ସୁବର୍ଣ୍ଣରେଖାରେ ଆସୁଛି ବଡ଼ ବନ୍ୟା । ଗାଲୁଡିହ ଡ୍ୟାମର ସବୁ ଗେଟ୍ ଖୋଲିଦେଲା ଝାଡ଼ଖଣ୍ଡ । ବିପଦ ସଙ୍କେତ ଉପରେ ଉଛୁଳିଲା ଜଳସ୍ତର ।
କନକ ବ୍ୟୁରୋ: ଉପକୂଳ ଓଡିଶାର ଲୋକେ ବନ୍ୟାର ଦୁର୍ଦ୍ଦଶାରୁ ମୁକୁଳି ନାହାନ୍ତି । ସେପଟେ ଉତ୍ତର ଓଡିଶାରେ ବଡ ବନ୍ୟା ଆଶଙ୍କା ଲୋକଙ୍କୁ ଡରାଇଲାଣି । ଝାଡଖଣ୍ଡ ଗାଲୁଡିହ ଡ୍ୟାମରୁ ୧୮ଟି ଗେଟ୍ ଦେଇ ୭ ଲକ୍ଷ କ୍ୟୁସେକ ଜଳ ସୁବର୍ଣ୍ଣରେଖା ନଦୀରେ ଓଡିଶା ଆସୁଛି । ଯାହା ବାଲେଶ୍ୱର ଓ ମୟୂରଭଞ୍ଜ ଜିଲ୍ଲାର ନଦୀ ଅବବାହିକାରେ ଥିବା ଅଞ୍ଚଳରେ ତାଣ୍ଡବ ରଚାଇପାରେ । ଯାହା ଫଳରେ ଆଜି ରାତିରେ ତଳିଆ ଅଞ୍ଚଳ ଜଳମଗ୍ନ ହେବ ବୋଲି ଆକଳନ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଯେତିକି ଜୋରରେ ଗର୍ଜନ କରି ଝାଡ଼ଖଣ୍ଡ ଗାଲୁଡ଼ିହ ଡ୍ୟାମରୁ ପାଣି ନିଷ୍କାସନ ହେଉଛି, ସେତିକି ଭୟ ବଢ଼ୁଛି ବାଲେଶ୍ୱର ଓ ମୟୂରଭଞ୍ଜର ତଳିଆ ଅଞ୍ଚଳରେ । ଗତକାଲି ଠାରୁ ଗୋଟିଏ ପରେ ଗୋଟିଏ ପରେ ୧୮ଟି ଗେଟ୍ ଖୋଲି ଦେଇଛି ଝାଡ଼ଖଣ୍ଡ ଆଉ ଗର୍ଜନ କରି ତଳ ମୁଣ୍ଡକୁ ପାଣି ମାଡିଆସୁଛି । ପାଖାପାଖି ୭ ଲକ୍ଷ କ୍ୟୁସେକ୍ ବନ୍ୟାଜଳ ପ୍ରବାହିତ ହେଉଛି । ପ୍ରତି ମିନିଟରେ ସୁବର୍ଣ୍ଣରେଖାର ଜଳସ୍ତର ବଢ଼ିଚାଲିଛି । ଆଉ ଏକ ନିଶ୍ଚିତ ବନ୍ୟାର କରାଳ ରୂପ ଦେଖିବାକୁ ଯାଉଛି ବାଲେଶ୍ୱରର ୪ଟି ବ୍ଲକ । ଆଜି ରାତିରୁ ମୟୁରଭଞ୍ଜ ସହ ବାଲେଶ୍ୱରର ବାଲିଆପାଳ, ଭୋଗରାଇ ଓ ଜଳେଶ୍ୱରରେ ତାଣ୍ଡବ ରଚାଇପାରେ ବନ୍ୟାଜଳ ।
- ସୁବର୍ଣ୍ଣରେଖାରେ ହେବାକୁ ଯାଉଛି ବଡ଼ ବନ୍ୟା
- ଜିଲ୍ଲାପାଳଙ୍କୁ ଦିଆଗଲା ଏସ୍ଆରସି କ୍ଷମତା
