ଦିନ ଦ୍ୱିପ୍ରହରରେ ଲୁଟ କଲେ, କାରରେ ଟଙ୍କା ନେଇ ଫେରାର ହେଲେ ! କ୍ୟାମେରାରେ କଏଦ ହେଲା ପୂରା ଦୃଶ୍ୟ
କନକ ବ୍ୟୁରୋ : ଦିନ ଦ୍ୱିପ୍ରହରରେ ମାତିଲେ ଲୁଟେରା । ସମ୍ବଲପୁରରେ ଦିନ ଦ୍ୱିପହରରେ ଫାଇନାନ୍ସ କଂପାନୀରୁ ଲୁଟ୍ । ମୁହଁରେ କପଡା ବାନ୍ଧି ୫ ଜଣ ଯୁବକ ଲୁଟ କରୁଥିବାର ଦୃଶ୍ୟ ସିସିଟିଭି ଫୁଟେଜରେ ସାମ୍ନାକୁ ଆସିଛି । ଡକାୟତମାନେ କିପରି ଲୁଟ୍ ପରେ ଟଙ୍କା ଓ ସୁନାକୁ କାରରେ ଭର୍ତ୍ତି କରି ନେଉଛନ୍ତି, ତାର ଫଟୋ ଏବେ ସାମନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ଆଜି ଦିନ ପ୍ରାୟ ତିନିଟା ବେଳେ ସମ୍ବଲପୁର ବୁଢାରାଜା ମାର୍କେଟ କମ୍ପେ୍ଲକସରେ ମୁଥୁହୁଟ ଫାଇନାନସ ଶାଖାରେ ବଡ଼ ଧରଣର ଡକାୟତି ହୋଇଛି । ୫ ଜଣ ଡକାୟତ, ବଂଧୁକ ଦେଖାଇ କର୍ମଚାରୀଙ୍କୁ ଭୟଭୀତ କରିବା ପରେ ଲକ୍ଷ ଲକ୍ଷ ଟଙ୍କା ଓ ସୁନା ଲୁଟି ନେଇଛନ୍ତି । ଅଧ ଘଂଟା ଧରି ମୁଥୁହୁଟ ଫାଇନାନସ ଶାଖାରେ କଳାକନା ବୁଲାଇବା ପରେ ଟଙ୍କା ଓ ସୁନାକୁ ଏକ ମାରୁତି ଡିଜାୟାର କାରରେ ଭର୍ତି କରି ନେଇଯାଇଥିଲେ । କିଛି ଲୋକ ଡକାୟତଙ୍କ ଫଟୋ ଉଠାଇ ଥିଲେ ବି ଏହାର ପ୍ରତିବାଦ କରିବାକୁ ସାହସ ଜୁଟାଇ ପାରିନଥିଲେ ।
ଘଟଣା ପରେ ସମ୍ବଲପୁର ପୁଲିସ ପହଁଛି ତନାଘନା ଆରମ୍ଭ କରିଛି । ସମ୍ବଲପୁର ବାହାରକୁ କିପରି ଡକାୟତ ଦଳ ଯାଇନପାରିବେ, ସେ ନେଇ ରାସ୍ତା ଅବରୋଧ କରି କଡ଼ା ଯାଂଚ କରାଯାଉଛି । ତେବେ କେତେ ପରିମାଣର ସୁନା ଓ ଟଙ୍କା ଲୁଟ ହୋଇଛି ସେ ନେଇ କୌଣସି ସ୍ପଷ୍ଟ ସୂୂଚନା ମିଳିନାହିଁ । ତେବେ ଲୁଟ ପରେ ଏସପି ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଏସପିଙ୍କ ନିର୍ଦ୍ଦେଶରେ ତଦନ୍ତ ଲାଗି ଏକ ସ୍ୱତନ୍ତ୍ର ଟିମ୍ ଗଠନ କରାଯାଇଛି । ତଦନ୍ତ ପରେ ପ୍ରକୃତରେ କେତେ ମୂଲ୍ୟର ସୁନା ଓ ଟଙ୍କା ଚୋରି ହୋଇଛି ତାହା ଜଣା ପଡିବ । ତେବେ ଦିନ ଦ୍ୱିପ୍ରହରରେ ଏହି ଲୁଟ ହୋଇଥିବା ଯୋଗୁଁ କମ୍ପାନୀର କର୍ମଚାରୀଙ୍କ ଉପରେ ମଧ୍ୟ ସନ୍ଦେହ କରୁଛି ପୋଲିସ । ତେଣୁ ମୁ୍ଥୁହୁଟ ଫାଇନାନସ କର୍ମଚାରୀଙ୍କ ମୋବାଇଲ ଜବତ କରି କଲ୍୍ ବିବରଣୀ ଯାଂଚ କରୁଛି ପୁଲିସ ।