କନକ ବ୍ୟୁରୋ: ରୁଷୀୟ ପର୍ଯ୍ୟଟକଙ୍କର ରାୟଗଡାରେ କେମିତି ମୃତ୍ୟୁ ହେଲା ତାକୁ ସନ୍ଦେହ ବଢ଼ୁଥିବାବେଳେ, କନକ ନ୍ୟୁଜ୍ ହାତରେ ଲାଗିଛି ଆଉ କିଛି ଏକ୍ସକ୍ଲୁସିଭ୍ ଫଟୋ । ସେପଟେ ତଦନ୍ତକୁ ଜୋରଦାର କରିଛି କ୍ରାଇମବ୍ରାଚଂ । ଯେଉଁଠି ରୁଷିୟା ସାଂସଦ ପାଭେଲଙ୍କର ମୃତ୍ୟୁ ହୋଇଥିଲା ସେଠି ଛାନଭିନ୍ କରିଛନ୍ତି କ୍ରାଇମବ୍ରାଂଚର ଏକ ଟିମ୍ ।
Kanak News is now on WhatsApp
Join and get latest news updates delivered to you via WhatsApp
ଓଡିଶାରେ ମୃତ୍ୟୁ ହୋଇଥିବା ରୁଷୀୟ ପର୍ଯ୍ୟଟକଙ୍କ ମୃତ୍ୟୁକୁ ନେଇ ରହସ୍ୟ ଲାଗି ରହିଥିବାବେଳେ, କନକ ନ୍ୟୁଜ୍ ହାତରେ ଲାଗିଛି ଆଉ କିଛି ଏକ୍ସକ୍ଲୁସିଭ୍ ଫଟୋ । ଫଟୋରୁ ସ୍ପଷ୍ଟ ହେଉଛି, ଏହା ଭୁବନେଶ୍ୱରର ପ୍ରସିଦ୍ଧ ଶୈବପୀଠ ଲିଙ୍ଗରାଜ ମନ୍ଦିର ପାଖର । ଯେଉଁ ଫଟୋରେ ଥିବା ସମସ୍ତେ ବେଶ୍ ଖୁସି ଥିବା ଜଣାପଡୁଛି । ସମସ୍ତେ ହସ ହସ ମୁହଁରେ ସାଂଗ ହୋଇ ଫଟୋ ଉଠାଇଛନ୍ତି । ସାଥିରେ ଗାଇଡ ବି ଅଛନ୍ତି । କୁହାଯାଉଛି, ରୁଷରୁ ଆସି ଭୁବନେଶ୍ୱରରେ ପହଁଚିବା ପରେ ଚାରି ଜଣ ପର୍ଯ୍ୟଟକ, ବିଭିନ୍ନ ଐତିହ୍ୟ ସ୍ଥଳକୁ ବୁଲିବାକୁ ଯାଇଥିଲେ । ଆଉ ଲିଙ୍ଗରାଜକୁ ବୁଲିବାକୁ ଯାଇଥିବାବେଳେ ଏହି ଫଟୋ ଉଠାଇଥିଲେ । ପୂର୍ବରୁ ସାମନାକୁ ଆସିଥିଲା ଦାରିଙ୍ଗିବାଡିରେ ସେମାନେ ବୁଲିବାକୁ ଯାଇଥିବାବେଳର ଫଟୋ । ଯେଉଁ ଫଟୋରେ ଦେଖାଯାଉଥିଲା ୪ଜଣ ବନ୍ଧୁ ସମସ୍ତେ ଚେୟାରରେ ବସିଥିଲେ ଓ ଥଣ୍ଡାରୁ ରକ୍ଷା ପାଇବା ପାଇଁ ପାଖରେ ନିଆଁ ଜଳୁଥିଲା । ସେଠାରେ ଦିନେ ରହିବା ପରେ ରାୟଗଡାକୁ ଆସିଥିଲେ ।
