୍ତି ପକ୍ରାଶ ପାଇବ ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସ ଅଧ୍ୟକ୍ଷ ନିର୍ବାଚନ ପାଇଁ ତାରିଖ ଘୋଷଣା ପରେ ଆପଣମାନେ ଉତ୍ସାହିତ ଥିବେ କି ଦେଶର ସବୁଠାରୁ ପୁରୁଣା ରାଜନୈତିକ ଦଳର ଅଧ୍ୟକ୍ଷ ନିର୍ବାଚନ କିଭଳି ହୋଇଥାଏ ? ଏହି ନିର୍ବାଚନରେ କେଉଁମାନେ ଭୋଟ ଦେଇଥାନ୍ତି ଓ ଅଧ୍ୟକ୍ଷଙ୍କ କାର୍ଯ୍ୟକାଳ କେତେ ବର୍ଷ ?
କଂଗ୍ରେସର ରାଷ୍ଟ୍ରୀୟ ଅଧ୍ୟକ୍ଷ ନିର୍ବାଚନ ଦଳର ସମ୍ବିଧାନ ମୁତାବକ ହୋଇଥାଏ । ହେଲେ ଏହାର ଆରମ୍ଭ ସଦସ୍ୟତା ଅଭିଯାନରୁ ହୋଇଥାଏ । ଏହି ସଦସ୍ୟତା ଅଭିଯାନ ପାଖାପାଖି ୧ ବର୍ଷ ଧରି ଚାଲିଥାଏ । ଏହାପରେ ବୁଥ୍ କମିଟି, ବ୍ଲକ କମିଟି ଓ ଜିଲ୍ଲା କମିଟି ତିଆରି କରାଯାଏ । ଏହାପରେ ପ୍ରତି ଜିଲ୍ଲାର ଅଖିଳ ଭାରତୀୟ କଂଗ୍ରେସ କମିଟି (ଏଆଇସିସି) ର ଜଣେ ପଦାଧିକାରୀ କଂଗ୍ରେସ ଅଧ୍ୟକ୍ଷ ନିର୍ବାଚନରେ ଭୋଟ ଦେଇଥାନ୍ତି ।
ନିର୍ବାଚନର ସମସ୍ତ ପ୍ରକ୍ରିୟା ପାର୍ଟିର କେନ୍ଦ୍ରୀୟ ନିର୍ବାଚନ ସମିତି ଦ୍ୱାରା ସ୍ଥିର ହୋଇଥାଏ । କେନ୍ଦ୍ରୀୟ ନିର୍ବାଚନ କମିଟି ଓ ବାକି ଟିମ୍ ର ଗଠନ କାର୍ଯ୍ୟକାରୀ ସମିତିର ସହାୟତାରେ ଦଳର ଅଧ୍ୟକ୍ଷ କରିଥାନ୍ତି । ନିର୍ବାଚନ କମିଟି ଗଠନ ହୋଇସାରିବା ପରେ ନିର୍ବାଚନୀ ପ୍ରକ୍ରିୟାରେ ପ୍ରତି ସ୍ତରର ଚୟନ , ନାମାଙ୍କନ, ନାମ ପ୍ରତ୍ୟାହାର, ସ୍କୁଟିନ, ନିର୍ବାଚନ ଫଳାଫଳ ଓ ବିଜୟ ପରେ ସାର୍ଟିଫିକେଟ ଦେବାପାଇଁ ତାରିଖ ସ୍ଥିର କରାଯାଇଥାଏ । ଏହାପରେ କଂଗ୍ରେସ ତରଫରୁ କେନ୍ଦ୍ରୀୟ ନିର୍ବାଚନ କମିଟି ନିର୍ବାଚନ ପାଇଁ ପ୍ରତିି ରାଜ୍ୟରେ ଜଣେ କିମ୍ବା ଦୁଇଜଣ (ରାଜ୍ୟର ଆକାର ମୁତାବକ) ଆସିଷ୍ଟାଣ୍ଟ ପ୍ରଦେଶ ରିଟନିଂ ଅଫିସର ନିଯୁକ୍ତ କରାଯାଇଥାଏ ।
