କନକ ବ୍ୟୁରୋ : ରାଜ୍ୟରେ ଯେତେବେଳେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ଜାରି ରହିଛି, ପ୍ରବଳ ତାତିରେ ଲୋକେ ଆଉଟୁପାଉଟୁ ହେଉଛନ୍ତି, ସେତିକିବେଳେ ଘଣ୍ଟା ଘଣ୍ଟା ବିଜୁଳି କାଟ ଚାଲିଛି । ବିନା ସୂଚନାରେ ଦିନ, ରାତି ଯେତେବେଳେ ଇଛା ହେଲା ସେତେବେଳେ ବିଜୁଳି କାଟୁଛି ବିତରଣ କମ୍ପାନୀ । ଯେଉଁଠି ବିଜୁଳି ରହୁଛି, ସେଥିରୁ ଅନେକ ସ୍ଥାନରେ ଲୋଭୋଲଟେଜ ସମସ୍ୟା ଲାଗି ରହିଛି । ଏକଥାକୁ ଟିପିିସିଓଡିଏଲ ନିଜେ ସ୍ୱୀକାର କରିନଥିଲେ ବି ସାରାରାଜ୍ୟରୁ ଯେଉଁ ଚିତ୍ର ଆସିଛି ତାହା ସମ୍ପୂର୍ଣ୍ଣ ସ୍ଥିତିକୁ ବୟାନ କରୁଛି । ଯାହାକୁ ନେଇ ଉଦବେଗ ପ୍ରକାଶ କରିଛନ୍ତି ବୁଦ୍ଧିଜୀବୀ ।
Kanak News is now on WhatsApp
Join and get latest news updates delivered to you via WhatsApp
ପୂର୍ବ ଓଡିଶାରୁ ପଶ୍ଚିମ ଓଡିଶା, ଉତର ଓଡିଶାରୁ ଦକ୍ଷିଣ ଓଡିଶା, ଉପକୂଳରୁ ଉପାନ୍ତ, ଗାଁରୁ ସହର ସବୁଠି ଦେଖିବାକୁ ମିଳୁଛି ଏମିତି ସମସ୍ୟା । ପୂର୍ବରୁ କୌଣସି ସୂଚନା ନଥାଇ ଘଂଟା ଘଂଟା ଧରି ବିଦ୍ୟୁତ୍ କାଟି ଦିଆଯାଉଛି । ରାଜ୍ୟରେ ଗ୍ରୀଷ୍ମ ପ୍ରବାହ ଜାରି ରହିଥିବାବେଳେ ବିଜୁଳି କାଟି ଦିଆଯିବାରୁ ଲୋକେ ଘାଂଟି ହେଉଛନ୍ତି । ଯଦି ପାୱାର ରହୁଛି, ତାହେଲେ ଲୋକେ ଲୋଭୋଲଟେଜ୍ ସମସ୍ୟାରେ ଘାଂଟି ହେଉଛନ୍ତି । କେଉଁଠି ଫ୍ୟାନ ବୁଲୁନି ତ ଆଉ କେଉଁଠି ଦେଖାଯାଉନି ଲାଇଟ୍ ।
ଆଗକୁ ଆସୁଛି ଉଭୟ ଦଶମ ଓ ଦ୍ୱାଦଶ ପରୀକ୍ଷା । କିନ୍ତୁ ବାରମ୍ବାର ପାୱାର କଟ୍ ପିଲାଙ୍କ ପାଠପଢ଼ାରେ ବାଧା ସୃଷ୍ଟି କରିଛି । ଯାହା ଫଳରେ ଛାତ୍ରଛାତ୍ରୀମାନେ କ୍ୟାଣ୍ଡେଲ ଲଗାଇ ନହେଲେ ଡିବିରି ଆଲୁଅରେ ପାଠ ପଢ଼ିବାକୁ ବାଧ୍ୟ ହେଉଛନ୍ତି । ବିଦ୍ୟୁତ୍ ଶକ୍ତି ଉତ୍ପାଦନରେ ଓଡିଶା ବଳକା ରାଜ୍ୟ । ବିଦ୍ୟୁତ ସଂସ୍କାରରେ ମଧ୍ୟ ଦେଶର ପ୍ରଥମ ରାଜ୍ୟ ଓଡିଶା । ହେଲେ, ଏପର୍ଯ୍ୟନ୍ତ ବିଦ୍ୟୁତ୍ କାଟ ଓ ଲୋଭୋଲଟେଜ୍ ସମସ୍ୟାରେ ସୁଧାର ନଆସିବା ଓ ରାଜ୍ୟରେ ଗ୍ରୀଷ୍ମ ପ୍ରବାହ ଜାରି ରହିଥିବାବେଳେ ଅଘୋଷିତ ବିଦ୍ୟୁତ୍ କାଟ ହେଉଥିବାରୁ ଅସନ୍ତୋଷ ବଢ଼ିବାରେ ଲାଗିଛି । ଏଥିପାଇଁ ବଦ୍ୟୁତ୍ ଉତ୍ପାଦନ ଓ ବିତରଣ କମ୍ପାନୀର ପରିଚାଳନାଗତ ତ୍ରୁଟିକୁ ଦାୟୀ କରିଛନ୍ତି ଉପଭୋକ୍ତା ସଂଘ ଓ ବିଭିନ୍ନ ସଂଗଠନ ।
ଏପ୍ରିଲ ମାସରୁ ରାଜ୍ୟବ୍ୟାପୀ ବିଦ୍ୟୁତ୍ କାଟର ଚିତ୍ର ଆସୁଥିଲେ ବି ଏହାକୁ ସ୍ୱୀକାର କରିନାହାଁନ୍ତି ଟିପିିସିଓଡିଏଲ ଅଧିକାରୀ । ବରଂ ଲୋଭୋଜେଟ୍ ସମସ୍ୟାର ସମାଧାନ ପାଇଁ ଚାଲିଥିବା ମରାମତି ଯୋଗୁଁ କେତେକ ସ୍ଥାନରେ ସାମୟିକ ସମୟ ପାଇଁ ବିଦ୍ୟୁତ୍ କାଟ କରାଯାଉଥିବା ସଫେଇ ରଖିଛନ୍ତି । କିନ୍ତୁ ଦେଶର ବିଭିନ୍ନ ରାଜ୍ୟରେ ବିଦ୍ୟୁତ୍ ଉତ୍ପାଦନରେ ଯେଉଁ ସଂକଟ ଦେଖାଦେଇଛି ତାହା ଜାରି ରହିଲେ ଆଗକୁ ବିଦ୍ୟୁତ୍ କାଟ ହେବାର ଆଶଙ୍କା ରହିଛି ।