ସୂଚନା ଅନୁସାରେ ରୁଷୀୟ ୧୯ ତାରିଖରେ ଦିଲ୍ଲୀରୁ ଆସି ଭୁବନେଶ୍ୱରରେ ପହଁଚିଥିଲେ । ୨୦ତାରିଖରେ ଦାରିଙ୍ଗିବାଡି ଯାଇଥିଲେ । ସେଠାରେ ଦିନେ ରହିବା ପରେ ୨୧ତାରିଖରେ ରାୟଗଡାକୁ ଯାଇ ହୋଟେଲରେ ରହିଥିଲେ । କିନ୍ତୁ ରାୟଗଡାରେ ରହିବାର ମାତ୍ର ୪୮ଘଂଟା ବ୍ୟବଧାନରେ ଦୁଇଜଣଙ୍କର ମୃତ୍ୟୁ ହୋଇଯାଇଥିଲା ।
ରୁଷୀୟ ସାଂସଦ ପାଭେଲ ଆଂଟୋଭଙ୍କ ମୃତ୍ୟୁ ଏକ ଅନ୍ତର୍ଜାତୀୟ ପ୍ରସଙ୍ଗ ହୋଇଥିବାରୁ, ତାଙ୍କର କେମିତି ଜୀବନ ଗଲା, ସେ ଆତ୍ମହତ୍ୟା କରିଛନ୍ତି ନାଁ ତାଙ୍କୁ କେହି ହତ୍ୟା କରିଛି, ତାର କାରଣ ଖୋଜିବାକୁ ତଦନ୍ତକୁ ଜୋରଦାର କରିଛି କ୍ରାଇମବ୍ରାଂଚ । କ୍ରାଇମବ୍ରାଂଚର ଏକ ୧୨ଜଣିଆ ଟିମ୍ ରାୟଗଡାକୁ ଯାଇ ସ୍ଥାନୀୟ ପୋଲିସକୁ ପଚରାଉଚୁରା କରିବା ସହ ହୋଟେଲକୁ ଯାଇ ଛାନଭିନ କରିଛନ୍ତି । ପର୍ଯ୍ୟଟକମାନେ ରହୁଥିବା ହୋଟେଲ ସାଇ ଇଂଟରନେସନାଲର ୨୦୩ ଏବଂ ୩୦୫ ନମ୍ବର ରୁମରେ ଅନୁଧ୍ୟାନ କରିଛନ୍ତି । ପାଭେଲ ଯେଉଁ ଛାତ ଉପରୁ ପଡି ମୃତ୍ୟୁ ହୋଇଛି ବୋଲି କୁହାଯାଉଛି, ସେଠି ଯାଂଚ କରିଛନ୍ତି । ହୋଟେଲ ତଳେ ଯେଉଁଠି ପାଭେଲ ପଡିଥିଲେ, ସେହି ସ୍ଥାନର ଯାଂଚ କରିବା ସହ ବିଭିନ୍ନ ଆଂଗେଲରୁ ଫଟୋ ଉଠାଇଛନ୍ତି ।
ରୁଷ ସାଂସଦ ତଥା ବ୍ୟବସାୟୀ ପାଭେଲ ଆଂଟୋଭ ଓ ତାଙ୍କର ବନ୍ଧୁ ଭ୍ଲାଦିମିର ବିଦାନୋଭଙ୍କ ମୃତ୍ୟୁ ଘଟଣାର ତଦନ୍ତ ଓଡିଶା ଗୁଇନ୍ଦା ଓ କ୍ରାଇମବ୍ରାଂଚ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି । ସ୍ଥିତି ଏମିତି ହୋଇଛି ଘଟଣା ଯେତିକି ଆଗଉଛି, ରହସ୍ୟ ସେତିକି ବଢ଼ି ବଢ଼ି ଚାଲିଛି । ସେପଟେ ପାଭେଲଙ୍କ ଭିସେରା ରଖା ନଯିବା, ତରବରିଆ ଭାବେ ପୋଡିଦେବା ସନ୍ଦେହକୁ ବଢ଼ାଇଛି । ହେଲେ ରହସ୍ୟରୁ ଉଠୁନି ପରଦା ।