ଓମିକ୍ରନ ଭୟ ଭିତରେ ଘୁଂଚିବ କି ୟୁପି ନିର୍ବାଚନ? ଆହ୍ଲାବାଦ ହାଇକୋର୍ଟଙ୍କ ପରାମର୍ଶ ପରେ ଆକ୍ସନ ମୋଡରେ ନିର୍ବାଚନ କମିଶନ
କନକ ବ୍ୟୁରୋ: ଦେଶରେ କରୋନା ସଂକ୍ରମଣର ଭୟାବହତା ବଢୁଛି । ଏହାରି ଭିତରେ ୫ ରାଜ୍ୟରେ ବିଧାନସଭା ନିର୍ବାଚନ ହେବାକୁ ଯାଉଛି । ନିର୍ବାଚନ ତାରିଖ ଘୋଷଣା ପୂର୍ବରୁ ୟୁପି ଏବଂ ଅନ୍ୟାନ୍ୟ ରାଜ୍ୟରେ ରାଜନତିକ ଦଳମାନେ ବଡ ବଡ ରାଲି ଆରମ୍ଭ କରିଦେଇଛନ୍ତି । ଏହାକୁ ନଜରରେ ରଖି ଆହ୍ଲାବାଦ ହାଇକୋର୍ଟ ନିର୍ବାଚନ ଘୁଂଚାଇବାକୁ ନିର୍ବାଚନ ଅଧିକାରୀଙ୍କୁ ପରାମର୍ଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଉତର ପ୍ରଦେଶ ନିର୍ବାଚନ ପୂର୍ବରୁ ନରେନ୍ଦ୍ର ମୋଦୀ, ପ୍ରିୟଙ୍କା ଗାନ୍ଧୀ ଏବଂ ଅଖିଳେଶ ଯାଦବ ନିଜ ନିଜ ଦଳ ପାଇଁ ପ୍ରଚାର ଆରମ୍ଭ କରିଦେଇଛନ୍ତି । ନିଜ ନିଜର ଶକ୍ତି ପ୍ରଦର୍ଶନ ପାଇଁ ସମର୍ଥକଙ୍କ ଗହଳି ମଧ୍ୟ ଭରପୁର ରହିଛି । ନାଁ ରହୁଛି ମାସ୍କ, ନା ଅଛି ସାମାଜିକ ଦୂରତା । କରୋନା ଭିତରେ ଏପରି ରାଲି ବଢାଇଛି ଚିନ୍ତା ।
କରୋନା ସଂକ୍ରମଣର ଭୟବହତା, ନୂଆ ଭ୍ୟାରିଆଂଟ ଓମିକ୍ରନର ଚ୍ୟାଲେଞ୍ଜ ଏବଂ ବଡ ବଡ ରାଜନୈତିକ ରାଲିର ଭିଡକୁ ଦେଖି ନିର୍ବାଚନ ଘୁଂଚାଇବାକୁ ପରାମର୍ଶ ଦେଇଛନ୍ତି ଆହ୍ଲାବାଦ ହାଇକୋର୍ଟ । ଏହାପରେ ନିର୍ବାଚନ ଘୁଂଚିପାରେ ବୋଲି ଆଶଙ୍କା କରାଯାଉଛି । ଯଦିିଓ ଏବେ ୟୁପିରେ କରୋନା ସଂକ୍ରମଣ ଦିଲ୍ଲୀ, ମହାରାଷ୍ଟ୍ର ଏବଂ ତାମିଲନାଡୁଠୁ କମ୍ ରହିଛି ହେଲେ ସମ୍ଭାବ୍ୟ ଆଶଙ୍କା କରି ନିର୍ବାଚନ ତାରିଖ ଘୁଂଚିପାରେ ବୋଲି କୁହାଯାଉଛି ।
ଚଳିତବର୍ଷ ଡେଲଟା ଭ୍ୟାରିଆଂଟ ବେଳେ ପଶ୍ଚିମବଙ୍ଗ ସମେତ ଅନେକ ରାଜ୍ୟରେ ବିଧାନସଭା ନିର୍ବାଚନ ହୋଇଥିଲା । ଆଉ ଏହି ସମୟରେ କରୋନା ସଂକ୍ରମଣ ପିକରେ ପହିଂଚିଥିଲା । ଅନେକ ପ୍ରାଣ ମଧ୍ୟ ହରାଇଥିଲେ । ଏହାକୁ ନେଇ ସେତେବେଳେ ମାଡ୍ରାସ ହାଇକୋର୍ଟ ନିର୍ବାଚନ କମିଶନଙ୍କ ଉପରେ ବର୍ଷିଥିଲେ । ଏବେ ଆହ୍ଲାବାଦ ହାଇକୋର୍ଟ ସମ୍ଭାବ୍ୟ ଆଶଙ୍କାକୁ ଦେଖି ୟୁପି ବିଧାନସଭା ନିର୍ବାଚନ ଘୁଂଚାଇବାକୁ ପରାମର୍ଶ ଦେଇଛନ୍ତି ।
ଆସନ୍ତାବର୍ଷ ୫ ରାଜ୍ୟର ବିଧାନସଭା ନିର୍ବାଚନ ରହିଛି । ଏହା ପୂର୍ବରୁ ବିଭିନ୍ନ ରାଜ୍ୟକୁ ଯାଇ ସ୍ଥିତି ସମୀକ୍ଷା କରୁଛନ୍ତି ନିର୍ବାଚନ କମିଶନ । ଗୋଆ ପରେ ଏବେ ଉତରାଖଣ୍ଡ ଯିବେ ନିର୍ବାଚନ ଅଧିକାରୀ । ଏହାପରେ ସ୍ଥିତି ଦେଖି ନିର୍ବାଚନ ତାରିଖ ଘୋଷଣା କରିବେ ନିର୍ବାଚନ କମିଶନ ।
ମହାରାଷ୍ଟ୍ର, ତାମିଲନାଡୁ, ଦିଲ୍ଲୀରେ ଓମିକ୍ରନ ସଂକ୍ରମଣ ବଢିବାରେ ଲାଗିଛି । ଯାହାକି କେନ୍ଦ୍ର ଓ ସଂପୃକ୍ତ ରାଜ୍ୟ ସରକାରଙ୍କ ପାଇଁ ଚିନ୍ତାର କାରଣ ପାଲଟିଛି । ଅନ୍ୟପଟେ ବିଧାନସଭା ନିର୍ବାଚନ ହେବାକୁ ଥିବା ରାଜ୍ୟକୁ କଟକଣା ଲଗାଇବା ସହିତ ଟିକାଟକରଣକୁ ଜୋରଦାର କରିବାକୁ କେନ୍ଦ୍ର କହିଛିା