ନେତାଙ୍କ ନଜରରେ କଣ ଥିଲା ୨୦୧୭ର ବଡ ଖବର ? ବିଜେଡି କହିଲା ମୁଖ୍ୟମନ୍ତ୍ରୀଙ୍କୁ ଶ୍ରେଷ୍ଠ ପ୍ରଶାସକର ପୁରସ୍କାର ଥିଲା ସବୁଠୁ ଚର୍ଚ୍ଚାରେ
କନକ ବ୍ୟୁରୋ : ୨୦୧୭ର ହିସାବ-ନିକାସ୍ ଭିତରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦେଶର ସର୍ବଶ୍ରେଷ୍ଠ ପ୍ରଶାସକ ଭାବେ ଆଉଟଲୁକ୍ ଦ୍ୱାରା ପୁରସ୍କୃତ ହେବା ଖବରକୁ ସବୁଠୁ ଭଲ ଖବର ଭାବେ ଗ୍ରହଣ କରିଛି ବିଜେଡି । ଯାହାକୁ ନେଇ ଏକ ବଡ ଧରଣର ପ୍ରଚାର ବି ଦଳ ପକ୍ଷରୁ କରାଯାଇଥିଲା । ଦଳ ପକ୍ଷରୁ କୁହାଯାଇଛି-ନବୀନଙ୍କ ପ୍ରଶାସନିକ 
ପରିଚାଳନାର ଏହା ସ୍ୱୀକୃତି । ହେଲେ ମହାନଦୀ ପ୍ରସଙ୍ଗରେ ଉଭୟ କେନ୍ଦ୍ର ସରକାର ଏବଂ ପଡ଼ୋଶୀ ଛତିଶଗଡ଼ ସରକାର, ଓଡ଼଼ିଶାକୁ ଧୋକା ଦେଇଥିବା କହୁଛି ଦଳ । ଯେଉଁଥି ପାଇଁ ଏହାକୁ ସବୁଠୁ ମର୍ମାହତ କଲା ଭଳି ଖବର ବୋଲି କହିଛି ବିଜେଡି ।
Kanak News is now on WhatsApp
Join and get latest news updates delivered to you via WhatsApp
ପଂଚାୟତ ନିର୍ବାଚନରେ ଓଡ଼ିଶାରେ ବିଜେପିର ଲୋକପ୍ରିୟତା ଏବଂ ତୃତୀୟ ସ୍ଥାନରୁ ଦ୍ୱିତୀୟ ସ୍ଥାନକୁ ଉଠିବା ଦଳକୁ ଉତ୍ସାହିତ କଲା ଭଳି ଖବର ବୋଲି ଗ୍ରହଣ କରିଛି ବିଜେପି । ରାଜ୍ୟରେ ବିଜେପି ପ୍ରତି ଲୋକଙ୍କ ଆସ୍ଥା ବଢ଼ିଥିବା ବିଜେପି ଦାବି କରୁଥିବା ବେଳେ ଚାଷୀ ଆତ୍ମହତ୍ୟାକୁ ସବୁଠୁ ଖରାପ ଖବର ବୋଲି ଗ୍ରହଣ କରିଛି । ଚାଷୀ ଆତ୍ମହତ୍ୟା ପ୍ରସଙ୍ଗରେ ରାଜ୍ୟ ସରକାରଙ୍କୁ ସମାଲୋଚନା କରୁଥିବା ବିଜେପି ଏହି ଖବରକୁ ଶୁଭଙ୍କର ନୁହେଁ ବୋଲି ଗ୍ରହଣ କରିଛନ୍ତି ।
ମୋଦି ସରକାର ଆଣିଥିବା ନୂଆ ଟିକସ ବ୍ୟବସ୍ଥା ଜିଏସଟି ଏବଂ ବିମୁଦ୍ରାକରଣକୁ ଦେଶ ଏବଂ ଦଳ ପାଇଁ ସବୁଠୁ ମର୍ମାହତ କଲା ଭଳି ଖବର ବୋଲି କହିଛନ୍ତି ପ୍ରଦେଶ କଂଗ୍ରେସ ସଭାପତି । ଭୁଲ ନୀତି ଯୋଗୁଁ ଦେଶର ଆର୍ଥିକମାନଦଣ୍ଡ ଦୋହଲି ଗଲା ବୋଲି ପ୍ରସାଦ ହରିଚନ୍ଦନ କହିଛନ୍ତି । ଆଉ ସବୁଠୁ ଆଶ୍ଚର୍ଯ୍ୟର କଥା ହେଲା, ପଂଚାୟତ ନିର୍ବାଚନରେ ତୃତୀୟ ସ୍ଥାନକୁ ଖସି ଆସିଥିଲେ ବି ପଂଚାୟତ ଫଳକୁ ଖୁସି ଖବର ଭାବେ ଗ୍ରହଣ କରିଛି କଂଗ୍ରେସ ।
ଆଉ ଏହି ସବୁ ହିସାବ୍ କିତାବ୍ ଭିତରେ ଆଗାମୀବର୍ଷକୁ ସ୍ୱାଗତ କରିବେ ଓଡ଼ିଶାର ତିନି ପ୍ରମୁଖ ରାଜନୈତିକ ଦଳ ବିଜେଡି, ବିଜେପି ଏବଂ କଂଗ୍ରେସ ।