ଏସିଆ କପ୍ ଆୟରୁ ଗୋଟିଏ ବି ଟଙ୍କା ନିଏନି ବିସିସିଆଇ । ବଡ ଖୁଲାସା କଲେ ପୂର୍ବତନ କ୍ରିକେଟର । ଜାଣନ୍ତୁ, ସେ କଣ କହିଲେ…
କନକ ବ୍ୟୁରୋ: ଚଳିତ ବର୍ଷର ଏସିଆ କପ୍ ଆୟୋଜନକୁ ନେଇ ଲାଗି ରହିଥିବା ବିବାଦ ଏବେ ଶେଷ ହୋଇସାରିଛି । ଏସିସିର ନିଷ୍ପତ୍ତି ମୁତାବକ ଏଥର ଏସିଆ କପର କିଛି ମ୍ୟାଚ୍ ପାକିସ୍ତାନ ଏବଂ ବାକି ମ୍ୟାଚ୍ ଶ୍ରୀଲଙ୍କାରେ ଖେଳାଯିବ । ତେବେ ଏଥର ଏସିଆ କପ୍ ଆୟୋଜନ ପାକିସ୍ତାନ ପାଖରେ ଥିଲା, ହେଲେ ଟିମ୍ ଇଣ୍ଡିଆ ପାକିସ୍ତାନ ଯିବାକୁ ମନା କରିଦେବାରୁ, ଏହାକୁ ନେଇ ବିବାଦ ଠିଆ ହେଇଥିଲା । ହେଲେ ଏହି ବିବାଦ ଥମିବା ପରେ, ଏସିଆ କପକୁ ନେଇ ପୂର୍ବତନ କ୍ରିକେଟର ଏକ ରୋମାଞ୍ଚକର କଥା ସାମ୍ନାକୁ ଆଣିଛନ୍ତି । ତାଙ୍କ କହିବା ମୁତାବକ, ଏସିଆ କପ୍ ଆୟୋଜନରୁ ଯେତିକି ବି ଟଙ୍କା ରୋଜଗାର ହେଇଥାଏ, ସେହି ଟଙ୍କାକୁ ଗ୍ରହଣ କରିନଥାଏ ବିସିସିଆଇ ।
Kanak News is now on WhatsApp
Join and get latest news updates delivered to you via WhatsApp
ଟିମ୍ ଇଣ୍ଡିଆର ପୂର୍ବତନ କ୍ରିକେଟର ତଥା କ୍ରିକେଟ୍ ଭାଷ୍ୟକାର ଆକାଶ ଚୋପଡା ନିଜ ୟୁଟ୍ୟୁବ୍ ଚାନେଲରେ ଖୁଲାସା କରି କହିଛନ୍ତି ଯେ, ଶେଷରେ ଏସିଆ କପ୍ ବିବାଦ ଶେଷ ହେଇଗଲା । ହେଲେ ଗୋଟିଏ କଥା କହି ରଖିବାକୁ ଚାହେଁ ଯେ, ଏସିଆ କପ୍ ଇତିହାସରେ ଯେତେବେଳେ ଏସିଆ କପ୍ ହେଇଛି, ଆଉ ସେଥିରୁ ଯେତିକି ରୋଜଗାର ହେଇଛି । ସେ ମଧ୍ୟରୁ ବିସିସିସିଆଇ ଗୋଟିଏ ଟଙ୍କା ବି ନିଜେ ରଖିନି । ଏସିଆ କପର ଆୟ ମୁଖ୍ୟତଃ ପ୍ରସାରଣରୁ ହିଁ ଆସିଥାଏ । ହେଲେ ବିସିସିଆଇ କିନ୍ତୁ ଏହି ଟଙ୍କାକୁ ନିଜ ପାଖରେ ରଖିନଥାଏ ବୋଲି ଖୁଲାସା କରିଛନ୍ତି ଆକାଶ ଚୋପଡା ।
ସେ ଆହୁରି ମଧ୍ୟ କହିଛନ୍ତି ଯେ, ଅନ୍ୟ ଦେଶମାନଙ୍କରେ ଏସିଆ କପ୍ ଆୟୋଜନ ହେଲେ, ଏହାର ପ୍ରସାରଣ ଟଙ୍କା ତାଙ୍କ ପାଖରେ ରହିଥାଏ । ହେଲେ ଭାରତ ଭାଗରେ ରହୁଥିବା ଟଙ୍କାକୁ କିନ୍ତୁ ସେ ନିଜେ ନରଖି , ଏସିସିକୁ ପ୍ରଦାନ କରିଥାଏ । ଏହି ଟଙ୍କାରେ ଅନ୍ୟ ଦେଶରେ କ୍ରିକେଟ୍ କେମିତି ଉନ୍ନତି କରିବ, ସେଇ କଥାକୁ ଦୃଷ୍ଟିରେ ରଖି ବିସିସିଆଇ ଏପରି କରିଆସୁଛି ବୋଲି ଆକାଶ ଚୋପଡା କହିଛନ୍ତି ।
ସୂଚନାଯୋଗ୍ୟ ଯେ, ବିଶ୍ୱର ସବୁଠୁ ଧନୀ କ୍ରିକେଟ୍ ବୋର୍ଡ ହେଉଛି ବିସିସିଆଇ । ରିପୋର୍ଟ ମୁତାବକ, ବିସିସିଆଇର ନେଟୱର୍ଥ ହେଉଛି ୨ ବିଲିୟନ୍ ଡଲାର । ଯାହାକି ଭାରତୀୟ ଟଙ୍କାରେ ଦେଖିବାକୁ ଗଲେ ୧୬ ହଜାର କୋଟି । ବିସିସିଆଇ ସବୁଠୁ ଅଧିକ ଆୟ କରିଥାଏ ଇଣ୍ଡିଆନ୍ ପ୍ରିମିୟର ଲିଗ୍ ମାଧ୍ୟମରେ । ଯେଉଁ କାରଣରୁ ଏସିଆ କପ୍ ଭଳି ଟୁର୍ଣ୍ଣାମେଣ୍ଟରୁ ବିସିସିଆଇକୁ ଯଥେଷ୍ଟ ଟଙ୍କା ମିଳୁଥିଲେ ବି, ଏହାକୁ ଏସିସିକୁ ଦେଇ ଦେଇଥାଏ ବିସିସିଆଇ ।