ଭାରତରେ ଉପଲବ୍ଧ କରୋନା ଟିକା କେତେ ସୁରକ୍ଷିତ ଓ କେତେ ପ୍ରଭାବୀ ? ଅଶ୍ୱିନୀ ସ୍ୱାସ୍ଥ୍ୟ ସମ୍ମିଳନୀରେ ବିଶଦ ଭାବେ ଆଲୋଚନା କଲେ ରାଜ୍ୟର ପ୍ରମୁଖ ପ୍ରଶାସନିକ କର୍ମକର୍ତ୍ତା, ଡାକ୍ତର ଓ ଗଣମାଧ୍ୟମ ପ୍ରତିନିଧି ।
କନକ ବ୍ୟୁରୋ : ଗୋଟିଏ ପଟେ ଦେଶରେ ବଢ଼ୁଛି କୋଭିଡ଼ ସଂକ୍ରମଣ । ଅନ୍ୟପଟେ କରୋନା ଓ ଟିକାକୁ ନେଇ ଏବେ ମଧ୍ୟ ସାଧାରଣ ଲୋକଙ୍କ ମଧ୍ୟରେ ଦ୍ୱନ୍ଦ୍ୱ ରହିଛି । ସେହିପରି ଭାରତରେ ଉପଲବ୍ଧ ଟିକା କେତେ ସୁରକ୍ଷିତ ଓ କେତେ ପ୍ରଭାବୀ ସେ ସମ୍ପର୍କରେ ଲୋକଙ୍କ ପାଖରେ ସଠିକ ତଥ୍ୟ ନାହିଁ । ଏଭଳି ପ୍ରସଙ୍ଗରେ ଅଶ୍ୱିନୀ ହସ୍ପିଟାଲର ସ୍ୱାସ୍ଥ୍ୟ ସମ୍ମିଳନୀରେ ବିଶଦ ଭାବେ ଆଲୋଚନା କରିଥିଲେ ରାଜ୍ୟର ପ୍ରମୁଖ ପ୍ରଶାସନିକ କର୍ମକର୍ତ୍ତା, ଡାକ୍ତର ଓ ଗଣମାଧ୍ୟମ ପ୍ରତିନିଧି ।
Kanak News is now on WhatsApp
Join and get latest news updates delivered to you via WhatsApp
ଅଶ୍ୱିନୀ ହସ୍ପିଟାଲର ୧୫ ବର୍ଷ ପୂର୍ତ୍ତି ଅବସରରେ ଗତ ଶନିବାରରେ ଅୟୋଜନ କରାଯାଇଥିବା ଅଶ୍ୱିନୀ ସ୍ୱାସ୍ଥ୍ୟ ସମ୍ମିଳନୀରେ ରାଜ୍ୟର ବହୁ ବିଶିଷ୍ଠ ଚିକିତ୍ସକ ଯୋଗଦେଇ ଏସମ୍ପର୍କରେ ମତାମତ ରଖିଛନ୍ତି । ଏଥିରେ ଅଶ୍ୱିନୀ ହସ୍ପିଟାଲର ଛାତିରୋଗ ବିଶେଷଜ୍ଞ ଡାକ୍ତର ସମ୍ପତ ଦାଶ କହିଛନ୍ତି, ନୂଆ ଷ୍ଟ୍ରେନକୁ ରୋକିବା ପାଇଁ ଆମକୁ ସଂକ୍ରମଣ ହାରକୁ କମାଇବାକୁ ପଡିବ । କରୋନା ପାଇଁ ଥିବା ନିୟମାବଳୀକୁ ମାନିବାକୁ ହେବ ।
ଏସସିବି ମେଡିକାଲ କଲେଜର ମେଡିସିନ ବିଭାଗ ମୁଖ୍ୟ ଡାକ୍ତର ଜୟନ୍ତ ପଣ୍ଡାଙ୍କ କହିବା ହେଲା, ପରିବର୍ତ୍ତିତ ଷ୍ଟ୍ରେନ ମହାମାରୀର ଏକ ଅଂଶ । ଭୂତାଣୁ ଜୀବିତ ରହିବା ପାଇଁ ଷ୍ଟ୍ରେନ ପରିବର୍ତନ କରେ । ଟିକା ନେବା ସହ କରୋନା ମାର୍ଗଦର୍ଶିକା ପାଳନ କଲେ ଏହାର ମୁକାବିଲା ହୋଇପାରିବ । ସେପଟେ ଆତ୍ମସନ୍ତୁଷ୍ଟି ଯୋଗୁଁ କୋଭିଡ ପୁଣି ଫେରିଥିବା ମତ ରଖିଛନ୍ତି ଜନସ୍ୱାସ୍ଥ୍ୟ ବିଭାଗର ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର ।
ତେବେ କରୋନା ମୁକାବିଲା ପାଇଁ ଟିକାକରଣ ଉପରେ ଗୁରୁତ୍ୱ ଦେଇଛନ୍ତି ବିଶେଷଜ୍ଞ ଡାକ୍ତର । ଆମ୍ରି ହସପିଟାଲର ଡାକ୍ତର ସମୀର ସାହୁ କହିଛନ୍ତି, ଟିକାକରଣର ବ୍ୟାପକ ପ୍ରଚାରପ୍ରସାର ହେବା ଦରକାର । ଟିକାକୁ ନେଇ କୌଣସି ଦ୍ୱନ୍ଦ୍ୱ ରହିବା ଅନୁଚିତ ବୋଲି କହିଛନ୍ତି ଆରଏମଆରସିର ନିର୍ଦ୍ଦେଶିକା ଡାକ୍ତର ସଂଘମିତ୍ରା ପତି । ସମ୍ମିଳନୀରେ କୋଭିଡ ସମୟରେ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇଥିବା ରାଜ୍ୟ ପ୍ରଶାସନର ବରିଷ୍ଠ ଅଧିକାରୀ ଓ ଡାକ୍ତରମାନଙ୍କୁ କୋଭିଡ ଯୋଦ୍ଧା ଭାବେ ସମ୍ମାନିତ କରାଯାଇଥିଲା ।