ଯେତେବେଳେ ବନ୍ୟା ପରିସ୍ଥିତି ସୃଷ୍ଟି ହୁଏ, ସେତେବେଳେ ବେଶ ସତର୍କତାର ସହ ସ୍ୱଳ୍ପ ବନ୍ୟା, ମଧ୍ୟମ ଧରଣର ବନ୍ୟା, ଏହିପରି କହିଥାନ୍ତି ସରକାର । କାରଣ ଲୋକଙ୍କ ମନରେ ଅଧିକ ଭୟ ସୃଷ୍ଟି କରିବାକୁ ଚାହିଁନଥାନ୍ତି । କିନ୍ତୁ ଗତକାଲି ରାତିରୁ ଟ୍ୱିଟ୍ କରି ସୁବର୍ଣ୍ଣରେଖା ସିଷ୍ଟମରେ ବଡ଼ ବନ୍ୟା ହେବ ବୋଲି କହି ସାରିଛନ୍ତି ସ୍ୱତନ୍ତ୍ର ରିଲିଫ୍ କମିସନର । ଏହାର ଅର୍ଥ ହେଉଛି ଯେତିକି ବନ୍ୟାଜଳ ସୁବର୍ଣ୍ଣରେଖା ସିଷ୍ଟମରେ ପ୍ରବାହିତ ହେଉଛି, ତାହା ବଡ଼ ବନ୍ୟା କରିବା ଏକପ୍ରକାର ନିଶ୍ଚିତ ।
ସୁବର୍ଣ୍ଣରେଖା ନଦୀର ଜଳସ୍ତର ବହୁ ଉପରେ ପ୍ରବାହିତ ହେଉଛି । ଅପରାହ୍ଣରେ ଜାମସୋଳା ଘାଟରେ ବିପଦ ସଙ୍କେତ ଠାରୁ ପ୍ରାୟ ୪ମିଟର ଉପରେ ପ୍ରବାହିତ ହେଉଥିଲା ଜଳସ୍ତର । ସମୟ ଗଡ଼ିବା ସହ ବଢୁଛି ନଦୀର ଜଳସ୍ତର । ନଈକୂଳିଆ ଅଞ୍ଚଳରେ ଲୋକଙ୍କ ମଧ୍ୟରେ ଛନକା ପଶିଛି । ସରକାର ମଧ୍ୟ ଏହାର ମୁକାବିଲା ପାଇଁ ଜୋରଦାର ପ୍ରସ୍ତୁତି କରିଛନ୍ତି ।
ସବୁଠୁ ବଡ଼ କଥା ହେଉଛି ବାଲେଶ୍ୱର ଜିଲ୍ଲାପାଳଙ୍କୁ ଦିଆଯାଇଛି ଏସଆରସି ବା ସ୍ୱତନ୍ତ୍ର ରିଲିଫ୍ କମିସନରଙ୍କ କ୍ଷମତା । ଏହାର ଅର୍ଥ ହେଉଛି ଜିଲ୍ଲାପାଳଙ୍କୁ କୌଣସି ନିଷ୍ପତ୍ତି ନେବାରେ ଆଉ ଅପେକ୍ଷା କରିବାକୁ ପଡ଼ିବ ନାହିଁ । ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର, ଉଦ୍ଧାର କାର୍ଯ୍ୟ, ରିଲିଫ୍ ଯୋଗାଣ, ବନ୍ୟା ମୁକାବିଲା ପାଇଁ ଯାହା ଯାହା ଆବଶ୍ୟକ, ତାହା ସିଧାସଳଖ ନିଷ୍ପତି ନେଇପାରିବେ ଜିଲ୍ଲାପାଳ । