କେନ୍ଦ୍ର ଜଳ କମିସନଙ୍କ ଉଚ୍ଚସ୍ତରୀୟ ବୈଠକରେ ବର୍ଷିଲେ ସାଂସଦ ସୁବାସ ସିଂହ : ମହାନଦୀ ଜଳ ବିବାଦ ପ୍ରସଙ୍ଗରେ ପାତର ଅନ୍ତର ଅଭିଯୋଗ ଆଣି ତୀବ୍ର ଅସନ୍ତୋଷ ପ୍ରକାଶ କଲେ
କହିଲେ ଛତିଶଗଡର ଦାବି ଶୁଣୁଛନ୍ତି କମିସନ, ଓଡିଶାକୁ କରାଯାଉଛି ଅଣଦେଖା
କନକ ବ୍ୟୁରୋ : କେନ୍ଦ୍ର ଜଳ କମିସନ୍ ଉଚ୍ଚସ୍ତରୀୟ ବୈଠକରେ ମହାନଦୀ ପ୍ରସଙ୍ଗରେ ଛତିଶଗଡ ଉପରେ ବର୍ଷିଛନ୍ତି ରାଜ୍ୟ ସଭା ସାଂସଦ ସୁବାସ ସିଂହ । ସଂସଦ ଭବନ ଆନେକ୍ସରେ ହୋଇଥିବା ଉଚ୍ଚସ୍ତରୀୟ ବୈଠକରେ ଛତିଶଗଡର ଷଡଯନ୍ତ୍ରକୁ ନେଇ ତୀବ୍ର ପ୍ରତିବାଦ କରିଛନ୍ତି । ଏଥିସହ ଛତିଶଗଡ କଥାକୁ ଜଳ କମିସନ ଗୁରୁତ୍ୱ ଦେଉଥିବା ବେଳେ ଓଡିଶା କଥାକୁ କାହିଁକି ଭୁଲି ଯାଉଛନ୍ତି ବୋଲି ପ୍ରଶ୍ନ ଉଠାଉଛନ୍ତି ରାଜ୍ୟସଭା ସାଂସଦ ।
Kanak News is now on WhatsApp
Join and get latest news updates delivered to you via WhatsApp
ହୀରାକୁଦ ଜଳଭଣ୍ଡାରର ତ୍ରୁଟିପୂର୍ଣ୍ଣ ପରିଚାଳନା ପାଇଁ ଛତିଶଗଡର ଚାଷଜମିରେ କୋଟି କୋଟି ଟଙ୍କାର ଫସଲ କ୍ଷୟକ୍ଷତି ହୋଇଥିବା ଅଭିଯୋଗ ଆସିଛି । ଏନେଇ ଓଡିଶା ଜଳସଂପଦ ବିଭାଗକୁ କୈଫୟତ ମାଗି ଚିଠି ଲେଖିଛି ସେଂଟ୍ରାଲ ୱାଟର କମିସନ୍ । ଯାହାକୁ ତୀବ୍ର ବିରୋଧ କରିଛନ୍ତି ରାଜ୍ୟସଭା ସାଂସଦ ସୁବାସ ସିଂହ । ଅଣ-ମୌସୁମୀ ସମୟରେ ଓଡିଶା ମହାନଦୀରେ ଜଳସ୍ରୋତ ହ୍ରାସ ପାଇବା ସଂପର୍କରେ କାହିଁକି ଛତିଶଗଡକୁ ଚିଠି ଲେଖାଯାଉ ନାହିଁ ବୋଲି ପ୍ରଶ୍ନ କରିଥିଲେ ସାଂସଦ ସୁବାସ ସିଂହ । ଏହାଛଡା ଛତିଶଗଡ ଶହ ଶହ ଚେକଡ୍ୟାମ ଓ ନଦୀବନ୍ଧ ପ୍ରକଳ୍ପ ଚାଲିଥିବା ବେଳେ କେନ୍ଦ୍ର ଜଳ କମିସନ ଓଡିଶାକୁ କାହିଁକି ଅନ୍ଧାରରେ ରଖୁଛନ୍ତି ।
ଏହାର ଉତର ସିଡବ୍ଲୁସି ଦେବା ନିହାତି ଜରୁରୀ ବୋଲି କହିଛନ୍ତି ରାଜ୍ୟସଭା ସାଂସଦ ସୁବାସ ସିଂହ । ବୈଠକରେ ସମସ୍ତ ଉଚ୍ଚ ଅଧିକାରୀଙ୍କ ସମେତ କେନ୍ଦ୍ର ଜଳ ସଂପଦ କମିଶନର ଉପସ୍ଥିତ ଥିଲେ । ଟ୍ରିବ୍ୟୁନାଲର ବୈଠକ ୩୯ ଥର ବସିଥିବା ବେଳେ ଏଭଳି ଚିଠି ଓଡିଶାକୁ ଦେବା ଠିକ୍ ନୁହେଁ, ଏହାର ପୁଙ୍ଖାନୁପୁଙ୍ଖ ତଦନ୍ତ କରି ଲିଖିତ ଭାବେ ସଠିକ ବିବରଣୀ ଦେବାକୁ ସାଂସଦ ଦାବି କରିଛନ୍ତି ।