ରାଜନଗରରେ ୪ ମାସ ଗଲା ନାହିଁ ୧୪ କୋଟିର ନଦୀବନ୍ଧ। ୧୦ ଦିନ ଭିତରେ ଭୁଷୁଡିଲା ୨ ଥର।
କନକ ବ୍ୟୁରୋ: ୪ ମାସରେ ଭୁଷୁଡିଲା ୧୪ କୋଟି ଟଙ୍କାର ନଦୀବନ୍ଧ । କେନ୍ଦ୍ରାପଡା ଜିଲ୍ଲା ରାଜନଗର ବ୍ଲକର ଜୀବନରେଖା କେରେଡାଗଡ-ଅଳତାଙ୍ଗ ବନ୍ୟା ପ୍ରତିରୋଧକ ବନ୍ଧ ପ୍ରତି ହଂସୁଆ ନଦୀ ବିପଦ ସୃଷ୍ଟି କରିଛି । ଏହି ନଦୀ ବନ୍ଧ ପ୍ରତି ବିପଦ ସୃଷ୍ଟି ହେଲେ ରାଜନଗର ବ୍ଲକର ସାନବଡଗୋପାଳପୁର, କେରେଡାଗଡ, ବାଲିସାହିପାଟଣା, ରାଜପୁର, ଓସ୍ତିଆ, ବେଲପାଳ, ବନ୍ଧପଡା ପଞ୍ଚାୟତ ନଦୀରେ ମିଶିଯିବ । ଏହି ନଦୀବନ୍ଧ ଓ ଅଞ୍ଚଳକୁ ସୁରକ୍ଷା ଦେବା ପାଇଁ ରାଜନଗର ବିଧାୟକ ରାଜ୍ୟ ସରକାରଙ୍କୁ ଜଣାଇବା ପରେ ନାବାର୍ଡ ସହାୟତାରେ ଆରଆଇଡିଏଫ ଯୋଜନାରେ ୧୭କୋଟିରୁ ଉଦ୍ଧ୍ୱର୍ ଟଙ୍କା ଯୋଗାଇ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ହଂସୁଆ ଆଁ ମୁହଁରେ ଥିବା ବନ୍ୟା ପ୍ରତିରୋଧକ ବନ୍ଧକୁ ସୁରକ୍ଷା ଦେବା ପାଇଁ ନାବାର୍ଡ ସହାୟତାରେ ଆରଆଇଡିଏଫ ଯୋଜନାରେ ସ୍ପର ଓ ପଥର ପ୍ୟାକିଂ ପାଇଁ ୧୪ କୋଟି ୭୭ ଲକ୍ଷ ଟଙ୍କା ଯୋଗାଇ ଦିଆଯାଇଛି । ଓଡିଶା କନଷ୍ଟ୍ରକସନ କମ୍ପାନୀ ଏହି କାମର ଠିକା ନେଇଛି । ୨୮୦ ମିଟର ପଥର ପ୍ୟାକିଂ ଓ ଲଚିଂ ସହିତ ୩ଟି ସ୍ପର ନିର୍ମାଣ ପାଇଁ ଏହି ଅର୍ଥ ଯୋଗାଇ ଦିଆଯାଇଛି । ଏଷ୍ଟିମେଟ ଅନୁସାରେ ପ୍ରାୟ ୨ କ୍ୱିଂଟାଲ ଓଜନର ବଡ ବଡ ପଥର ପକାଇ ଏହି ସ୍ପର ନିର୍ମାଣ ହେବା କଥା । ମାତ୍ର ଅତି ନିମ୍ନମାନର କାମ ଯୋଗୁଁ ନିର୍ମାଣଧିନ ସ୍ପର ଭୁଷୁଡି ପଡିଛି । ୧୦ଦିନ ମଧ୍ୟରେ ୨ ଥର ଧସିଲାଣି । ସ୍ପର ଭୁଷୁଡିବା ପରେ ରାତି ଅଧିଆ ଘୋଟାଲାକୁ ଲୁଚାଇବା ପାଇଁ ତରବରିଆ ଭାବେ ପଥର ପକା କାମ ଚାଲିଛି । ରାଜନଗର ଭାଟପଡା ଠାରେ ନିର୍ମାଣ ହେଉଥିବା ପଥର ପ୍ୟାକିଂ ୪ମାସ ନପୁରୁଣୁ ପଥରଗୁଡିକ ଖସି ହଂସୁଆ ଗର୍ଭକୁ ଚାଲିଯାଉଛି । ଦିନ ଦ୍ୱିପ୍ରହରରେ ଆଖିରେ ଆଙ୍ଗୁଳି ଗେଂଜି କିଭଳି ସରକାରୀ ବାବୁମାନେ ସରକାରୀ ଅର୍ଥକୁ ହରିଲୁଟ କରୁଛନ୍ତି । ଅନ୍ୟପଟେ ଏ ନେଇ ଜଳସମ୍ପଦ ବିଭାଗର ସହକାରୀ ନିର୍ବାହୀ ଯନ୍ତ୍ରୀଙ୍କୁ ବାରମ୍ବାର ଯୋଗାଯୋଗ କରିଥିଲେ ମଧ୍ୟ ତାଙ୍କର ପତିକ୍ରିୟା ମିଳିପାରିନାହିଁ ।