କନକ ବ୍ୟୁରୋ: ଆଇନକୁ ଦଳି ମକଚି ନୋଏଡା ଛାତି ଉପରେ ଗଢ଼ା ଯାଇଥିବା ଦୁଇଟି ଆକାଶଚୁମ୍ବୀ ଟାୱାର ଧୂଳିସାତ ହୋଇଯାଇଛି । ଟିଭି ପରଦା ଉପରେ ଏତେ ବଡ଼ ବଡ଼ କୋଠା ମାତ୍ର କେଇ ସେକେଣ୍ଡ ଭିତରେ ଧୂଳିରେ ପରିଶତ ହେବାର ଦୃଶ୍ୟ ଦେଖିଛନ୍ତି ଦେଶବାସୀ । ହଲିଉଡ୍ ଫିଲ୍ମ ଭଳି ଲାଗୁଥିବା ସେହି ମୁହୂର୍ତର ଦୃଶ୍ୟକୁ ଓଲଟାଇ ବାରମ୍ବାର ଦେଖାଇବାର ସୁଯୋଗକୁ ହାତଛଡ଼ା କରିନାହାନ୍ତି ନ୍ୟୁଜ ଚ୍ୟାନେଲ୍ ।
Kanak News is now on WhatsApp
Join and get latest news updates delivered to you via WhatsApp
ଟାୱର ଧ୍ୱଂସ ହେବା ସମୟରେ ହୋଇଥିବା ବିସ୍ଫୋରଣର ଶବ୍ଦ କେବଳ ନୋଏଡାବାସୀ ନୁହନ୍ତି, ଟିଭି ଜରିଆରେ ସାରା ଦେଶବାସୀ ଏହି ଶବ୍ଦ ଶୁଣିଛନ୍ତି । ତାସ ଘର ଭଳି ଟାୱାର ଭୁଶୁଡି ପଡ଼ିବା ବେଳେ ଧୂଳିକଣା ଓ ପାଉଁଶ ବ୍ୟାପୀ ଯାଇଥିବାର ଦୃଶ୍ୟ, ଏକ ଭୟାନକ ଯୁଦ୍ଧର ବିଭୀଷିକାର ଭ୍ରମ ସୃଷ୍ଟି କରିଛି । କିନ୍ତୁ ଏବେ ବଡ଼ ପ୍ରଶ୍ନ ହେଉଛି, ୧୭ ବର୍ଷର ବିବାଦ ଏହି ଧ୍ୱଂସ ସହ ଏଇଠି ସରିଯାଇଛି, ନା’ ଏହାର ଭୟାନକ ପ୍ରଭାବ ଆଗକୁ ଦେଖିବାକୁ ବାକି ଅଛି । କାରଣ ଟାୱାର ଧ୍ୱଂସ ସହରରେ ଯେଉଁ ଧୂଳିକଣା, ନୋଏଡା ସହରକୁ ଧଳା ଚାଦରରେ ଘୋଡ଼ାଇ ଦେଇଥିଲା, ତାର ପରିବେଶ ଉପରେ କଣ ପ୍ରଭାବ ପଡ଼ିବ । ତାହା ଉପରେ ସମସ୍ତଙ୍କ ନଜର ଅଟକିଛି ।
ଟ୍ୱିନ୍ ଟାୱାର ଧ୍ୱଂସ ହୋଇଯିବା ପରେ ପାହାଡ଼ ଆକାରରେ ଧ୍ୱଂସାବଶେଷ ଓ ଧୂଳିକଣା ସୃଷ୍ଟି ହୋଇଛି । ୮୦ ହଜାର ଟନ୍ ଧୂଳିକଣା ଜମା ହୋଇଥିବା ଆକଳନ କରାଯାଇଛି । ବାଲି, ସିମେଂଟ, ଇଟା ଓ ଲୁହାଗୁଣ୍ଡ ବାୟୁମଣ୍ଡଳରେ ମିଶି ଦୂରକୁ ଚାଲିଯିବା ପୂର୍ବରୁ ପାଣି ସ୍ପ୍ରେ କରାଯାଇ, ସ୍ଥିର କରିବାକୁ ଉଦ୍ୟମ କରାଯାଉଛି । ହେଲେ ଅତି ସୂକ୍ଷ୍ମ କଣିକାକୁ କିପରି ରୋକିହେବ, ତାହା ଏବେ ଚିନ୍ତାର କାରଣ ପାଲଟିଛି । ଯଦି ଏହା ବାୟୂମଣ୍ଡଳରେ ମିଶିଯିବ, ତେବେ ଏହା ଅନେକ ମାରାତ୍ମକ ରୋଗର କାରଣ ହୋଇପାରେ ।
ଟ୍ୱିନ୍ ଟାୱାର ଧ୍ୱଂସ ପୂର୍ବରୁ ପାଖାପାଖି ଅଂଚଳରୁ ଲୋକଙ୍କୁ ସ୍ଥାନାନ୍ତର କରାଯାଇଥିଲା । କିନ୍ତୁ ଆଖପାଖ ଅଂଚଳରେ ଯେଉଁ ଧୂଳିର ଆସ୍ତରଣ ଦେଖିବାକୁ ମିଳିଛି, ତାହା ପରିବେଶ ଉପରେ ପ୍ରତିକୂଳ ପ୍ରଭାବ ପକାଇବା ଆଶଙ୍କା ରହିଛି ।