ରାଜ୍ୟରେ ଶେଷ ହେଲା ଠିକା ନିଯୁକ୍ତିର ଯୁଗ । ସ୍ଥାୟୀ ହେବେ ୫୭ ହଜାର କର୍ମଚାରୀ, ଆଜି ବିଦ୍ଧିବଦ୍ଧ ଭାବେ ପ୍ରକାଶ ପାଇବ ବିଜ୍ଞପ୍ତି
କନକ ବ୍ୟୁରୋ : ରାଜ୍ୟରେ ଉଠିଲା ଚୁକ୍ତି ଭିତିକ ନିଯୁକ୍ତି ପ୍ରଥା । ଜନ୍ମଦିନର ଗୋଟିଏ ଦିନ ପୂର୍ବରୁ ଏହାକୁ ରାଜ୍ୟବାସୀଙ୍କ ପାଇଁ ଦୀପାବଳୀ ଭେଟି କହି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରାଜ୍ୟ କ୍ୟାବିନେଟ ଚୁକ୍ତିଭିତିକ ନିଯୁକ୍ତି ବ୍ୟବସ୍ଥାକୁ ସବୁଦିନ ପାଇଁ ଉଛେଦ କରିବାକୁ ନିଷ୍ପତି ନେଇଥିବାକୁ କହିଛନ୍ତି । ଏବେ ବି ଅନେକ ରାଜ୍ୟରେ ନିୟମିତ ନିଯୁକ୍ତି ବନ୍ଦ ଅଛି । ଚୁକ୍ତିଭିତିକ ନିଯୁକ୍ତି ଚାଲିଛି । କିନ୍ତୁ ଓଡିଶାରେ ଚୁକ୍ତିିଭିତିକ ନିଯୁକ୍ତିର ଯୁଗ ଶେଷ ହୋଇଛି । ସବୁ ଚୁକ୍ତିଭିତିକ ନିଯୁକ୍ତି ନିୟମିତ ହେବ । ବହୁ ଦିନ ଧରି ଏହି ଶୁଭ ଦିନକୁ ଅପେକ୍ଷା କରିଥଲି ବୋଲି ମୁଖ୍ୟମନ୍ତ୍ରୀ କହିଛନ୍ତି । ତେବେ ଆଜି ଏନେଇ ବିିଦ୍ଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ ପାଇବ । ୫୭ ହଜାରରୁ ଅଧିକ କର୍ମଚାରୀ ନିୟମିତ ହେବେ । ଏଥିପାଇଁ ରାଜ୍ୟ ବଜେଟରୁ ଆଉ ହାରାହାରି ୧୩ଶହ କୋଟିରୁ ଅଧିକ ଟଙ୍କା ଖର୍ଚ୍ଚ ହେବ । ସେମାନଙ୍କ ପରିବାର ପାଇଁ ଏହା ଆଗୁଆ ଦୀପାବଳୀ ଭେଟି ବୋଲି କହିଛନ୍ତି ନବୀନ ।
ଏଥିସହ ସରକାରୀ କର୍ମଚାରୀମାନଙ୍କୁ ଭଲ କାମ କରିବାକୁ ଅପିଲ କରିଛନ୍ତି ମୁଖ୍ୟମନ୍ତ୍ରୀ । ଦାୟିିତ୍ୱପାଳନ ବେଳେ ୫ଟି ଉପକ୍ରମ – ଟିମ ୱାର୍କ, ଟେକ୍ନୋଲୋଜି, ଟ୍ରାନ୍ସପ୍ୟାରେନ୍ସି ଓ ଟ୍ରାନ୍ସଫରମେସନକୁ ଅନୁସରଣ କରିବାକୁ କହିଛନ୍ତି ନବୀନ । ଏଥିସହ ସେ କ୍ଷମତାକୁ ଆସିବା ସମୟରେ ରାଜ୍ୟର ଆର୍ଥିକ ସ୍ଥିତି କେମିତି ଥିଲା, କାହିଁକି ଚୁକ୍ତି ଭିତିକ ନିଯୁକ୍ତି ଆରମ୍ଭ କରିଥିଲେ ତାହା ଗୋଟି ଗୋଟି କରି ବଖାଣିଛନ୍ତି ମୁଖ୍ୟମନ୍ତ୍ରୀ । ତେବେ ବିଜେପି କହିଛି ୨୦୧୩ରେ ନିଜେ ନେଇଥିବା ଭୁଲକୁ ସ୍ୱୀକାର କରି କିଛି ସମାଧାନର ପ୍ରୟାସ କରାଯାଇଛି । ଓଡ଼ିଶାରେ ପଞ୍ଜିକୃତ ୮ ଲକ୍ଷ ୮୦ ହଜାର ଶିକ୍ଷିତ ଯୁବପିଢିଙ୍କୁ କେବେ ନିଯୁକ୍ତି ମିଳିବ ବୋଲି ପ୍ରଶ୍ନ କରିଛନ୍ତିି ବିଜେପି ନେତା ଜୟ ନାରାୟଣ ମିଶ୍ର ।
Kanak News is now on WhatsApp
Join and get latest news updates delivered to you via WhatsApp
ଚୁକ୍ତି ଭିତିକ ନିଯୁକ୍ତି ପ୍ରଥା ଉଠିବା ପରେ ଠିକା ଚାକିରୀ କରିଥିବା କର୍ମଚାରୀଙ୍କ ପକ୍ଷରୁ ଉତ୍ସବ ମନା ଯାଇଛି । ଶହ ଶହ ସଂଖ୍ୟାରେ ଠିକା କର୍ମଚାରୀ ଭୁବନେଶ୍ୱରରେ ଏକାଠି ହୋଇ ବାଜା ବଜାଇ ବାଣ ଫୁଟାଇ, ପରସ୍ପରକୁ ମିଠା ଖୁଆଇ ରାଜ୍ୟ ସରକାରଙ୍କ ନିଷ୍ପତିକୁ ସ୍ୱାଗତ କରିଛନ୍ତି ।