ସାମ୍ନାକୁ ଆସିଲେ ପ୍ରଦୀପ: କହିଲେ, ଆଘାତ ଯୋଗୁଁ ଚାଲିଛି ଚିକିତ୍ସା, ଦଳ ସହ ଥିବା ନେଇ ଦେଲେ ସ୍ପଷ୍ଟୀକରଣ
କନକ ବ୍ୟୁରୋ: କୁଆଡେ ଗଲେ ପୂର୍ବତନ ସାଂସଦ ତଥା ବିଜେଡି ନେତା ପ୍ରଦୀପ ମାଝୀ । କିଛି ଦିନ ହେଲା କୌଣସି ସରକାର ଓ ବେସରକାରୀ କାର୍ଯ୍ୟକ୍ରମରେ ପ୍ରଦୀପଙ୍କ ଦେଖା ନମିଳିବା ପରେ ଏଭଳି ଚର୍ଚ୍ଚା ଜୋର ଧରିଛି । ଆଉ ଦୁଇଦିନର ଚର୍ଚ୍ଚା ପରେ ସାମ୍ନାକୁ ଆସିଛନ୍ତି ଖୋଦ୍ ପ୍ରଦୀପ ମାଝି । ଆଉ ଗୋଡ଼ରେ ଆଘାତ ଯୋଗୁଁ ଅସ୍ତ୍ରୋପଚାର ହୋଇଛି ଓ ଫିଜିଓ ଥେରାପୀ ଚାଲିଛି ବୋଲି ପ୍ରତିକ୍ରିୟା ରଖିଛନ୍ତି ପ୍ରଦୀପ । ପ୍ରଦୀପ କହିଛନ୍ତି, ସେ ସମ୍ପୂର୍ଣ୍ଣ ଭାବେ ବିଜୁ ଜନତା ଦଳ ସହ ରହିଛନ୍ତି । ଯାହା ଦଳୀୟ ନିର୍ଦ୍ଦେଶ ଆସିବ ତାଙ୍କୁ ପାଳନ କରିବେ ବୋଲି କହିଛନ୍ତି ପ୍ରଦୀପ ମାଝୀ ।
Kanak News is now on WhatsApp
Join and get latest news updates delivered to you via WhatsApp
ବିଜେଡିର ପ୍ରଦୀପ ମାଝିଙ୍କୁ ନେଇ ବଢୁଛି ସସପେନ୍ସ । ଗତକିଛି ଦିନ ଧରି କୌଣସି କାର୍ଯ୍ୟକ୍ରମରେ ପ୍ରଦୀପ ମାଝିଙ୍କୁ ଦେଖିବାକୁ ମିଳୁନାହିଁ । ଆଉ ଏହାକୁ ନେଇ ରାଜ୍ୟ ରାଜନୀତି ସରଗରମ ହୋଇଛି ।
ଅବିଭିକ୍ତ କୋରାପୁଟ ଜିଲ୍ଲାରେ ପ୍ରଦୀପ ମାଝିଙ୍କ ଭଲ ଦବଦବା ରହିଛି । ୨୦୨୨ ପଂଚାୟତ ନିର୍ବାଚନ ପୂର୍ବରୁ କଂଗ୍ରେସରୁ ଆସି ବିଜେଡିରେ ମିଶିଥିଲେ ପ୍ରଦୀପ । ଆଉ ଏହା ପରେ ତାଙ୍କୁ ବିଜେଡିର ରାଜ୍ୟ ସାଧାରଣ ସମ୍ପାଦକ ପଦ ସହ ସ୍ୱତନ୍ତ୍ର ଉନ୍ନୟନ ପରିଷଦ(ଏସଡିସି)ର ଉପଦେଷ୍ଟା ଭାବେ ଗୁରୁଦାୟିତ୍ୱ ଦିଆଯାଇଥିଲା । କିନ୍ତୁ ରାଜନୀତିରେ ସକ୍ରିୟ ଥିବା ପ୍ରଦୀପ ମାଝି ଏବେ ପୁରା ନୀରବ । କିଛି ଦିନ ହେଲା ସରକାରୀ କି ବେସରକାରୀ କାର୍ଯ୍ୟକ୍ରମରେ ପ୍ରଦୀପଙ୍କୁ ଦେଖିବାକୁ ମିଳୁନାହିଁ । ଆଉ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଛି ।
୧୨ ତାରିଖରେ ମୁଖ୍ୟମନ୍ତ୍ରୀଙ୍କ ମାଲକାନଗିରି ଗସ୍ତବେଳେ ପ୍ରଦୀପଙ୍କ ଦେଖା ମିଳିନଥିଲା । ଏପରିକି ଏସଡିସିର କ୍ରୀଜା ମହୋତ୍ସବରେ ବି ସେ ଯୋଗଦେଇନାହାନ୍ତିା ରାୟଗଡାର ଆଦି ରନ-୨୦୨୩ ମାରାଥନରେ ପ୍ରଦୀପଙ୍କ ଅନୁପସ୍ଥିତି ନେଇ ଆଲୋଚନା ଲାଗିରହିଛି ।
ସେପଟେ ବିଭିନ୍ନ କାର୍ଯ୍ୟକ୍ରମରେ ଅନୁପସ୍ଥିତିକୁ ନେଇ ଦ୍ୱନ୍ଦ ସୃଷ୍ଟି ହେବା ପରେ ସାମ୍ନାକୁ ଆସି ସଫେଇ ରଖିଛନ୍ତି ଖୋଦ ପ୍ରଦୀପ ମାଝି । କହିଛନ୍ତି, ଗୋଡ଼ରେ ଆଘାତ ଯୋଗୁଁ ଅସ୍ତ୍ରୋପଚାର ହୋଇଛି ଓ ଫିଜିଓ ଥେରାପୀ ଚାଲିଛି । ସମ୍ପୂର୍ଣ୍ଣ ଭାବେ ବିଜୁ ଜନତା ଦଳ ସହ ଅଛି । ହସ୍ପିଟାଲରୁ ଡିସଚାର୍ଜ ହେବା ପରେ କାମ ତ୍ୱରାନ୍ୱିତ କରିବି । ଦଳ ଯାହା ନିର୍ଦ୍ଦେଶ ଦେବ ତାକୁ ପାଳନ କରିବି । ପ୍ରଦୀପ ଚିକିତ୍ସାଧୀନ ଥିବାରୁ ରାୟଗଡାରେ ଆୟୋଜିତ ଆଦି ରନ୍-୨୦୨୩ରେ ଯୋଗ ଦେଇପାରିଲେନି ବୋଲି ଜିଲ୍ଲା ସ୍ୱତନ୍ତ୍ର ଉନ୍ନୟନ ପରିଷଦ ଅଧକ୍ଷା ଅନୁସୁୟା ମାଝୀ କହିଛନ୍ତି ।
କୋରାପୁଟରେ ସ୍ୱାଧୀନତା ଦିବସ ପାଳନ ବେଳେ ଦଶମନ୍ତପୁର ବ୍ଲକରେ ଜଣେ କୁନି ଝିଅ ନିଜ ଗାଁର ସମସ୍ୟା ମନ୍ତ୍ରୀଙ୍କ ଆଗରେ ଉପସ୍ଥାପନ କରିଥିଲେ । ମନ୍ତ୍ରୀ ଓ ଅଧିକାରୀ ହସି ତାଳି ମାରିବାକୁ ନେଇ ସୋସିଆଲ ମିଡିଆରେ ପୋଷ୍ଟ କରି ସମାଲୋଚନା କରିଥିଲେ ପ୍ରଦୀପ ମାଝି । ପ୍ରଦୀପଙ୍କ ସାନଭାଇ ପ୍ରସନ୍ନ ମାଝି ବି ବିଜେଡିର ଅଣଦେଖାକୁ ନେଇ ସୋସିଆଲ ମିଡିଆରେ ପୋଷ୍ଟ କରିଥିଲେ । ଏହାପରେ ପ୍ରଦୀପ ମାଝିଙ୍କ ଅଚାନକ ଦେଖାନମିଳିବା ଅନେକ ଚର୍ଚ୍ଚା ସୃଷ୍ଟି କରିଛି ।