କନକ ବ୍ୟୁରୋ: କଂଗ୍ରେସ ଅଧ୍ୟକ୍ଷ ପଦଠାରୁ ରାଜସ୍ଥାନ ମୁଖ୍ୟମନ୍ତ୍ରୀ କିଏ ହେବ ତାକୁ ନେଇ ବେସି ଟଣାଓଟରା ଦେଖିବାକୁ ମିଳିଛି । ଦିଲ୍ଲୀଠାରୁ ନେଇ ରାଜସ୍ଥାନ ଯାଏ ସବୁଠି ହଲଚଲ ଦେଖିବାକୁ ମିଳିଛି । କଂଗ୍ରେସ ଦଳ ବର୍ତ୍ତମାନ ଏକ ପ୍ରକାର ଭାଙ୍ଗିବା ସ୍ଥିତିକୁ ଚାଲିଆସିଥିବା ମଧ୍ୟ ଦେଖାଯାଇଛି । ଗୋଟିଏ ପଟେ ବିଧାୟକମାନେ ହାଇକମାଣ୍ଡଙ୍କ କଥା ଶୁଣିବାକୁ ପ୍ରସ୍ତୁତ ନଥିବା ବେଳେ ଅନ୍ୟ ପଟେ ବରିଷ୍ଠ ନେତାଙ୍କୁ ରାଜସ୍ଥାନରେ ଦେଖିବାକୁ ମିଳିଛି । ନାରାଜ ଥିବା ବିଧାୟକଙ୍କ କହିବା କଥା ଦଳର ୧୦୨ ବିଧାୟକଙ୍କ ମତକୁ ନେଇ ମୁଖ୍ୟମନ୍ତ୍ରୀଙ୍କୁ ନିର୍ବାଚିତ କରିବାର ଆବଶ୍ୟକତା ରହିଛି । ତେବେ କିଛି ବିଧାୟକ ରହିଛନ୍ତି ଯେଉଁମାନେ ଚାହୁଁଛନ୍ତି ସଚିନ ପାଇଲଟ ମୁଖ୍ୟମନ୍ତ୍ରୀ ହୁଅନ୍ତୁ । ତେବେ ଏହାକୁ ନେଇ ହିଁ ବିଦ୍ରୋହ ଆରମ୍ଭ ହୋଇଯାଇଛି । ସିଏମର ଚଉକି ପାଇଁ ଅଶୋକ ଗେହଲଟଙ୍କ ସମର୍ଥକ ହାଇକମାଣ୍ଡଙ୍କ ଆଗରେ କିଛି ସର୍ତ୍ତ ରଖିଛନ୍ତି । ଗୋଟିଏ ପଟେ କଂଗ୍ରେସ ଯେତେବେଳେ ପରିବର୍ତ୍ତନର ସ୍ଥିତି ଦେଇ ଗତି କରୁଛି ସେତେବେଳେ ଦଳ ଭାଙ୍ଗିବାର ସ୍ଥିତିରେ ପହଞ୍ଚିସାରିଛି । କେବଳ ରାଜସ୍ଥାନରେ ନୁହେଁ ଗୋଆ, ମହାରାଷ୍ଟ୍ର, ମଧ୍ୟପ୍ରଦେଶ, ପଞ୍ଜାବରେ ମଧ୍ୟ ପୂର୍ବରୁ ଏହିଭଳି ସ୍ଥିତି ଦେଖିସାରିଛି ଦଳ ।
Kanak News is now on WhatsApp
Join and get latest news updates delivered to you via WhatsApp
ହାଇକମାଣ୍ଡଙ୍କ ଆଗରେ ରଖାଯାଇଥିବା ସର୍ତ୍ତ ମଧ୍ୟରୁ ପ୍ରଥମଟି ହେଉଛି ମୁଖ୍ୟମନ୍ତ୍ରୀ ପଦ ପାଇଁ ୧୦୨ ବିଧାୟକଙ୍କ ମତ ହିଁ ନିଆଯାଉ । ଦ୍ୱିତୀୟ ସର୍ତ୍ତଟି ହେଉଛି ଅଶୋକ ଗେହଲଟଙ୍କ ପସନ୍ଦକୁ ହିଁ ପ୍ରାଥମିକତା ଦିଆଯାଉ । ସୂଚନା ଅନୁସାରେ ହାଇକମାଣ୍ଡ ଏହି ସର୍ତ୍ତ ମାନିବାକୁ ରାଜି ନୁହନ୍ତି । ଦଳର ନେତା ଅଜୟ ମାକନ ବିଧାୟକଙ୍କୁ ସାକ୍ଷାତ କରିବା ପାଇଁ ଜୟପୁର ପହଞ୍ଚିଛନ୍ତି । ତେବେ ବିଧାୟକଙ୍କ ସହ ସେ ସାକ୍ଷାତ କରିପାରିନାହାନ୍ତି । ବର୍ତ୍ତମାନ ଅଜୟ ମାକନ, ମଲ୍ଲିକାର୍ଜୁନ ଖଡଗେ ଦିଲ୍ଲୀ ଫେରି ସୋନିଆ ଗାନ୍ଧୀଙ୍କୁ ରିପୋର୍ଟ ପ୍ରଦାନ କରିବେ । କଂଗ୍ରେସର ବିଦ୍ରୋହୀ ବିଧାୟକ ଅନ୍ତରୀଣ ଅଧ୍ୟକ୍ଷ ସୋନିଆ ଗାନ୍ଧୀଙ୍କ ନିର୍ଦ୍ଦେଶ ପରେ ମଧ୍ୟ ପର୍ଯ୍ୟବେକ୍ଷକ ଅଜୟ ମାକନ ଏବଂ ମଲ୍ଲିକାର୍ଜୁନ ଖଡଗେଙ୍କୁ ସାକ୍ଷାତ ପାଇଁ ମନା କରିଦେଇଥିଲେ ।