ବିରୋଧୀଙ୍କ ମେଳି କରିବେ ତାମିଲନାଡୁ ମୁଖ୍ୟମନ୍ତ୍ରୀ: ଷ୍ଟାଲିନଙ୍କ ବୈଠକକୁ ବିଜେଡିକୁ ନିମନ୍ତ୍ରଣ
କନକ ବ୍ୟୁରୋ: କଂଗ୍ରେସ ନେତା ରାହୁଲଙ୍କ ଗାନ୍ଧିଙ୍କ ଲୋକସଭା ସଭ୍ୟ ପଦ ରଦ୍ଦ ନେଇ ଦେଶର ରାଜନୀତି ସରଗରମ ଥିବାବେଳେ ପୁଣି ବିରୋଧୀଙ୍କୁ ଏକାଠି କରିବାକୁ ଉଦ୍ୟମ ଆରମ୍ଭ ହୋଇଛି । ଆଉ ଏହି ଉଦ୍ୟମ ଆରମ୍ଭ କରିଛନ୍ତି ସବୁ ପ୍ରସଙ୍ଗରେ କଂଗ୍ରେସର ସାଥ ଦେଉଥିବା ଡିଏମକେ ମ୍ରୁଖ୍ୟ ତଥା ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ । ସାମାଜିକ ନ୍ୟାୟ ପ୍ରସଙ୍ଗରେ ଏପ୍ରିଲ ୩ ତାରିଖ ତଥା ଆସନ୍ତା ସୋମବାର ଦିନ ଚେନ୍ନାଇରେ ଏକାଠି ହେବାକୁ ୧୪ ଦଳକୁ ନିମନ୍ତ୍ରଣ କରିଛନ୍ତି ଷ୍ଟାଲିନ । ଆଉ ସବୁଠାରୁ ବଡ କଥା ହେଲା, ବିଜେଡି ଓ ବିଜେପିର ଅତି ନିକଟତର ଥିବା ଆନ୍ଧ୍ରର ୱାଇଏସଆର କଂଗ୍ରେସକୁ ବୈଠକରେ ଯୋଗଦେବାକୁ ନିମନ୍ତ୍ରଣ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ବିରୋଧୀଙ୍କୁ ଏକାଠି କରିବାକୁ ଅନେକ ବୈଠକ ହୋଇଥିଲେ ବି ନିମନ୍ତ୍ରଣ ପାଇ ବିଜେଡି ଏଥିରେ ସାମିଲ ହୋଇନାହିଁ । ବିଜେପି ଓ କଂଗ୍ରେସଠାରୁ ସମଦୂରତ୍ୱ କଥା କହି ସବୁ ବୈଠକରୁ ଦୂରେଇ ରହୁଛି ବିଜେଡି । ଆଉ ଷ୍ଟାଲିନ ଡାକିଥିବା ବୈଠକରେ ବିଜେଡି ସାମିଲ ହେଉଛି ନା ନାହିଁ ତା ଉପରେ ସମସ୍ତଙ୍କ ନଜର ରହିଛି ।
କୁହାଯାଉଛି, ଷ୍ଟାଲିଙ୍କ ଏହି ବୈଠକରେ ଇଡି ଓ ସିବିଆଇ ଭଳି କେନ୍ଦ୍ରୀୟ ତଦନ୍ତକାରୀ ସଂସ୍ଥାର କାର୍ଯ୍ୟର୍ଶୈଳୀ ନେଇ ଆଲୋଚନା ହୋଇପାରେ । ୧୪ଟି ଦଳ କୋର୍ଟ ଯିବା ନେଇ ବୈଠକରେ ଆଲୋଚନା ହୋଇପାରେ । ଷ୍ଟାଲିନଙ୍କ ଶକ୍ତି ପ୍ରଦର୍ଶନରେ ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ, ବିହାର ଉପମୁଖ୍ୟମନ୍ତ୍ରୀ ତେଜସ୍ୱ ଯାଦବ, ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କ ସମେତ କଂଗ୍ରେସ, ଏନସିପି, ତୃଣମୂଳ କଂଗ୍ରେସ, ବିଆରଏସ, ବାମପନ୍ଥୀ ଦଳର ନେତା ସାମିଲ ହେବେ । ତେବେ ଅନେକ ବିରୋଧୀ ନେତା ମତ ହେଉଛି, ଯଦି ବିଜେଡି ଓ ୱାଇଏସଆର କଂଗ୍ରେସ ଯୋଗଦିଅନ୍ତି ତେବେ ବୈଠକର ପ୍ରଭାବ ଅଧିକ ହୋଇପାରିବ । ଏଭଳି ଚର୍ଚ୍ଚା ଭିତରେ ବିଜେଡି ନେତା ପ୍ରସନ୍ନ ଆଚାର୍ଯ୍ୟ ସମଦୂରତା କଥା କହି ପ୍ରସଙ୍ଗକୁ ଏଡାଇଯାଇଛନ୍ତି ।
କିଛି ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, ଷ୍ଟାଲିନଙ୍କ ଶକ୍ତି ପ୍ରଦର୍ଶନରେ ବିଜେଡି ନେତା ସସ୍ମିତ ପାତ୍ର ଓ ୱାଇଏସଆର କଂଗ୍ରେସର ପ୍ରତିନିଧି ସାମିଲ ହୋଇପାରନ୍ତି । କିନ୍ତୁ ଏ ନେଇ ବିଜେଡି ପକ୍ଷରୁ କିଛି ସ୍ପଷ୍ଟ ସୂଚନା ମିଳିନାହିଁ ।