କନକ ବ୍ୟୁରୋ : ଦେଶର ଚତୁର୍ଥ ସ୍ତମ୍ବ ବି ଆଜି ସୁରକ୍ଷିତ ନୁହେଁ । ସାମ୍ବାଦିକମାନେ ଏବେ ଲୋକପ୍ରତିନିଧୀଙ୍କ ଆକ୍ରୋଶରେ ବାରମ୍ବାର ଶିକାର ହେଉଛନ୍ତି । ଏହା ପଛରେ କାରଣ ଯାହା ହେଉନା କାହିଁକି, କିନ୍ତୁ ଏହା ନିନ୍ଦନୀୟ । ରାଜ୍ୟରେ ତୃତୀୟ ପର୍ଯ୍ୟାୟ ନିର୍ବାଚନ ପାଇଁ ମତଦାନ ଚାଲିଥିବା ବେଳେ କେନ୍ଦ୍ୁଝର ଲୋକସଭା ଅନ୍ତର୍ଗତ ଘଷିପୁରା ନିର୍ବାଚନମଣ୍ଡଳୀରେ ବାରମ୍ବାର ହିଂସା ଦେଖିବାକୁ ମିଳିଛି । ଆଜି ଭୋଟିଂ ଚାଲିଥିବା ବେଳେ ପ୍ରଥମେ ଜଣେ ସାମ୍ବାଦିକଙ୍କୁ ଆକ୍ରମଣ କରାଯାଇଥିଲା । ଏହାକୁ ନେଇ ଆରୋପ ପ୍ରତ୍ୟାରୋପ ଲାଗି ରହିଥିବା ବେଳେ ପୁଣି ବଡଜାମୁପଶି ସ୍ଥିତ ୬୯ ନମ୍ବର ବୁଥରେ ଜଣେ କାର୍ଯ୍ୟରତ ସାମ୍ବାଦକଙ୍କ ଉପରେ ମରଣାତ୍ମକ ଆକ୍ରମଣ କରାଯାଇଛି । ଏହି ଆକ୍ରମଣ ପଛରେ ଜନତା ନୁହଁନ୍ତି ବରଂ ଜଣେ ଗ୍ରାମରକ୍ଷୀଙ୍କ ସଂପୃକ୍ତି ରହିଛି । ସ୍ଥାନୀୟ ଗ୍ରାମରକ୍ଷୀ ବୃଷଭଭାନୁ ଦାସ ସିଧାସଳଖ ଜଣେ କାର୍ଯ୍ୟରତ ସାମ୍ବାଦିକଙ୍କୁ ଆକ୍ରମଣ କରିଛନ୍ତି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ଏହି ବୁଥରେ କିଛି ଲୋକ ଗଣ୍ଡଗୋଳ କରୁଥିଲେ, ସାମ୍ବାଦିକ ଜଣଙ୍କ ଏହି ଗଣ୍ଡଗୋଳର ଭିଡିଓ ରେକଡିଂ କରୁଥିବା ବେଳେ ଗ୍ରାମରକ୍ଷୀ ବୃଷଭଭାନୁ ଦାସ ସାମ୍ବାଦିକ ଜଣଙ୍କୁ ଆକ୍ରମଣ କରିଥିଲେ । ଏ ନେଇ ଅଭିଯୋଗ ପରେ ପୋଲିସ ଘଟଣା ସ୍ଥଳରେ ପହଂଚି କିଛି ଲୋକଙ୍କୁ ଅଟକ ରଖି ପଚରା ଉଚରା କରୁଛି । ଆକ୍ରମଣରେ ଶିକାର ହୋଇଥିବା ସାମ୍ବାଦିକ ଜଣଙ୍କ ସଂଗୀନ ଅଭିଯୋଗ ଆଣିଛନ୍ତି । ସେ କହିଛନ୍ତି କି, ଏହି ଗଣ୍ଡଗୋଳ ଶାସକ ଦଳର ନେତାଙ୍କ ପ୍ରରୋଚନାରେ ହୋଇଛି । ଏହାସହ ଜିଲ୍ଲା ପ୍ରଶାସନ ସ୍ଥାନୀୟ ବିଧାୟକଙ୍କ ଇସାରାରେ କାମ କରୁଛି ବୋଲି ଅଭିଯୋଗ କରିଛନ୍ତି ।