କନକ ବ୍ୟୁରୋ : ଆଜିଠୁ ବର୍ମିଂହାମରେ ରାଜ୍ୟଗୋଷ୍ଠୀ କ୍ରୀଡା । ୨୦୦ ଖେଳାଳିଙ୍କ ସହ ୩୦୦ ଜଣିଆ ଟିମ୍ ପଠାଇଛି ଭାରତ । ୨୦୧୮ରେ ୬୮ ପଦକ ସହ ତୃତୀୟ ସ୍ଥାନରେ ଥିଲା ଭାରତ । ଏଥର ଆହୁରି ଭଲ ପ୍ରଦର୍ଶନ ଆଶା ରଖିଛି । ନୀରଜ ଚୋପ୍ରା ଆହତ ଯୋଗୁଁ ଓହରିଯିବା ପରେ କିଏ ତ୍ରିରଙ୍ଗା ଧରିବେ ସେ ନେଇ ଭାରତୀୟ ଅଲିମ୍ପିକ୍ ସଂଘ ଅଡୁଆରେ ପଡ଼ିଥିଲା । ତେବେ ତିନି ଜଣଙ୍କ ନାମ କାଣ୍ଟଛାଣ୍ଟ ତାଲିକାରେ ସାମିଲ କରିଥିଲା । ଶେଷରେ ଟୋକିଓ ଅଲିମ୍ପିକ୍ସ ପଦକ ବିଜୟିନୀ ଭାରୋତ୍ତୋଳିକା ମୀରାବାଇ ଚାନୁ ଏବଂ ମୁଷ୍ଟିଯୋଦ୍ଧା ଲଭ୍ଲିନା ବୋର୍ଗୋହାଁଙ୍କ ଅପେକ୍ଷା ସିନ୍ଧୁଙ୍କୁ ଅଧିକ ପସନ୍ଦ କରିଥିଲା ଆଇଓଏ ।
Kanak News is now on WhatsApp
Join and get latest news updates delivered to you via WhatsApp
ବନ୍ଧୁକଚାଳନା ନଥିବାରୁ ଭାରତ ଏଥର କୁସ୍ତି, ଭାରୋତ୍ତୋଳନ, ବ୍ୟାଡମିଣ୍ଟନ୍, ମୁଷ୍ଟିଯୁଦ୍ଧ, ଟେବୁଲ ଟେନିସ୍, ଦୌଡ଼କୁଦ ଭଳି ଖେଳରୁ ପଦକ ଜିତିବାକୁ ଆଶା ରଖିଛି । ବନ୍ଧୁକଚାଳନା ସହ ତୀରନ୍ଦାଜିର ଅନୁପସ୍ଥିତି ମଧ୍ୟ ଭାରତ ପାଇଁ ଏହି କ୍ଷେତ୍ରରେ ଏକ ବଡ଼ ପ୍ରତିବନ୍ଧକ ହୋଇପାରେ। କାରଣ ଏହି ଦୁଇ ଖେଳରୁ ଭାରତ ପାରମ୍ପରିକ ଭାବେ ବହୁ ପଦକ ଜିତିଥାଏ । ଗତ ତିନି ସଂସ୍କରଣ ହେବ ଭାରତ କୁସ୍ତିରୁ ଦୁଇ ଅଙ୍କ ବିଶିଷ୍ଟ ପଦକ ଜିତି ଆସୁଛି । ଅଲିମ୍ପିକ୍ସ ପଦକ ବିଜେତା ବଜରଙ୍ଗ ପୁନିଆଙ୍କ ନେତୃତ୍ବରେ ଭାରତ ଗୋଲ୍ଡକୋଷ୍ଟରେ ୫ ସ୍ୱର୍ଣ୍ଣ ସହ ୧୨ ପଦକ ଜିତିଥିଲା । ଏଥର ବି ଭାରତ କୁସ୍ତିରୁ ୧୦ରୁ ଅଧିକ ପଦକ ଜିତିବାକୁ ଲକ୍ଷ୍ୟ ରଖିଛି । କୁସ୍ତି ଭଳି ଭାରୋତ୍ତୋଳନ ଉପରେ ଭାରତର ଢେର ଆଶା ରହିବ ।
୨୦୧୮ ମସିହାରେ ଭାରତୀୟ ଦଳ ଭାରୋତ୍ତୋଳନରେ ସର୍ବାଧିକ ପଦକ ୫ ସ୍ୱର୍ଣ୍ଣ ସହ ୯ ପଦକ ଜିତିଥିଲା। ଏଥର ଭାରତ ୧୫ ଜଣିଆ ଶକ୍ତିଶାଳୀ ଦଳ ପଠାଇଛି। ଏଣୁ ଗତଥରଠାରୁ ଅଧିକ ପଦକ ଜିତିବା ଆଶାରେ ଅଛି । ଭାରୋତ୍ତୋଳନ ଭଳି ବ୍ୟାଡମିଣ୍ଟନ୍ରେ ମଧ୍ୟ ଭାରତର ଦୃଢ଼ ଆଶା ଥିବ। ବ୍ୟାଡମିଣ୍ଟନ୍ରେ ମଧ୍ୟ ଭାରତ ଗତଥର ପଦକ ତାଲିକାର ଶୀର୍ଷରେ ରହିଥିଲା। ୨୦୧୮ରେ ଭାରତ ବ୍ୟାଡମିଣ୍ଟନରୁ ୨ ସ୍ବର୍ଣ୍ଣ ପଦକ ଜିତିଥିଲା। ପିଭି ସିନ୍ଧୁ, କିଦାମ୍ବି ଶ୍ରୀକାନ୍ତ, ଚିରାଗ ସେଟ୍ଟୀ, ସାତ୍ବିକସାଇରାଜ ରାଙ୍କିରେଡ୍ଡୀଙ୍କ ଭଳି ଖେଳାଳି ଥିବାରୁ ଭାରତ ଏଥର ତା’ଠାରୁ ଅଧିକ ପଦକ ଜିତିବା ଲକ୍ଷ୍ୟରେ ରହିବ । ଅନ୍ୟ ଏକ ବର୍ଗ ମୁଷ୍ଟିଯୁଦ୍ଧରୁ ୩ ସ୍ୱର୍ଣ୍ଣ ସହ ଗତଥର ୯ ପଦକ ଜିତିଥିଲା। ଏଥର ତା’ଠାରୁ ଅଧିକ ପଦକ ଜିତିବା ଆଶାରେ ରହିଛି ।