ଥାନାରେ କାମୁଡିଦେଲା ସାପ । ଚାଲିଗଲା ୨ ବର୍ଷର ଶିଶୁର ଜୀବନ ।
କନକ ବ୍ୟୁରୋ: ଥାନାରେ କାମୁଡିଦେଲା ସାପ । ଆଉ ସାପ କାମୁଡିବାରୁ ଜଣେ ୨ ବର୍ଷ ଶିଶୁର ମୃତ୍ୟୁ ହୋଇଥିବା ଅଭିଯୋଗ ହୋଇଛି । ପୁରୀ ଜିଲ୍ଲା ଅସ୍ତରଙ୍ଗ ଥାନାରେ ଏଭଳି ଅଭାବନୀୟ ଘଟଣା ଘଟିଛି ।
Kanak News is now on WhatsApp
Join and get latest news updates delivered to you via WhatsApp
ଖବର ଅନୁସାରେ, ଅସ୍ତରଙ୍ଗ ବ୍ଲକ ନଗର ପଞ୍ଚାୟତ ବାଲିଡିଆ ଗାଁର ଆଶା ବେହେରା ପାରିବାରିକ ଝାମେଲାକୁ ନେଇ ଅସ୍ତରଙ୍ଗ ଥାନାକୁ ଅଭିଯୋଗ କରିବାକୁ ଆସିଥିଲେ । ଥାନା ପରିସରରେ ବସିଥିବାବେଳେ ଆଶାଙ୍କ ୨ ବର୍ଷର ଶିଶୁପୁତ୍ର ଖେଳୁଥିଲେ । ଏହି ସମୟରେ ଶିଶୁକୁ ଏକ ବିଷାକ୍ତ ଜନ୍ତୁ କାମୁଡି ଦେଇଥିଲା । ପରେ ଶିଶୁର ମୃତ୍ୟୁ ହୋଇଥିଲା । ପୂର୍ବରୁ ଆଶାଙ୍କ ଶାଶୁ ଘର ଲୋକଙ୍କ ସହ ମନୋମାଳିନ୍ୟ ଥିଲା । ଗାଁ ଲୋକଙ୍କ ଆପୋଷ ସମାଧାନରେ ସେ ଚଳୁଥିଲେ । କିନ୍ତୁ ପୁଣି ବିବାଦ ହେବାରୁ ଅସ୍ତରଙ୍ଗ ଥାନାର ଦ୍ୱାରସ୍ଥ ହୋଇଥିଲେ । ନ୍ୟାୟ ପାଇବାରେ ବିଳମ୍ବ ହେବା ଅଭିଯୋଗ କରି ସୋମବାର ସକାଳେ ୨ ଛୁଆଙ୍କୁ ଧରି ଥାନାରେ ବସିଥିଲେ । ଏହି ସମୟରେ ତାଙ୍କ ୨ ବର୍ଷର ଶିଶୁଙ୍କୁ ଅଜଣା ଜନ୍ତୁ କାମୁଡି ଦେଇଥିଲା । ପରେ ଶିଶୁକୁ ପ୍ରଥମେ ଅସ୍ତରଙ୍ଗ ସ୍ୱାସ୍ଥ୍ୟକେନ୍ଦ୍ର ଓ ପରେ ଭୁବନେଶ୍ୱର କ୍ୟାପିଟାଲ ହସପିଟାଲ ଅଣାଯାଇଥିଲା । ତେବେ ଏଠାରେ ଶିଶୁର ମୃତ୍ୟୁ ହୋଇଛି ।
ଖବର ପରେ ମୃତକ ଶିଶୁର ସମ୍ପର୍କୀୟ ଥାନା ଫାଟକ ସମ୍ମୁଖରେ ଧାରଣା ଦେଇଥିଲେ । ଏହାକୁ ନେଇ ସେଠାରେ ଉତେଜନା ପ୍ରକାଶ ପାଇଥିଲା । ଘଟଣାରେ ମାମଲା ରୁଜୁ କରାଯିବା ସହ ତଦନ୍ତ ଆରମ୍ଭ ହୋଇଛି।