ରାଷ୍ଟ୍ରପତି ଭବନ ପରେ ପୁରୁଣା ସଂସଦ ଗୃହ ଦଖଲ କଲେ ଶ୍ରୀଲଙ୍କାବାସୀ । ସଂସଦରେ ପ୍ରବେଶ କରିବାକୁ ପହଂଚିଲେ ହଜାର ହଜାର ଲୋକ
କନକ ବ୍ୟୁରୋ : ସେ ଗଣତନ୍ତ୍ର ହେଉ କି, ରାଜତନ୍ତ୍ର ଦେଶର ସର୍ବୋଚ୍ଚ କ୍ଷମତା ସର୍ବଦା ଲୋକମାନଙ୍କ ପାଖରେ ଥାଏ ବୋଲି ପ୍ରମାଣ କରିଦେଇଛନ୍ତି ଶ୍ରୀଲଙ୍କାର ନାଗରିକ । ଶ୍ରୀଲଙ୍କାରେ ଆଥିର୍କ ସଂକଟରୁ ଜନ୍ମ ନେଇଥିବା ରାଜନୈତିକ ସଂକଟ ଏବେ ଗମ୍ଭୀର ରୂପ ନେଇଛି । ଶନିବାରଦିନ ଶ୍ରୀଲଙ୍କାର ରାଷ୍ଟ୍ରପତି ଗୋଟବାୟା ରାଜପକ୍ଷେ ଦେଶଛାଡି ପଳାଇଯାଇଥିବା ଖବର ଆସିବା ପରେ ଦେଶବାସୀଙ୍କ କ୍ରୋଧ ଦେଖିବାକୁ ମିଳିଛି । ଦୀର୍ଘଦିନ ହେବ ଆର୍ଥକ ସଂକଟ ସହ ଲଢେଇ କରୁଥିବା ଲୋକମାନେ ଏବେ ସରକାରଙ୍କ ସହ ଲଢିବାକୁ ଓହ୍ଲାଇ ଆସିଛନ୍ତି । ଶନିବାର ଦିନ କ୍ରୋଧିତ ନାଗରିକ ପ୍ରଥମେ ରାଷ୍ଟ୍ରପତି ଭବନ ଦଖଲ କରିନେଇଥିଲେ । ହେଲେ ଆଜିର ଖବର ମୁତାବକ କେବଳ ରାଷ୍ଟ୍ରପତି ଭବନ ନୁହେଁ ବରଂ ରାଷ୍ଟ୍ରପତି ଭବନ ନିକଟରେ ଥିବା ପୁରୁଣା ସଂସଦ ଗୃହକୁ ବି ପ୍ରଦର୍ଶନକାରୀମାନେ ଦଖଲକୁ ନେଇଛନ୍ତି । ଏବେ ହଜାର ହଜାର ଲୋକ ଏହି ପୁରୁଣା ସଂସଦକୁ ଭିତରୁ ଦେଖିବାକୁ ଭିଡ ଜମାଇଥିବା ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ସେପେଟେ ସେଠାରେ କାର୍ଯ୍ୟରତ ପୋଲିସ କର୍ମୀମାନେ କହିଛନ୍ତି କି, ଏତେ ଲୋକଙ୍କ ଭିଡ ଜମିଛି ଯେ ସେମାନଙ୍କୁ ଅଟକାଇବା ପୋଲିସ ପକ୍ଷରେ ସମ୍ଭବ ନୁହେଁ । ଏବେ ଶ୍ରୀଲଙ୍କାର ପୁରୁଣା ସଂସଦ ଲୋକଙ୍କ ପାଇଁ ପର୍ଯ୍ୟଟନ ସ୍ଥଳୀ ପାଲଟିଥିବା କଥା ପୋଲିସ କହିଛି ।
କହିରଖୁ କି ଶ୍ରୀଲଙ୍କାରେ ମାର୍ଚ୍ଚ ମାସରୁ ଲାଗିରହିଥିବା ବିଜୁଳୀ ସଂକଟ ଏପର୍ଯ୍ୟନ୍ତ ଲାଗି ରହିଛି । ଏହି କାରଣରୁ ପ୍ରଥମେ କଲମ୍ବୋର ଲୋକମାନେ ବିରୋଧ ପ୍ରଦର୍ଶନ କରିବା ଆରମ୍ଭ କରିଥିଲେ । ଦେଶରେ ଚଳିତ ବର୍ଷ ସବୁଠାରୁ ଅଧିକ ଗରମ ଅନୁଭୂତ ହୋଇଥିଲେ ବି ଦୈନିକ ୧୩ ଘଂଟା ପର୍ଯ୍ୟନ୍ତ ବିଜୁଳୀ କାଟ ଲୋକମାନଙ୍କୁ ଅସ୍ତବ୍ୟସ୍ତ କରିଦେଇଥିଲା ।