ସିଡିଏସ ହେଲିକପ୍ଟର ଦୁର୍ଘଟଣା : ଶେଷ ହେଲା ଭାରତୀୟ ବାୟୁସେନାର କୋର୍ଟ ଅଫ ଇନକ୍ୱାରୀ, ଜାଣନ୍ତୁ କେମିତି ହୋଇଥିଲା ଦୁର୍ଘଟଣା
କନକ ବ୍ୟୁରୋ : ଦେଶର ପ୍ରଥମ ସିଡିଏସ ଜେନରାଲ ବିପିନ ରାୱତଙ୍କ ହେଲିକପ୍ଟର ଆଇ-୧୭ ବି ୫ ଦୁର୍ଘଟଣାକୁ ନେଇ ବାୟୁସେନାର କୋର୍ଟ ଅଫ୍ ଇନକ୍ୱାରୀ ଶେଷ ହୋଇଛି । ଦୁର୍ଘଟଣାର କାରଣ ନେଇ ଏପର୍ଯ୍ୟନ୍ତ ଅଧିକାରୀ ସ୍ତରରେ କିଛି ବୟାନ ଜାରି କରାଯାଇ ନଥିବା ବେଳେ ସୂତ୍ର ସୂଚନା ମୁତାବକ ଖରାପ ପାଗ ଯୋଗୁଁ ଦୁର୍ଘଟଣା ହୋଇଥିବା କୁହାଯାଉଛି । କୁହାଯାଉଛି କି ଏୟାର ମାର୍ଶଲ ମାନବେନ୍ଦ୍ର ସିଂଙ୍କ ନେତୃତ୍ୱରେ ହୋଇଥିବା ଯାଂଚରେ ଖରାପ ପାଗ ଯୋଗୁଁ ପାଇଲଟଙ୍କ ଧ୍ୟାନ ବିପଥଗାମୀ ହୋଇଯାଇଥିଲା ଓ ଦୁର୍ଘଟଣା ଘଟିଥିଲା ।
Kanak News is now on WhatsApp
Join and get latest news updates delivered to you via WhatsApp
ଟେକନିକ ଆଧାରରେ କୁହାଗଲେ ଏଭଳି ଦୁର୍ଘଟଣା ସେତେବେଳେ ଘଟିଥାଏ ଯେତେବେଳେ ପାଇଲଟ୍ ବିଭ୍ରାନ୍ତ ହୋଇ ସ୍ଥିତି ଉପରେ ଅନୁମାନ ନଲଗାଇ ପାରେ । ଏଭଳି ଦୁର୍ଘଟଣା ବିଶେଷ ଭାବେ ଖରାପ ପାଗ ବେଳେ ଦେଖିବାକୁ ମିଳିଥାଏ । ଯେତେବେଳେ ପାଇଲଟ ହେଲିକପ୍ଟରକୁ ଲ୍ୟାଣ୍ଡ କରିବାକୁ ଚେଷ୍ଟା କରେ ସେତେବେଳେ ପାଇଲଟଙ୍କୁ ହେଲିକପ୍ଟକୁ କଣ୍ଟ୍ରୋଲ କରିବା ବଡ ମୁସ୍କିଲ ହୋଇପଡିଥାଏ ।
ଅନ୍ୟପଟେ ଇନକ୍ୱାରୀ ଟିମ୍ ଏଭଳି ସମ୍ଭାବନାକୁ ଖାରଜ କରିଛି କି ହେଲିକପ୍ଟରରେ କୌଣସି ଟେକ୍ନିକାଲ ଅସୁବିଧା ଥିଲା । ଏହାସହ ଯାଂଚ ଟିମ୍ ନିଜ ରିପୋର୍ଟକୁ ଆହୁରି ମଜବୁତ କରିବାକୁ ବାୟୁସେନାର ଲିଗାଲ ଡିପାର୍ଟମେଣ୍ଟର ପରାମର୍ଶ ନେଉଛି । ଆଶା କରାଯାଉଛି କି ୪/୫ ଦିନ ମଧ୍ୟରେ ଏହି ରିପୋର୍ଟକୁ ବାୟୁସେନା ପ୍ରମୁଖ ଏୟାର ଚିଫ୍ ମାର୍ଶଲ ବିଆର ଚୌଧୁରୀଙ୍କୁ ଦିଆଯିବ ।