ଏହାପରେ ପ୍ରଦେଶ କଂଗ୍ରେସ ସମିତିର ସଦସ୍ୟ ଅଧ୍ୟକ୍ଷ ପଦ ପାଇଁ ଆଶାୟୀ ପ୍ରାର୍ଥୀଙ୍କର ପ୍ରସ୍ତାବକ ହୋଇଥାନ୍ତି । ଦଳର କୌଣସି ବି ସଦସ୍ୟ ନିଜକୁ ଅଧ୍ୟକ୍ଷ ପଦପାଇଁ ନାମାଙ୍କନ କରିପାରିବେ । ହେଲେ ତାଙ୍କ ପଛରେ ସର୍ବନିମ୍ନ ୧୦ ଜଣ ପ୍ରଦେଶ କଂଗ୍ରେସ କମିଟି ସଦସ୍ୟଙ୍କ ସମର୍ଥନ ରହିଥିବା ଆବଶ୍ୟକ ।
ଏସବୁ ସରିବା ପରେ ଆଶାୟୀ ପ୍ରାର୍ଥୀଙ୍କ ନାମ ରିଟଣ୍ଣିଂ ଅଫିସରଙ୍କ ପାଖକୁ ପଠାଇ ଦିଆଯାଇଥାଏ । ଏହାପରେ ନିର୍ବାଚନ ତାରିଖ ସ୍ଥିର କରାଯାଇଥାଏ । ଏହି ସମୟରେ ନାମ ପ୍ରତ୍ୟାହାର ପାଇଁ ଆଶାୟୀ ପ୍ରାର୍ଥୀଙ୍କୁ ୭ ଦିନ ସମୟ ଦିଆଯାଇଥାଏ । କଂଗ୍ରେସ ପାର୍ଟିର ସମ୍ବିଧାନ ମୁତାବକ ଯଦି ଜଣେ ରୁ ଅଧିକ ନାମାଙ୍କନ ଭରନ୍ତି ତେବେ ନିର୍ବାଚନ କରାଯାଇଥାଏ । ଯଦି କେବଳ ଜଣେ ପ୍ରାର୍ଥୀ ହୁଅନ୍ତି ତେବେ ବିନା ନିର୍ବାଚନରେ ତାଙ୍କୁ ଅଧ୍ୟକ୍ଷ ଭାବେ ଘୋଷଣା କରାଯାଇଥାଏ ।
କଂଗ୍ରେସରେ ପ୍ରତି ୫ ବର୍ଷରେ ଥରେ ଅଧ୍ୟକ୍ଷ ପଦ ପାଇଁ ନିର୍ବାଚନ ହୋଇଥାଏ । ପ୍ରଥମେ ଏହି ପଦର କାର୍ଯ୍ୟକାଳ ୩ ବର୍ଷ ଥିଲା । ଅନ୍ୟପଟେ ଜରୁରୀକାଳୀନ ପରିସ୍ଥିତି ଓ ଅଧ୍ୟକ୍ଷଙ୍କ ଦେହାନ୍ତ ହୋଇଗଲେ ଦଳର ସବୁଠାରୁ ବରିଷ୍ଠ ମହାସଚିବଙ୍କୁ ଅନ୍ତରୀଣ ଅଧ୍ୟକ୍ଷ ଭାବେ ଦାୟୀତ୍ୱ ଦିଆଯାଇଥାଏ । ଯିଏ କି ପରବର୍ତ୍ତୀ ଅଧ୍ୟକ୍ଷ ନିର୍ବାଚନ ପର୍ଯ୍ୟନ୍ତ ଦଳର ମଙ୍ଗ ଧରିଥାନ୍ତି । ୨୦୧୯ ନିର୍ବାଚନରେ କଂଗ୍ରେସର ପରାଜୟ ପରେ ନୈତିକତା ଦୃଷ୍ଟିରୁ କଂଗ୍ରେସର ଅଧ୍ୟକ୍ଷ ଥିବା ରାହୁଲ ଗାନ୍ଧୀ ହଠାତ ଇସ୍ତଫା ଦେଇଥିଲେ । ଏହାପରେ ସୋନିଆ ଗାନ୍ଧୀ ଦଳର ଅନ୍ତରୀଣ ଅଧ୍ୟକ୍ଷ ଭାବେ କାର୍ଯ୍ୟ ତୁଲାଉଛନ୍ତି ।