କନକ ବ୍ୟୁରୋ :ଚର୍ଚ୍ଚ ପାଇଁ ଗୋଟିଏ ନିୟମ, ରାଜନୈତିକ ଦଳଙ୍କ ପାଇଁ ଆଉ ଗୋଟିଏ ନିୟମ । ଏପଟେ ଓମିକ୍ରନ ସଂକ୍ରମଣ ଭୟରେ କଟକଣା ଲଗାଇଛନ୍ତି ସରକାର । ରାଲି, ଶୋଭାଯାତ୍ରା ଓ ସାଂସ୍କୃତିକ କାର୍ଯ୍ୟକ୍ରମ ଉପରେ ଅଂକୁଶ ଲଗାଯାଇଛି । ହେଲେ ସେପଟେ ପୂର୍ବତନ ପ୍ରଧାନମନ୍ତ୍ରୀ ଅଚଳବିହାରୀ ବାଜପେୟୀଙ୍କ ଜୟନ୍ତୀରେ ବିଜେପି ପାଳନ କରୁଛି ସୁଶାସନ ଦିବସ । ଶହଶହ କର୍ମୀଙ୍କୁ ଧରି ନେତା ଭୁବନେଶ୍ୱର ଶିଶୁପାଳ ଗଡରେ ଶକ୍ତି ପ୍ରଦର୍ଶନ କରୁଛନ୍ତି । ସେପଟେ ବିଜେପିର କାର୍ଯ୍ୟକ୍ରମକୁ କାଉଣ୍ଟର କରିବା ପାଇଁ ବିଜେଡି କରୁଛି ତେଲ ଦର ବୃଦ୍ଧି ପ୍ରତିବାଦରେ ଆନ୍ଦୋଳନ ।
Kanak News is now on WhatsApp
Join and get latest news updates delivered to you via WhatsApp
ଏଠି ପ୍ରଶ୍ନ ଉଠୁଛି, ରାଜନୈତିକ ଦଳର ସମାବେଶ, ପ୍ରତିବାଦ ସଭାରେ କଣ ଓମିକ୍ରନ ବ୍ୟାପିବ ନାହିଁ କି? ଏଭଳି ସମାବେଶ ଓ ପ୍ରତିବାଦ ଆଳରେ କାହିଁକି ସାଧାରଣ ଲୋକଙ୍କ ଜୀବନକୁ ବିପଦ ମୁହଁକୁ ଠେଲୁଛନ୍ତି ରାଜନୈତିକ ଦଳର ନେତା । ଆଉ ସବୁଠୁ ବଡ କଥା ହେଲା, ଓମିକ୍ରନ ଦ୍ରୁତ ଗତିରେ ବ୍ୟାପୁଥିବା ବେଳେ ମାସ୍କ ପିନ୍ଧିବା ଉପରେ ଅଧିକ ଗୁରୁତ୍ୱ ଦିଆଯାଉଛି । କିନ୍ତୁ ରାଜନୈତିକ ଦଳର ପଦଯାତ୍ରା ଓ ପ୍ରତିବାଦ ସଭାରେ ଅଧିକାଂଶ ନେତାଙ୍କ ମୁହଁରେ ମାସ୍କ ରହୁନାହିଁ । ଏଭଳି କରି ସାଧାରଣ ଲୋକଙ୍କୁ କରୋନା ଗାଇଡଲାଇନ ଉଲ୍ଲଂଘନ କରିବାକୁ ପରୋକ୍ଷରେ ବାର୍ତ୍ତା ଦେଉନାହାନ୍ତି କି ରାଜନୈତିକ ଦଳର ନେତା । ଯଦି ସାଧାରଣ ଲୋକଙ୍କ ପାଇଁ ନିୟମ, ତେବେ ନେତାଙ୍କ ପାଇଁ କାହିଁକି ନୁହେଁ । ଏମାନଙ୍କ ବିରୋଧରେ କଣ କାର୍ଯ୍ୟାନୁଷ୍ଠାନ ନେବ ପ୍ରଶାସନ?