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ବାଲେଶ୍ୱର ଜିଲ୍ଲାପାଳ ସିନ୍ଦେ ଦତାତ୍ରେୟଙ୍କୁ ଏହି କ୍ଷମତା ଦିଆଯାଇଥିବା ନେଇ ସ୍ୱତନ୍ତ୍ର ରିଲିଫ କମିଶନର ପ୍ରଦୀପ ଜେନା ଟୁଇଟ କରି ସୂଚନା ଦେଇଛନ୍ତି । ଏଥିସହ ଜରୁରୀକାଳୀନ ପରିସ୍ଥତିର ମୁକାବିଲା କରିବାକୁ ଏକ ହେଲିକ୍ୟାପ୍ଟର ପ୍ରସ୍ତୁତ ରଖିବାକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ । ଏନଡିଆରଏଫ୍ ସହ ବାଲେଶ୍ୱର ଏବଂ ମୟୁରଭଞ୍ଜକୁ ୫୮ଟି ଓଡ୍ରାଫ୍ ଏବଂ ଅଗ୍ନିଶମ ଟିମ୍ ପଠାଯାଇଛି । ବାଲେଶ୍ୱରରେ ଲୋକଙ୍କ ଉଦ୍ଧାର ପାଇଁ ୪୦ଟି ଅପରେସନ୍ ଟିମ୍ ସଜାଗ ରହିଥିବା ଏସଆରସି କହିଛନ୍ତି ।
୨୦୦୮ ପରଠୁ ଏଭଳି ବନ୍ୟା ଲୋକେ ଦେଖିନଥିବେ ବୋଲି କହିଛନ୍ତି ଏସଆରସି । ତେବେ ଯେପରି କୌଣସି ଜୀବନହାନୀ ନ ହେବ ତାହା ଉପରେ ସରକାର ଗୁରୁତ୍ୱ ଦେଇଛନ୍ତି । ବନ୍ୟା ବେଳେ ସତର୍କ ରହିବାକୁ ଏସଆରସି ଜନସାଧାରଣଙ୍କୁ ପରାମର୍ଶ ଦେଇଛନ୍ତି । ବୈତରଣୀ ନଦୀର ଜଳସ୍ତର ବିପଦ ସଙ୍କେତ ଉପରେ ରହିଥିଲେ ମଧ୍ୟ ବଡ଼ ବନ୍ୟାର ସମ୍ଭବନା ନ ଥିବା କୁହାଯାଇଛି । ସୁବର୍ଣ୍ଣଦେଖା ଏବଂ ବୈତରଣୀ ନଦୀରେ ବନ୍ୟ।। ଆସୁଥିବାରୁ ଯାଜପୁର, ଭଦ୍ରକ, ବାଲେଶ୍ୱର ଜିଲ୍ଲାକୁ ହାଇ ଆଲର୍ଟରେ ରଖାଯାଇଛି । ବାଲେଶ୍ୱର ସବୁଠୁ ଅଧିକ ପ୍ରଭାବିତ ହେବା ଆଶଙ୍କା ଥିବାରୁ ସ୍ଥିତି ସମୀକ୍ଷା ପାଇଁ ମନ୍ତ୍ରୀ ପ୍ରତାପ ଦେବଙ୍କୁ ଦାୟିତ୍ୱ ଦିଆଯାଇଛି । ସେପଟେ ସୁବର୍ଣ୍ଣରେଖାରେ ପାଣି ଯେତିକି ବଢୁଛି, ଜଳେଶ୍ୱର, ବାଲିଆପାଳ, ଭୋଗରାଇ ଆଦି ଅଞ୍ଚଳରେ ଭୟ ସେତିକି ବଢ଼ି ଚାଲିଛି । ଏପଟେ ପ୍ରଶାସନ ମଧ୍ୟ ତଳିଆ ଅଞ୍ଚଳରୁ ଲୋକଙ୍କୁ ସ୍ଥାନାନ୍ତର କରିବା ପ୍ରକ୍ରିୟାକୁ ଜୋରଦାର କରିଛି ପ୍ରଶାସନ । ବଡ଼ ବନ୍ୟା ଆସୁଥିବାରୁ ଲୋକଙ୍କୁ ତୁହାକୁ ତୁହା ସତର୍କ କରାଯାଉଛି ।