ପ୍ରଭାବିତ ହେବ କି କେନ୍ଦ୍ରାପଡା ରାଜନୀତି? ବଢ଼ିବ କି ବିଜେଡିର ଭୋଟ ପ୍ରତିଶତ?
କନକ ବ୍ୟୁରୋ : ରାଜନଗରର ପୂର୍ବତନ ବିଧାୟକ ଅଂଶୁମାନ ମହାନ୍ତିଙ୍କ ପରେ ବିଜୟ ମହାପାତ୍ରଙ୍କ ପୁଅ ଅରବିନ୍ଦ ମହାପାତ୍ର ବିଜେଡିରେ ସାମିଲ ହୋଇଛନ୍ତି । ଜିଲ୍ଳାର ଦୁଇ ଯୁବ ନେତା ବିଜେଡିରେ ସାମିଲ ହେବା ପରେ, କେନ୍ଦ୍ରାପଡା ଲୋକସଭା ନିର୍ବାଚନକୁ ଏହା କେମିତି ପ୍ରଭାବିତ କରିବ, ସେ ନେଇ ଆରମ୍ଭ ହୋଇଛି ଆଲୋଚନା ।..
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରାପଡା ଜିଲ୍ଳାର ଦୁଇ ବରିଷ୍ଠ ରାଜନେତା । ବିଜୁ ବାବୁଙ୍କ ସମୟରେ ଏହି ଦୁଇ ନେତାଙ୍କର କେନ୍ଦ୍ରାପଡା ଜିଲ୍ଲା ସମେତ ପଡୋଶୀ ଜିଲ୍ଳାର ନିର୍ବାଚନ ମଣ୍ଡଳୀ ଉପରେ ରହିଥିଲା ରାଜନୈତିକ ପ୍ରଭାବ । ଏପରିକି ଏବେ ବି ସେମାନଙ୍କର ବହୁ ସଂଖ୍ୟାରେ ସମର୍ଥକ ରହିଥିବା କୁହାଯାଏ । ଆଉ ଏବେ ଯେତେବେଳେ ଉଭୟ ନେତାଙ୍କ ପୁଅ ବିଜେଡିରେ ସାମିଲ ହୋଇଛନ୍ତି ସେତେବେଳେ, ଜିଲ୍ଲା ରାଜନୀତିକୁ ଏହା କେମିତି ପ୍ରଭାବିତ କରିବ ସେ ନେଇ ଆରମ୍ଭ ହୋଇଛି ଆଲୋଚନା ।
ଅଂଶୁମାନ ଓ ଅରବିନ୍ଦ ବିଜେଡିରେ ମିଶିବା ପରେ, ଏହାର ବଡ ପ୍ରଭାବ ଜିଲ୍ଲା ରାଜନୀତି ଉପରେ ପଡିବ ବୋଲି ଚର୍ଚ୍ଚା ହେଉଛି । କୁହାଯାଉଛି, ଅଂଶୁମାନଙ୍କର ରାଜନଗର ସମେତ ଅନ୍ୟ ନିର୍ବାଚନମଣ୍ଡଳୀରେ ସମର୍ଥକ ରହିଛନ୍ତି । ତେଣୁ ସେ କଂଗ୍ରେସ ଛାଡି ବିଜେଡିରେ ଯୋଗ ଦେବା ପରେ ତାଙ୍କ ସମର୍ଥକମାନେ ବିଜେଡିକୁ ସମର୍ଥନ ଦେବେ । ସେହିପରି ଉଭୟ ମହାକାଳପଡା ଓ ପାଟକୁରାରେ ବିଜୟଙ୍କର ସଂଗଠନ ରହିଥିବାରୁ ଆଗାମି ନିର୍ବାଚନରେ ତାର ପ୍ରଭାବ ଦେଖିବାକୁ ମିଳିବ ବୋଲି କୁହାଯାଉଛି । ତେବେ ଏହାକୁ ଏହାକୁ ଗ୍ରହଣ କରି ନାହାନ୍ତି କଂଗ୍ରେସର ବରିଷ୍ଠ ନେତା ।
ଏସବୁ ଭିତରେ ଏବେ ନଜର ଅଟକିଛି, ଜିଲ୍ଲାର ପୁରୁଣା ବିଜେଡି ନେତା ଓ କର୍ମୀଙ୍କ ଉପରେ । ଯେଉଁମାନେ ବର୍ଷ ବର୍ଷ ଧରି ଏହି ବିଜେଡି ପାଇଁ କାମ କରି ଆସୁଥିଲେ, ସେମାନେ ଏହି ଦୁଇ ନେତାଙ୍କୁ କେମିତି ଗ୍ରହଣ କରିବେ, ନା ବିକଳ୍ପ ବାଟ ବାଛିବେ ତାହା ବେଶ ଗୁରୁତ୍ୱପୂର୍ଣ୍ଣ । ତେବେ ସୁପ୍ରିମୋଙ୍କ ନିର୍ଦ୍ଦେଶ ଯାହା ହେବ ତାହା ମାନିବେ ବୋଲି କହିଛନ୍ତି ବିଜେଡି ନେତା ସଞ୍ଜୟ ଅଗ୍ରୱାଲ । କେନ୍ଦ୍ରାପଡା ଲୋକସଭା କ୍ଷେତ୍ର ଏକ ଗୁରୁତ୍ୱପୂର୍ଣ୍ଣ ଆସନ ହୋଇଥିବାରୁ, ଏହା ଉପରେ ସମସ୍ତଙ୍କ ନଜର ରହିଛି ।