ଆଗୁଆ ନିର୍ବାଚନକୁ ନେଇ ବଢିଲା ଚର୍ଚ୍ଚା । ବିଜେଡି ଓ ବିଜେପିର ଘନ ଘନ କାର୍ଯ୍ୟକ୍ରମ ଦେଲାଣି ସଂକେତ, ୨୦୨୩ରେ ହେବ କି ନିର୍ବାଚନ?
କନକ ବ୍ୟୁରୋ : ପଦ୍ମପୁର ଓ ଧାମନଗର ଉପନିର୍ବାଚନ ପରେ ରାଜ୍ୟରେ ରାଜନୈତିକ ମାହୋଲ ସରଗରମ ରହିଛି । ଆଗୁଆ ନିର୍ବାଚନ ହେବା ଚର୍ଚ୍ଚା ବି ହେଉଛି । ଆଉ ଏତିକି ବେଳେ ଉଭୟ ବିଜେଡି ଓ ବିଜେପିର ଛାମୁଆ ନେତା ଯେଉଁଭଳି ଭାବେ ମଇଦାନକୁ ଓହ୍ଳାଉଛନ୍ତି, ରାଜନୈତିକ କାର୍ଯ୍ୟକ୍ରମ ରଖୁଛନ୍ତି ତାହା ଏହି ଚର୍ଚ୍ଚାକୁ ଖୋରାକ ଯୋଗାଉଛି ।
Kanak News is now on WhatsApp
Join and get latest news updates delivered to you via WhatsApp
ସାଧାରଣ ନିର୍ବାଚନକୁ ଆଉ ପ୍ରାୟ ୧୪-୧୫ ମାସ ଅଛି, କିନ୍ତୁ ରାଜ୍ୟ ରାଜନୀତିରେ ଏବେ ଠାରୁ ସରଗରମ ହୋଇଉଠିଛି । ବିଜେପିର କେନ୍ଦ୍ରୀୟ ନେତୃତ୍ୱ ଓଡ଼ିଶାକୁ ଘନ ଘନ ଗସ୍ତ କରୁଛନ୍ତି, ଏପଟେ ମୁଖ୍ୟମନ୍ତ୍ରୀ ଜିଲ୍ଲାଗୁଡିକୁ ମାରାଥନ ଗସ୍ତ କରି ବିଭିନ୍ନ ପ୍ରକଳ୍ପ ଭେଟି ଦେଉଛନ୍ତି । ଠିକ୍ ଯେମିତି ନିର୍ବାଚନର କିଛି ମାସ ପୂର୍ବରୁ ବାତାବରଣ ସୃଷ୍ଟି ହୁଏ, ସେହିଭଳି ବାତାବରଣ ଏବେ ରାଜ୍ୟରେ ଅନୁଭୂତ ହେଉଛି ।
ଧାମନଗର ଓ ପଦ୍ମପୁର ନିର୍ବାଚନ ପରେ ରାଜ୍ୟରେ ଜମିଉଠିଛି ରାଜନୈତିକ ମାହୋଲ । ନିକଟରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଆଗୁଆ ନିର୍ବାଚନ ହେବା ସଂକେତ ପରେ ଏହି ଚର୍ଚ୍ଚା ବଢ଼ିବାରେ ଲାଗିଛି । ବିଜେଡି ୧୨୫ର ନାରା ଦେଇ ଯେକୌଣସି ମୁହୁର୍ତରେ ନିର୍ବାଚନ ହେଲେ ସାମ୍ନା କରିବାକୁ ପ୍ରସ୍ତୁତ ବୋଲି ଦଳୀୟ ନେତା କହୁଛନ୍ତି । ବିଜେଡି ଅନ୍ଦର ମହଲର ସୂଚନା ଅନୁସାରେ ଦଳ କାହାକୁ କେଉଁ ଜାଗାରୁ ପ୍ରାର୍ଥୀ କରିବ ସେନେଇ ଏବେଠାରୁ ସର୍ଭେ କାମ ଆରମ୍ଭ କରିଦେଇଛି । ଏପରିକି ପ୍ରତିଷ୍ଠା ଦିବସରୁ ଦଳ ଆଗାମୀ ନିର୍ବାଚନର ପ୍ରସ୍ତୁତି ଆରମ୍ଭ କରି ଦେଇଛି । କିନ୍ତୁ ଏସବୁ ଭିତରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଭିନ୍ନ ଜିଲ୍ଲା ଗସ୍ତ କରୁଛନ୍ତି. ନିକଟରେ ବାଲେଶ୍ୱର, ଅନୁଗୁଳ ଜିଲ୍ଲା ଯାଇ ବିଭିନ୍ନ ଉନ୍ନୟନ ମୂଳକ କାର୍ଯ୍ୟର ଉଦଘାଟନ ଓ ଭିତି ପ୍ରସ୍ତର କରୁଛନ୍ତି । ଆଗାମୀ ଦିନରେ ୩୦ ଜିଲ୍ଲା ଗସ୍ତର କାର୍ଯ୍ୟକ୍ରମ ରଖିଛନ୍ତି ମୁଖ୍ୟମନ୍ତ୍ରୀ ।
ଏପଟେ ଓଡ଼ିଶା ଉପରେ ବଢ଼ିଯାଇଛି କେନ୍ଦ୍ରମନ୍ତ୍ରୀଙ୍କ ଫୋକସ । ଗୁରୁବାର ତିନି କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ, ଧର୍ମେନ୍ଦ୍ର ପ୍ରଧାନ, ପ୍ରହ୍ଲାଦ ଯୋଶୀ ଅନଗୁଳ ଓ ଭୁବନେଶ୍ୱରରେ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି । ଆଉ ତିନି ମାସ ଭିତରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ୨ ଥର ଆସିଲେଣି । ଆଗାମୀ ଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ଓଡ଼ିଶାକୁ ଆଣିବା କାର୍ଯ୍ୟକ୍ରମ ରହିଛି ବୋଲି ବିଜେପି ଅନ୍ଦରମହଲରୁ ଜଣାପଡିଛି । ଅର୍ଥାତ ବିଜେପି ବି ନିର୍ବାଚନ ମାହୋଲ ବନାଉଛି ।
୨୦୨୩ରେ ୯ଟି ରାଜ୍ୟର ବିଧାନସଭା ନିର୍ବାଚନ ହେବାକୁ ଯାଉଛି । ବଡ଼ ବଡ଼ ରାଜ୍ୟରେ ନିର୍ବାଚନ ହେବାକୁ ଥିବାରୁ ସେହି ସମୟରେ ଓଡ଼ିଶା ବିଧାନସଭା ନିର୍ବାଚନ ହେବ କି, ଏହି ଚର୍ଚ୍ଚା ଆରମ୍ଭ ହୋଇଛି । ନଜର ପକାଇବା ,
କାହିଁକି ହେଉଛି ଆଗୁଆ ନିର୍ବାଚନ ଚର୍ଚ୍ଚା?
ପଞ୍ଚାୟତ ଓ ପୌର ନିର୍ବାଚନରେ ବିପୁଳ ବିଜୟ ଯୋଗୁଁ ଉତ୍ସାହିତ ଅଛି ବିଜେଡି
ସାଧାରଣ ନିର୍ବାଚନରେ ମୋଦୀଙ୍କ ହାୱା ବଡ଼ ଫ୍ୟାକ୍ଟର ହୋଇଥିବାରୁ ଆଗୁଆ ନିର୍ବାଚନ ବିଜେଡିକୁ ଲାଭ ଦେଇପାରେ
ବିରୋଧୀଙ୍କ ଅପେକ୍ଷା ତୃଣମୂଳ ସ୍ତରରେ ବିଜେଡିର ସଂଗଠନ ବେଶ ଆଗରେ ରହିଛି