ବନ୍ୟା ଉଜାଡିଦେଲା ସୁନାର ଫସଲ । ଅତି କଷ୍ଟରେ ଧାର କରଜ କରି ନିଜ ଜମିରେ କରିଥିଲେ ଚାଷ । ଚାଷୀର ଅଣ୍ଟା ଭାଙ୍ଗିଦେଲା ପାଞ୍ଚଦିନର ବନ୍ୟା ।
କନକ ବ୍ୟୁରୋ: ବନ୍ୟା ଜଳ ନେଇ ଆସିଛି ଚାଷୀଙ୍କ ପାଇଁ ନାହିଁନଥିବା ଦୁଃଖ । କେନ୍ଦ୍ରାପଡା ଜିଲ୍ଲା ମାର୍ଶାଘାଈ ବ୍ଲକ ଅର୍ନ୍ତଗତ ଗହଗାପାଟରେ ଚାଷୀଙ୍କ ପାଇଁ ଦୁଃଖ ଆଣିଛି ବନ୍ୟାଜଳ । ଉଦବୃତ ବର୍ଷା ପାଣି ନିଷ୍କାସିତ ନହୋଇପାରି ଜମି ରହିବା ଫଳରେ ସୃଷ୍ଟି ହୋଇଛି ବନ୍ୟା ଭଳି ପରିସ୍ଥିତି । ଗହଗା ପାଟରେ ଥିବା ଚାଷ ଜମିରେ ଅକାତ କାତ ପାଣି ଲହଡି ମାରୁଥିବା ବେଳେ ଚାଷୀ ଚାଷ କରିଥିବା ପନିପରିବା ଏବଂ ଧାନ ଫସଲ ପାଣିରେ ବୁଡି ରହି ପଚି ଶଢି ନଷ୍ଟ ହୋଇଯାଇଛି । ଧାର କରଜ କରି ଚାଷ କରିଥିବା ଚାଷୀ, ଫସଲ ଉଜୁଡିବା ଦେଖି ଏବେ ମୁଣ୍ଡରେ ହାତ ଦେଇ ବସିଛନ୍ତି । ଚିତ୍ରତ୍ପୋଳା ନଦୀରେ ବନ୍ୟାଜଳ ପ୍ରବାହୀତ ହେଉଥିବାରୁ ନାରଣପୁର ଏବଂ ମାଛମରା ସ୍ଲୁଇସ୍ ଗେଟ୍ ବନ୍ଦ ରହିବା କାରଣରୁ ବର୍ଷା ପାଣି ନିଷ୍କାସିତ ହୋଇ ନପାରିବା ଏପରି ସ୍ଥିତି ସୃଷ୍ଟି ହୋଇଛି । ଯାହା ଫଳରେ ପରକୁଳା. ବଛରେଇ, ବନ୍ଧକଟା, ରାଘବପୁର ଏବଂ ଆଖୁଆ ଦକ୍ଷିଣୀ ଇତ୍ୟାଦି ପ୍ରାୟ ୬ ପଞ୍ଚାୟତର ହଜାର ହଜାର ହେକ୍ଟର ଚାଷ ଜମି ବୁଡି ରହିଛି । ଚାଷୀମାନେ ଗହଗା ପାଟ ସମସ୍ୟା ବିଷୟରେ ସରକାର ଓ ବିଭାଗୀୟ ଅଧୀକାରୀଙ୍କୁ ଜଣାଇଥିଲେ ବି ଆଜି ପର୍ଯ୍ୟନ୍ତ ସମସ୍ୟାର ସମାଧାନ ହୋଇପାରିନି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଆଠଗଡ଼ ରାଜନଗର ପଞ୍ଚାୟତର ଦୁଇ ସାଙ୍ଗ ଧାର ଉଦ୍ଧାର କରି ଦେଢ ଏକର ଜମିରେ ବାଇଗଣ, ମାଛ ଓ ଗେଣ୍ଡୁଫୁଲ ଚାଷ କରିଥିଲେ । ମହାନଦୀର ପଛୁଆ ପାଣି ଆସି ୭ ଦିନ ଧରି ଜମି ରହିବା ଯୋଗୁଁ ଜଳମଗ୍ନ ହୋଇଥିଲା ଚାଷ ଜମି । ଫଳରେ ବାଇଗଣ ଓ ଗେଣ୍ଡୁ ଚାଷ ସମ୍ପୁର୍ଣ୍ଣ ନଷ୍ଟ ହେବା ସହ ପୋଖରୀରୁ ମାଛ ବନ୍ୟା ପାଣିରେ ଭାସିଯାଇଛନ୍ତି । ଭାଗରେ ଚାଷ କରିଥିବା ଦୁଇ ସାଙ୍ଗ ଲକ୍ଷ ଲକ୍ଷ ଟଙ୍କାର କ୍ଷତି ସହିଛନ୍ତି । ପରିବା ଫସଲ ସହ ଧାନ ଚାଷ ମଧ୍ୟ ସମ୍ପୁର୍ଣ୍ଣ ନଷ୍ଟ ହୋଇଛି । ବନ୍ୟା ପାଣିରେ ଧାନ ଗଛ ଗୁଡ଼ିକ ପୋଚା ହୋଇଯାଇଛି । ଆଠଗଡ଼ ବ୍ଲକ ରାଜନଗର, ବାଲିପଦା, ତାରଡ଼ିଖାଲ, ଲିଙ୍ଗାପଦା, ମଂଚେଶ୍ୱର ଓ ଜେନାପୁର ଅଞ୍ଚଳରେ ଚାଷୀଙ୍କ ହେକ୍ଟର ହେକ୍ଟର ଧାନ ଚାଷ ନଷ୍ଟ ହୋଇଛି । ସରକାରୀ ସହାୟତାକୁ ଅପେକ୍ଷା କରିଛନ୍ତି ବନ୍ୟା ପୀଡ଼ିତ ।