ଘରେ ପହଞ୍ଚିବା ପୂର୍ବରୁ ଟେକିନେଲା ଜମ । ଟ୍ରେନ୍ ଦୁର୍ଘଟଣାରେ ଚାଲିଗଲା ଶିବ ଶଙ୍କରଙ୍କ ଜୀବନ, ଭାଙ୍ଗିପଡିଛି ପୂରା ପରିବାର
କନକ ବ୍ୟୁରୋ : ମାତ୍ର ୧୦ ମିନିଟ୍ ପରେ ଠିକଣାସ୍ଥଳରେ ପହଂଚିଥାନ୍ତେ । ଘରକୁ ପହଂଚିବା ପୂର୍ବରୁ ଝିଅ ସହ ଫୋନରେ କଥା ହୋଇଥିଲେ । ଆଉ କିଛି ଘଂଟା ପରେ ଘରକୁ ଯିବେ ବୋଲି କହିଥିଲେ । ହେଲେ, ସେ ଘରକୁ ପହଂଚିବା ତ’ ଦୂରର କଥା, ଜୀବନ୍ତ ବି ଫେରିପାରିଲେ ନାହିଁ । ଏହି କାହାଣୀ ହେଉଛି, ଯାଜପୁର ଜିଲ୍ଲା ଶିବ ଶଙ୍କର ସାହୁଙ୍କର ।
Kanak News is now on WhatsApp
Join and get latest news updates delivered to you via WhatsApp
ପେଶାରେ ଲୁଗା ବ୍ୟବସାୟୀ ଥିବା ଶିବ ଶଙ୍କର ପ୍ରତିଥର ଭଳି ଏଥର ବି କଲିକତା ଯାଇଥିଲେ ଲୁଗା ଆସିଲେ ବ୍ୟବସାୟ କରିବେ । ହେଲେ ନାଁ ଲୁଗା ପହଂଚିପାରିଲା ନା’ ସେ ପହଂଚିପାରିଲେ । ଦୁର୍ଭାଗ୍ୟ ଦେଖନ୍ତୁ ଯେତେଥର ବି ସେ ବ୍ୟବସାୟିକ କାମରେ କଲିକତା ଯାଉଥିଲେ, ସବୁ ବେଳେ ଜନ ସତାବ୍ଦୀ ଏକ୍ସପ୍ରେସରେ ଯାଉଥିଲେ । ହେଲେ, ଠିକ୍ ଦୁର୍ଘଟଣା ଘଟିବା ଦିନର କିଛି ଘଂଟା ପୂର୍ବରୁ କରମଣ୍ଡଳ ଏକ୍ସପ୍ରେସରେ ଘରକୁ ଫେରିବାକୁ ନିଷ୍ପତି ନେଇଥିଲେ । ଶିବ ଶଙ୍କର ଘରକୁ ଫେରୁଥିବା ଜାଣି ପରିବାର ଲୋକ ଖୁସି ଥିଲେ । ହେଲେ ଘରକୁ ପହଂଚିବା ପୂର୍ବରୁ ଯେଉଁ ସମ୍ବାଦ ଆସିଥିଲା, ତାହା ପରିବାରକୁ ଦୋହଲାଇ ଦେଇଥିଲା । କରମଣ୍ଡଳ ଏକ୍ସପ୍ରେସ୍ ଦୁର୍ଘଟଣା ଗ୍ରସ୍ତ ହୋଇଛି । ଶହ ଶହ ଲୋକଙ୍କ ମୃତ୍ୟୁର ଖବର ଆସୁଥିବାରୁ ପରିବାର ଲୋକ ପୁରା ଭାଙ୍ଗିପଡ଼ିଥିଲେ । ଆଉ ସତକୁ ସତ ସେଇଆ ହୋଇଥିଲା, ଖବର ଆସିଲା ଶିବଶଙ୍କର ସାହୁଙ୍କର ଦୁର୍ଘଟଣାରେ ଦେହାନ୍ତ ହୋଇଛି ।