କନକ ବ୍ୟୁରୋ: ଇଭିଏମ ଭଙ୍ଗା ଓ ପ୍ରଶାନ୍ତ ଜଗଦ୍ଦେବ ଗିରଫ ଘଟଣାରେ ମୁହାଁମୁହିଁ ହୋଇଛନ୍ତି ଅପରାଜିତା ଓ ବିଜେଡି । ଆଜି ସାମ୍ବାଦିକ ସମ୍ମିଳନୀ କରି ରାଜ୍ୟ ସରକାରଙ୍କ ଉପରେ ବର୍ଷିବା ପରେ ଦୁଇଟି ଭିଡିଓ ଜାରି କରିଛନ୍ତି ଭୁବନେଶ୍ୱର ସାଂସଦ । ଇଭିଏମ ଭଙ୍ଗା ଘଟଣାରେ ଜଗଦ୍ଦେବଙ୍କ କୌଣସି ସମ୍ପୃକ୍ତି ନଥିବା ଏକପ୍ରକାର ପ୍ରମାଣ ଦେବାକୁ ଚେଷ୍ଟା କରିଛନ୍ତି ଅପରାଜିତା । ସେପଟେ ବିଜେଡି କିନ୍ତୁ ଜଣେ ଅପରାଧୀଙ୍କୁ, ଅପରାଜିତା ପ୍ରଶଂସା କରୁଥିବା କହି ପାଲଟା କଟାକ୍ଷ କରିଛି । ଏହାରି ଭିତରେ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ଜିଲ୍ଲା ନିର୍ବାଚନ ଅଧିକାରୀଙ୍କୁ ଚିଠି ଲେଖିଛନ୍ତି । ଘଟଣାର ଅନୁଧ୍ୟାନ କରିବା ସହ ସତ୍ୟସତ୍ୟ ସାମନାକୁ ଆଣିବା ପାଇଁ ନିର୍ଦ୍ଦେଶ ଦେଇଛନ୍ତି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ବୁଥ ଭିତରେ ଇଭିଏମ ଭାଙ୍ଗିବା ଅଭିଯୋଗ ଘଟଣା ନେଇ ଯେଉଁ ଦମ୍ଭରେ ଆସି ଅପରାଜିତା ଷଡ଼ଙ୍ଗୀ ସାମ୍ବାଦିକ ସମ୍ମିଳନୀ କଲେ ଏବଂ ସିସିଟିଭି ସାମ୍ନାକୁ ଆଣିବାକୁ ଆହ୍ୱାନ ଦେଲେ । ସେଇ ଦମ୍ଭରେ ଏହାର କିଛି ସମୟ ପରେ ଦୁଇଟି ସିସିଟିଭି ଫୁଟେଜ୍ ମଧ୍ୟ ଜାରି କରିଥିଲେ । ଏହି ଭିଡିଓରେ ଖୋର୍ଦ୍ଦା ବିଜେପି ବିଧାୟକ ପ୍ରାର୍ଥୀ ପ୍ରଶାନ୍ତ ଜଗଦ୍ଦେବ ସ୍ପଷ୍ଟ ଦେଖା ଯିବା ସହ ବୁଥ ଭତରେ ଥିବା ତାଙ୍କ କାର୍ଯ୍ୟକଳାପ ଓ ଭାବଭଙ୍ଗି ମଧ୍ୟ ଦେଖାଯାଉଥିଲା । ଏମିତି କି ଆଉ ଏକ ଭିଡିଓରେ ଇଭିଏମ୍ ପଡ଼ିବାର ଶବ୍ଦ ମଧ୍ୟ ସ୍ପଷ୍ଟ ଶୁଣାଯାଉଛି ।
ଇଭିଏମ୍ ଭାଙ୍ଗିବା ଅଭିଯୋଗରେ ବିଧାୟକ ପ୍ରଶାନ୍ତ ଜଗଦେବଙ୍କୁ ଗିରଫ କରାଯାଇଥିବାବେଳେ, ତାଙ୍କର କୌଣସି ଭୁମିକା ନଥିବା କହିବା ସହ ସିସିଟିଭି ଫୁଟେଜ ଜାରି କରି ସରକାରଙ୍କୁ ଘେରିଛନ୍ତି ଅପରାଜିତା । ସିସିଟିଭିର ଯାଂଚ ନକରି ଜଣେ ବିଧାୟକଙ୍କୁ କିଭଳି ଗିରଫ କରାଗଲା ବୋଲି ସେ ପ୍ରଶ୍ନ ଉଠାଇଛନ୍ତି । ସେପଟେ ଅପରାଜିତା ଜଣେ ଅପରାଧୀଙ୍କୁ ପ୍ରଶଂସା କରୁଥିବା କହି କଟାକ୍ଷ କରିଛନ୍ତି ବିଜେଡି ସାଂସଦ ସସ୍ମିତ ପାତ୍ର ।
ରାଜନୈତିକ ବୟାନବାଜି ଭିତରେ ଖୋର୍ଦ୍ଧା ଏସପି କହିଛନ୍ତି-ସିସିଟିଭି ପାଇଁ ଆବେଦନ କରାଯାଇଛି କିନ୍ତୁ ବର୍ତମାନ ପର୍ଯ୍ୟନ୍ତ ଆସି ନାହିଁ । ସେପଟେ ମନଗଢ଼ା କାହାଣୀ କୁହାଯାଉଥିବା ଅଭିଯୋଗ କରିଛନ୍ତି ପ୍ରଶାନ୍ତ ଜଗଦ୍ଦେବଙ୍କ ଓକିଲ ।
ପ୍ରଶାନ୍ତଙ୍କ ଗିରଫଦାରୀକୁ ନେଇ ବିବାଦ ବଢ଼ୁଥିବାବେଳେ, ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ଜିଲ୍ଲା ନିର୍ବାଚନ ଅଧିକାରୀଙ୍କୁ ଚିଠି ଲେଖିଛନ୍ତି । ଘଟଣାର ଅନୁଧ୍ୟାନ କରିବା ସହ ସତ୍ୟସତ୍ୟ ସାମନାକୁ ଆଣିବା ପାଇଁ ନିର୍ଦ୍ଦେଶ ଦେଇଛନ୍ତି ।