ଭାରତ ବିପକ୍ଷ ହାଇଭୋଲଟେଜ୍ ମ୍ୟାଚରେ ‘କଳା ବ୍ୟାଚ୍’ ପିନ୍ଧି ଖେଳିବ ପାକିସ୍ତାନ । ଜାଣନ୍ତୁ, ଏହା ପଛର କାରଣ…
କନକ ବ୍ୟୁରୋ: ଏସିଆ କପ୍ ଟୁର୍ଣ୍ଣାମେଣ୍ଟ ୨୦୨୨ର ଦ୍ୱିତୀୟ ମ୍ୟାଚ୍ ଆଜି ଖେଳାଯିବ । ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତ-ପାକିସ୍ତାନ ଏହି ମ୍ୟାଚରେ ମୁହାଁମୁହିଁ ହେବେ । ୟୁଏଇର ଦୁବାଇ ଇଣ୍ଟରନ୍ୟାସନାଲ କ୍ରିକେଟ୍ ଷ୍ଟାଡିୟମରେ ଏହି ମ୍ୟାଚ୍ ରାତି ସାଢେ ୭ଟାରେ ଖେଳାଯିବ ।
Kanak News is now on WhatsApp
Join and get latest news updates delivered to you via WhatsApp
ତେବେ ଭାରତ ବିପକ୍ଷ ଏହି ହାଇଭୋଲଟେଜ୍ ମ୍ୟାଚରେ ପାକିସ୍ତାନ କ୍ରିକେଟ୍ ଟିମ୍ କଳା ବ୍ୟାଚ୍ ପିନ୍ଧି ମ୍ୟାଚ୍ ଖେଳିବ । ପାକିସ୍ତାନରେ ଆସିଥିବା ଭୟଙ୍କର ବନ୍ୟାରେ ପ୍ରାଣ ହରାଇଥିବା ଲୋକଙ୍କୁ ଶ୍ରଦ୍ଧାଞ୍ଜଳି ଜଣାଇ ପାକିସ୍ତାନ କ୍ରିକେଟ୍ ଦଳ ଏଭଳି ନିଷ୍ପତ୍ତି ନେଇଛି । ତା ସହିତ ଏହି ବନ୍ୟାକୁ ସାମ୍ନା କରୁଥିବା ଲୋକଙ୍କ ପାଇଁ ଏହା ଏକ ସପୋର୍ଟ ହେବ ବୋଲି କୁହାଯାଇଛି । ପାକିସ୍ତାନ କ୍ରିକେଟ୍ ଦଳର ଅଧିନାୟକ ବାବର ଆଜମ୍ ଆଜି ପ୍ରେସମିଟ୍ କରି ଏହି ସୂଚନା ଦେଇଛନ୍ତି ।
ପାକିସ୍ତାନ କ୍ରିକେଟ୍ ବୋର୍ଡ ପକ୍ଷରୁ ମଧ୍ୟ ଏନେଇ ବିଧିବଦ୍ଧ ଭାବେ ବୟାନ ଜାରି କରାଯାଇଛି । ଏଥିରେ କୁହାଯାଇଛି ଯେ, ପାକିସ୍ତାନ କ୍ରିକେଟ୍ ଟିମ୍ ଆଜି ଏସିଆ କପରେ ନିଜର ପ୍ରଥମ ମ୍ୟାଚ୍ ଟିମ୍ ଇଣ୍ଡିଆ ବିପକ୍ଷରେ ଖେଳିବ । ଏହି ମ୍ୟାଚରେ ଦଳର ଖେଳାଳିମାନେ କଳା ବ୍ୟାଚ୍ ପିନ୍ଧି ପଡିଆକୁ ଓହ୍ଲାଇବେ । ବନ୍ୟା ପୀଡିତଙ୍କୁ ସପୋର୍ଟ କରିବା ପାଇଁ ଏପରି କରାଯାଉଛି ବୋଲି ପିସିବି ତରଫରୁ ସୂଚନା ଦିଆଯାଇଛି । ମ୍ୟାଚର ଗୋଟିଏ ଦିନ ପୂର୍ବରୁ ଅଧିନାୟକ ବାବର ଆଜମ୍ ମଧ୍ୟ ପାକିସ୍ତାନରେ ବନ୍ୟା ନେଇ ସୂଚନା ଦେଇଥିଲେ । ତା ସହିତ ବନ୍ୟା ପୀଡିତଙ୍କୁ ସାହାଯ୍ୟ କରିବା ପାଇଁ ମଧ୍ୟ ସେ ଲୋକଙ୍କୁ ଅପିଲ କରିଥିଲେ ।
ସୂଚନାଯୋଗ୍ୟ ଯେ, ଆଜି କ୍ରିକେଟ ମୈଦାନରେ ମୁହାଁମୁହିଁ ହେବେ ଭାରତ ଓ ପାକିସ୍ତାନ । ଏସିଆ କପ୍ରେ ଆଜି ପରସ୍ପରକୁ ଭେଟିବେ ଦୁଇ ପାରମ୍ପରିକ ପ୍ରତିଦ୍ୱନ୍ଦୀ । ପାକିସ୍ତାନ ବିପକ୍ଷ ମ୍ୟାଚ୍ ଖେଳି ଏସିଆ କପରେ ଅଭିଯାନ ଆରମ୍ଭ କରିବ ଟିମ୍ ଇଣ୍ଡିଆ । ଗତବର୍ଷ ଟି-୨୦ ବିଶ୍ୱକପରେ ପାକିସ୍ତାନଠୁ ମିଳିଥିବା ପରାଜୟର ପ୍ରତିଶୋଧ ନେବାକୁ ସବୁପ୍ରକାର ଚେଷ୍ଟା କରିବେ ରୋହିତ ବାହିନୀ । ଏସିଆ କପର ମୋଟ ପରିସଂଖ୍ୟାନ କିନ୍ତୁ ଭାରତ ସପକ୍ଷରେ ରହିଛି । ଆଜିର ମ୍ୟାଚରେ ଦୁଇ ଦଳର ମୁଖ୍ୟ ଷ୍ଟ୍ରାଇକ ବୋଲର ଯଶପ୍ରୀତ ବୁମରା ଓ ସାହିନ ଆଫ୍ରିଦିଙ୍କୁ ଦେଖିବାକୁ ମିଳିବ ନାହିଁ । ତେବେ ଏବେ ଫର୍ମରେ ନଥିବା ବିରାଟ କୋହଲି ଓ ପାକିସ୍ତାନ ଅଧିନାୟକ ତଥା ଷ୍ଟାର ବ୍ୟାଟର ବାବର ଆଜମଙ୍କ ପ୍ରଦର୍ଶନ ଉପରେ ସମସ୍ତଙ୍କ ନଜର ରହିବ ।