୩ ଦଳ ପ୍ରସ୍ତୁତ, ମିଳିଲାଣି ସଂକେତ । ଓଡ଼ିଶାରେ ହେବ କି ଆଗୁଆ ନିର୍ବାଚନ?
କନକ ବ୍ୟୁରୋ : ଓଡ଼ିଶାରେ ଏବେ ରାଜନୈତିକ ଉଷ୍ମତା ଅନେକ ଦିଗକୁ ଇଙ୍ଗିତ କରୁଛି । ଉଭୟ ଶାସକ ଓ ବିରୋଧୀଙ୍କ ମଧ୍ୟରେ ଯେଉଁ ରାଜନୈତିକ ବୟାନବାଜି ଆରମ୍ଭ ହୋଇଛି ତାହା କିଛି ଭିନ୍ନ ସଂକେତ ଦେଉଛି । ଏଭଳି ରାଜନୈତିକ ବୟାନବାଜି ମୁଖ୍ୟତଃ ନିର୍ବାଚନ ସମୟରେ ଅଧିକ ଦେଖିବାକୁ ମିଳେ । କିନ୍ତୁ ଓଡ଼ିଶାରେ ନିର୍ବାଚନ ହେବାକୁ ତ ଆହୁରି ବର୍ଷେ ସମୟ ବାକି ଅଛି । ତେଣୁ ଏତେ ଆଗରୁ କାହିଁକି ରାଜନୈତିକ ଦଳ ଗୁଡିକ ପକ୍ଷରୁ କାଦୁଅ ଫିଙ୍ଗାଫିଙ୍ଗି ଆରମ୍ଭ ହୋଇଛି । ଏହା ପଛର କାରଣ ଆଗୁଆ ନିର୍ବାଚନ ନୁହେଁ ତ ? ଓଡ଼ିଶାରେ ଆଗୁଆ ନିର୍ବାଚନ ନେଇ ପୂର୍ବରୁ ଚର୍ଚ୍ଚା କିଛି କମ ହୋଇନାହିଁ । ଆଉ ଏବେ ଏହି ଚର୍ଚ୍ଚାକୁ ବଳ ଯୋଗାଉଛି ରାଜନୈତିକ ଦଳ ଗୁଡିକର ପ୍ରସ୍ତୁତି । ସାଧାରଣ ନିର୍ବାଚନକୁ ନେଇ କୌଣସି ସ୍ପଷ୍ଟ ସଂକେତ ମିଳିନଥିବା ବେଳେ ବିଜେଡି ଢେର ଆଗରୁ ନିଜର ପ୍ରସ୍ତୁତି ଆରମ୍ଭ କରିଛି । ସେହିଭଳି କଂଗ୍ରେସ ମଧ୍ୟ ଆଗାମୀ ନିର୍ବାଚନ ପାଇଁ ପ୍ରଚାର କମିଟି ଅଧ୍ୟକ୍ଷଙ୍କ ନାଁ ଘୋଷଣା କରି ଏହି ଚର୍ଚ୍ଚାକୁ ଆହୁରି ଖୋରାକ ଯୋଗାଇଛି । ବିଜେପି ମଧ୍ୟ ଏହି ରେସରେ ପଛରେ ନାହିଁ । ବିଭିନ୍ନ କେନ୍ଦ୍ରମନ୍ତ୍ରୀଙ୍କ ଘନଘନ ଓଡ଼ିଶା ଗସ୍ତ ହିଁ ରାଜ୍ୟରେ ଆଗୁଆ ନିର୍ବାଚନ ପାଇଁ ସଂକେତ ଦେଉଥିବା ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
