ସମାପ୍ତ ହେବ ପଞ୍ଜାବ କଂଗ୍ରେସର କନ୍ଦଳ ! ସିଦ୍ଧୁଙ୍କ ସହ ମିଶି କାମ କରିବାକୁ ପ୍ରସ୍ତୁତ ଅଛନ୍ତି ମୁଖ୍ୟମନ୍ତ୍ରୀ ଚନ୍ନି
କନକ ବ୍ୟୁରୋ: ଚଳିତ ବର୍ଷ ପଞ୍ଜାବରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଏହା ପୂର୍ବରୁ ରାଜ୍ୟ କ୍ଷମତାରେ ଥିବା କଂଗ୍ରେସ ଦଳର ଭିତିରି କନ୍ଦଳ ସମାପ୍ତ ହେବ ବୋଲି ଆଶା କରାଯାଉଛି । ଶନିବାର ଦିନ ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତସିଂ ଚନ୍ନି କହିଛନ୍ତି କି ସେ ପଞ୍ଜାବ ରାଜ୍ୟ ଅଧ୍ୟକ୍ଷ ନବଜ୍ୟୋତସିଂ ସିଦ୍ଧୁଙ୍କ ସଳ ମିଳିତ ଭାବେ କାମ କରିବାକୁ ପ୍ରସ୍ତୁତ ଅଛନ୍ତି । ଏହାସହ ସେ କହିଛନ୍ତି କି କଂଗ୍ରେସ ଦଳ ପାଇଁ ସେ କିଛି ବି ତ୍ୟାଗ କରିବାକୁ ପ୍ରସ୍ତୁତ ଅଛନ୍ତି । ମୁଖ୍ୟମନ୍ତ୍ରୀ ଚନ୍ନିଙ୍କ ଏଭଳି ବୟାନ ଚନ୍ନି ଓ ସିଦ୍ଧୁଙ୍କ ମଧ୍ୟରେ ଚାଲିଥିବା ଶୀତଳଯୁଦ୍ଧର ପୃଷ୍ଟଭୂମିରୁ ଆସିଛି । କହିରଖୁ କି ସିଦ୍ଧୁ ବାରମ୍ବାର ନିଜ ସରକାର ବିରୋଧରେ ସମାଲୋଚନା କରିଆସୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପଞ୍ଜାବ ସରକାରଙ୍କ ବିରୋଧରେ ସିଦ୍ଧୁ ଦେଉଥିବା ବୟାନକୁ ନେଇ ଚନ୍ନି କହିଛନ୍ତି କି ସିଦ୍ଧୁ କଂଗ୍ରେସ ପାର୍ଟିର ଜଣେ ସଚ୍ଚା ସିପାହୀ ଓ ପୂରା ସଚ୍ଚୋଟତାର ସହ ସେ ଦଳ ପାଇଁ କାମ କରୁଛନ୍ତି । ତେଣୁ ତାଙ୍କ ସହ ମିଳିତ ଭାବେ କାମ କରିବାରେ କିଛି ଅସୁବିଧା ନାହିଁ ବୋଲି ଚନ୍ନି ସ୍ପଷ୍ଟ କରିଦେଇଛନ୍ତି ।
କହିରଖୁ କି କିଛିଦିନ ହେବ ସିଦ୍ଧୁ ବାରମ୍ବାର ପଞ୍ଜାବ ସରକାରଙ୍କୁ ସମାଲୋଚନା କରିବାରେ ଲାଗିଛନ୍ତି । ସେପଟେ ଗତବର୍ଷ ପାର୍ଟି ପକ୍ଷରୁ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଇ ଚନ୍ନିଙ୍କୁ ମୁଖ୍ୟମନ୍ତ୍ରୀ କରାଯାଇଥିଲା । ଏହାସହ ସିଦ୍ଧୁଙ୍କୁ ସନ୍ତୋଷ୍ଟ କରିବାକୁ ଦଳ ରାଜ୍ୟ କଂଗ୍ରେସର ଅଧ୍ୟକ୍ଷ ଭାବେ ସିଦ୍ଧୁଙ୍କ ନାମ ଘୋଷଣା କରିଥିଲା । ହେଲେ ଏବେ ସିଦ୍ଧୁ ଜିଦଧରିଛନ୍ତି କି, ନିର୍ବାଚନ ପୂର୍ବରୁ କଂଗ୍ରେସ ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରୁ ।