କନକ ବ୍ୟୁରୋ: ରାଜଧାନୀରେ ଯେଉଁଠି ଆଖି ବୁଲାଇବେ ସେଇଠି ବଡ ବଡ ଘର । କିଏ ଦୁଇ ମହଲା କରିଛି ତ ପୁଣି କିଏ ଗଢିଛି ବଡ ବଡ ଅଟ୍ଟାଳିକା । ଏସବୁକୁ ନିଜର ସମ୍ପତି କହୁଥିବା ଲୋକ ବି ଜାଣିଛନ୍ତି ଏହାର ମାଲିକାନା କେବଳ ୯୯ ବର୍ଷ ଯାଏ । ସେହି ସମୟ ଭିତରେ ଜମିକୁ ସ୍ଥିତିବାନ ନକରେଇଲେ ଜାଗାଟି ଚାଲିଯିବ ସରକାରଙ୍କ ହାତକୁ । ଏହି ଭୟ ଭିତରେ ଅନେକ ଥିବାବେଳେ କ୍ୟାବିନେଟର ନିଷ୍ପତି ଭୁବନେଶ୍ୱର ବାସିନ୍ଦାଙ୍କୁ ଦେଇଛି ଆଶ୍ୱସ୍ତି ।
Kanak News is now on WhatsApp
Join and get latest news updates delivered to you via WhatsApp
୧୯୬୧ରେ ବିଭୂତି ଭୁଷଣ ରଥ ଖାରବେଳ ନଗରରେ ମାତ୍ର ୧୨ ହଜାର ଟଙ୍କାରେ ୩ହଜାର ବର୍ଗ ଫୁଟ ଜାଗା କିଣିଥିଲେ । ତାହା ପୁଣି ୯୯ ବର୍ଷୀୟା ଲିଜରେ । ସମୟ ଗଡିଲା , ଏହାରି ଭିତରେ ୬୫ ବର୍ଷ ବିତିଗଲାଣି । ପରିବାର ବି ବଢିଲାଣି । ବିଭୂତି ଭୁଷଣଙ୍କ ପୁଅମାନେ ଏହି ଜମିକୁ ସ୍ଥିତିବାନ କରିବାକୁ ଅନେକବାର ଚିନ୍ତା କରିଛନ୍ତି । କିନ୍ତୁ କନଭର୍ସନ ଦେୟ ୬୦ରୁ ୬୫ ଲକ୍ଷ ଟଙ୍କା ହେଉଥିବାରୁ ଏହାକୁ ସ୍ଥିତିବାନ କରିବା ସମ୍ଭବପର ନଥିଲା । କିନ୍ତୁ କନଭର୍ସନ ଦେୟ ବାବଦକୁ ଜମିର ବେଞ୍ଚମାର୍କ ୧୦ ପ୍ରତିଶତରୁ ୩ ପ୍ରତିଶତ ହୋଇଥିବାରୁ ଆଶ୍ୱସ୍ତି ହୋଇଛନ୍ତି ବିଭୂତି ଭୁଷଣଙ୍କ ପୁଅ ବିଧୁ ଭୂଷଣ ରଥ ।
ସେହିପରି ଭୁବନେଶ୍ୱରର ବିରଞ୍ଚି ନାରାୟଣ ମହାପାତ୍ର ଅବସରପ୍ରାପ୍ତ ସରକାରୀ କର୍ମଚାରୀ । ଖାରବେଳ ନଗରରେ ରହନ୍ତି । ବାପା ରାଧାଚରଣ ମହାପାତ୍ର ୧୯୬୫ରେ ମାତ୍ର ୯ ହଜାର ଟଙ୍କାରେ ଜାଗା କିଣିଥିଲେ । ଅନ୍ୟମାନଙ୍କ ଭଳି ସିଏ ବି ୯୯ ବର୍ଷୀୟ ଲିଜରେ ଜାଗା କିଣିଥିଲେ । ବେଞ୍ଚମାର୍କର ୧୦ ପ୍ରତିଶତ ଦେଲେ ଜମିଟି ତାଙ୍କ ନାଁରେ ହୋଇଥାନ୍ତା । କିନ୍ତୁ ବେଞ୍ଚମାର୍କର ୧୦ ପ୍ରତିଶତ ବି ହିସାବ କଲେ ୨୨ରୁ ୨୫ ଲକ୍ଷ ହୋଇଯିବ । ଏତେ ଟଙ୍କା ଦେବା ତାଙ୍କ ପକ୍ଷରେ ସମ୍ଭବ ନଥିଲା । ୯୯ ବର୍ଷ ପୁରିଗଲେ ଜାଗାଟି ସରକାରଙ୍କ ଖାତାକୁ ପଳାଇଯିବାର ଭୟ ତାଙ୍କୁ ବି ଥିଲା । କିନ୍ତୁ ଏବେ କନଭର୍ସନ ଦେୟ କମିଯାଇଥିବାରୁ ସେ କ୍ୟାବିନେଟର ନିଷ୍ପତିରେ ଖୁସି ଜାହିର କରିଛନ୍ତି ।
ସହରର ବିଭିନ୍ନ ଜାଗାରେ ଜମିର କନଭର୍ସନ ଦେୟ ଭିନ୍ନ ଭିନ୍ନ ରହିଛି । ବେଞ୍ଚମାର୍କ ଆଧାରରେ କନଭର୍ସନ ଦେୟ ପୈଠ କରିବେ ଜମି ମାଲିକ ।