କେବଳ ଏତିକି ନୁହେଁ ରାଜନୈତିକ କରିଡରରେ ହେଉଥିବା ଚର୍ଚ୍ଚା ଅନୁଯାୟୀ, ବିଜେଡି ଅତି ଗୁପ୍ତ ଢଙ୍ଗରେ ନିଜର ସର୍ଭେ ଶେଷ କରିଛି । ଜିଲ୍ଲାୱାରୀ କେଉଁ ଆସନରେ ବିଜେଡିର ସଙ୍ଗଠନ ଅଧିକ ସୁଦୃଢ ରହିଛି ତାହାର ପୂରା ରିପୋର୍ଟକାର୍ଡ ଦଳର ସୁପ୍ରିମୋଙ୍କ ପାଖରେ ପହଞ୍ଚିଛି । ଯେଉଁ ରିପୋର୍ଟ କାର୍ଡ ଆଧାରରେ ଦଳ ନିଜର ନିର୍ବାଚନ ରଣନୀତି ପ୍ରସ୍ତୁତ କରୁଛି । ସେହିଭଳି ନବୀନଙ୍କ ବିଭିନ୍ନ ଜିଲ୍ଲା ଗସ୍ତ ମଧ୍ୟ ଆଗୁଆ ନିର୍ବାଚନର ପ୍ରାକ୍ ପ୍ରସ୍ତୁତି ବୋଲି ରାଜନୈତିକ କରିଡରରେ ଚର୍ଚ୍ଚା ହେଉଛି । ସେହିଭଳି କେନ୍ଦ୍ରମନ୍ତ୍ରୀ ଘନ ଘନ ଓଡ଼ିଶା ଗସ୍ତକରି ବିଜେପି ସଙ୍ଗଠନକୁ ସୁଦୃଢ କରିବାକୁ ମନ୍ତ୍ର ଦେଉଛନ୍ତି । ଏପରିକି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଓଡ଼ିଶାରେ ଆଗୁଆ ନିର୍ବାଚନ ହେବା ସଂକେତ ଦେଇଛନ୍ତି । ଅନ୍ୟପଟେ ରାହୁଲ ଗାନ୍ଧୀଙ୍କ ଭାରତ ଯୋଡ ଯାତ୍ରା ପରେ ଓଡ଼ିଶା କଂଗ୍ରେସ ମଧ୍ୟ ବେଶ ସକ୍ରିୟ ହୋଇଛି । ଆଗୁଆ ନିର୍ବାଚନର ଆଭାସ ପାଇବା ମାତ୍ରେ ଦଳ ନିଜର ପ୍ରସ୍ତୁତିକୁ ଦ୍ୱିଗୁଣିତ କରିଛି । ଏପରିକି ଦଳ ଆଗୁଆ ପ୍ରଚାର କମିଟିର ଅଧ୍ୟକ୍ଷ ଭାବେ ବିଜୟ ପଟ୍ଟନାୟକଙ୍କ ନାଁ ଘୋଷଣା କରି ମାରିଛି ମାଷ୍ଟରଷ୍ଟ୍ରୋକ । ତେଣୁ ରାଜନୈତିକ ଦଳ ଗୁଡିକ ମଧ୍ୟରେ ଏଭଳି ତତ୍ପରତା, ଓଡ଼ିଶାରେ ଆଗୁଆ ନିର୍ବାଚନ ସମ୍ଭାବନାକୁ ବଳ ଯୋଗାଉଛି ।
କେବଳ ଏତିକି ନୁହେଁ ଆଗାମୀ ନଭେମ୍ବରରୁ ଜାନୁଆରୀ ମଧ୍ୟରେ ମିଜୋରାମ, ଛତିଶଗଡ, ମଧ୍ୟପ୍ରଦେଶ, ରାଜସ୍ଥାନ, ତେଲେଙ୍ଗାନାରେ ବିଧାନସଭା ନିର୍ବାଚନ ହେବାକୁ ଯାଉଛି । ତେଣୁ ଓଡ଼ିଶା ବିଧାନସଭା ନିର୍ବାଚନ ଏହି ସମୟରେ ହୋଇପାରେ ବୋଲି ଚର୍ଚ୍ଚା ହେଉଛି । ଏପରିକି ଆଗୁଆ ନିର୍ବାଚନ ପାଇଁ ରାଜ୍ୟର ୩ ପ୍ରମୁଖ ରାଜନୈତିକ ଦଳ ପ୍ରସ୍ତୁତ ବୋଲି ମଧ୍ୟ ସ୍ପଷ୍ଟ କରି ସାରିଛନ୍ତି । କିନ୍ତୁ ଆଗୁଆ ନିର୍ବାଚନ ହେଲେ କାହାକୁ ସବୁଠୁ ଅଧିକ ଫାଇଦା ମିଳିବ ଓ କିଏ ଘାଟାରେ ପଡିବ ତାହାର ଆକଳନ କରିବା କଷ୍ଟକର ।