ପୁଣି ମାତିଲେ ରକ୍ତ ଚରିତ୍ର ଗ୍ୟାଙ୍ଗ? ମଦ ବୋତଲ ଧରି ଡିିଜେ ଗୀତରେ ରାସ୍ତାରେ ମତୁଆଲା ଯୁବକ, ଫିଲ୍ମ ଷ୍ଟାଇଲରେ ଗାଡ଼ି ଚଳାଇ ଖେଳାଉଛନ୍ତି ଆତଙ୍କ ।
କନକ ବ୍ୟୁରୋ : ପୁଣି ରାଜଧାନୀକୁ ଫେରିଛି ରକ୍ତଚରିତ୍ର ଗ୍ୟାଙ୍ଗର ଆତଙ୍କ । ରାତିରେ ରାଜରାସ୍ତାକୁ କବଜା କରି ମାତାଲ ଅବସ୍ଥାରେ ଆତଙ୍କ ଖେଳାଉଥିବା ଆସାମାଜିକ ଯୁବକଙ୍କ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଆଶ୍ଚର୍ଯ୍ୟର କଥା ହେଉଛି ଏଭଳି କାଣ୍ଡ କରୁଥିବା ଯୁବକମାନେ ହେଉଛନ୍ତି, ରାଜଧାନୀର ଏକ ଘରୋଇ ଇଂଜିନିୟରିଂ କଲେଜର ଛାତ୍ର । ନିଜେ ଛାତ୍ର ହୋଇ ମଧ୍ୟ ଅନ୍ୟ ଛାତ୍ରଙ୍କୁ ମାର ଧର କରି ଟଙ୍କା ଛଡେଇ ନେଉଥିବା ଥାନାରେ ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଯେଉଁଭଳି ଭାବେ ରାତି ଅଧରେ ଯୁବକମାନେ ନିଛାଟିଆ ରାସ୍ତାରେ ଉଚ୍ଚ ଶବ୍ଦରେ ମ୍ୟୁଜିକ୍ ବଜାଇ ବିପଦପୂର୍ଣ୍ଣ ଗାଡି ଚାଳନା କରୁଛନ୍ତି- ଏସବୁ ପ୍ରାୟତଃ ବଲିଉଡ ମୁଭିରେ ଦେଖିବାକୁ ମିଳେ । କିନ୍ତୁ ଆପଣ ଜାଣି ଆଶ୍ଚର୍ଯ୍ୟ ହେବେ ଏହି ଛାତିଥରା ଦୃଶ୍ୟ ହେଉଛି ଖୋଦ୍ ରାଜଧାନୀ ରାଜରାସ୍ତାର । ଭାଇରାଲ ହୋଇଥିବା ଏହି ଭିଡିଓରେ ସେହି ସ୍ଥାନର ଲୋକେସନ ବି ଉଲ୍ଲେଖ ରହିଛି । ଏହି ଭିଡିଓଟିକୁ ଦେଖିଲେ ଲାଗୁଛି ଯେମିତି ପୁରା ରାଜଧାନୀ ଏମାନଙ୍କ କବଜାରେ ।
ପୁଣି ଫେରିଲା କି ରକ୍ତ ଚରିତ୍ର ଗ୍ୟାଙ୍ଗ?
ମଦ ପିଇଲେ, ନାଚିଲେ, ଆତଙ୍କ ଖେଳାଇଲେ
ନିରୀହ ଛାତ୍ରଙ୍କୁ ଲୁଟିଲେ ନିଶାଖୋର
ରାଜରାସ୍ତାରେ ନିଶାସକ୍ତ ଅବସ୍ଥାରେ ଘୁରିବୁଲୁଥିବା ଯୁବକମାନେ ଏକ ଘରୋଇ ଇଂଜିନିୟରି କଲେଜର ଛାତ୍ର । ଆଉ ଛାତ୍ର ହୋଇ ଅନ୍ୟ ଛାତ୍ରମାନଙ୍କ ସହ ଯାହା କରିଛନ୍ତି, ତାହା ଛାତି ଥରାଇ ଦେଲା ଭଳି । ବାରମ୍ବାର ଏହି ନିଶାଖୋରଙ୍କ ଆକ୍ରୋଶର ଶିକାର ହେବା ପରେ ଥାନାର ଦ୍ୱାରସ୍ଥ ହୋଇଛନ୍ତି ଏକାଧିକ ଛାତ୍ର । କିନ୍ତୁ ଏନେଇ ଗଣମାଧ୍ୟମ ଆଗରେ ମୁହଁ ଖୋଲିବାକୁ ଭୟ କରୁଛନ୍ତି । ହେଲେ ଏହାରି ଭିତରେ ଜଣେ ଛାତ୍ର ପ୍ରଥମଥର ପାଇଁ ଗଣମାଧ୍ୟମରେ ମୁହଁ ଖୋଲି ସାହସ ଜୁଟାଇଛନ୍ତି । ଆଉ କହିଛନ୍ତି, ଏହି ନିଶାଖୋର ଛାତ୍ରମାନେ କେତେ ଭୟଙ୍କର ହୋଇପାରନ୍ତି ।
ପୂର୍ବରୁ ରାଜଧାନୀରେ ଆତଙ୍କଖେଳାଇଥିବା ରକ୍ତଚରିତ୍ର ଗ୍ୟାଙ୍ଗର ବହୁ ସଦସ୍ୟଙ୍କୁ ଜେଲରେ ପୁରାଇ ସାବାଡ କରିଥିଲା କମିସନରେଟ ପୁଲିସ । କିଛି ଦିନର ବ୍ୟବଧାନ ପରେ କିଛି ଜେଲ ଫେରନ୍ତା ପୁଣି ଥରେ ରକ୍ତଚରିତ୍ର ଗ୍ୟାଙ୍ଗ ରାଜଧାନୀକୁ ଫେରିଛନ୍ତି । ଏଠି ପ୍ରଶ୍ନ ଉଠୁଛି-
ପୁଣି ରକ୍ତମୁଖା ହେଉଛି କି ରକ୍ତଚରିତ୍ର ଗ୍ୟାଙ୍ଗ?
ଅଭିଯୁକ୍ତମାନେ କେମିତି ପାଉଛନ୍ତି ଏତେ ସାହାସ?
ଏହି ରକ୍ତଚରିତ୍ର ଗ୍ୟାଙ୍ଗ ପଛର ମୁଖିଆ କିଏ?
ଜେଲ ଫେରନ୍ତାଙ୍କୁ ନାହିଁ କି ଜେଲର ଭୟ?
କମିସନରେଟ ପୁଲିସକୁ ଭୟ କରୁନାହାନ୍ତି କି ଅପରାଧୀ ?