ଛୋଟ ଛୋଟ ମାମଲାରେ ଜେଲ ଯନ୍ତ୍ରଣା ଭୋଗୁଛନ୍ତି ଗରିବ ଲୋକ। ସମ୍ବିଧାନ ଦିବସ ସମାରୋହରେ ମନ ଛୁଇଁଲା ମହାମହିମଙ୍କ ଉଦବୋଧନ।
କନକ ବ୍ୟୁରୋ: ଦେଶର ବିଭିନ୍ନ ଜେଲରେ ଯେତିକି କ୍ଷମତା ରହିଛି, ତା’ଠାରୁ ୩୦ ପ୍ରତିଶତ ଅଧିକ କଏଦୀ ଜେଲରେ ରହିଛନ୍ତି । ସ୍ଥିତି ଏପରି ହୋଇଛି ଯେ ଜେଲ ସଂଖ୍ୟା ବୃଦ୍ଧି କରିବାକୁ ଚିନ୍ତା କରୁଛନ୍ତି ସରକାର । ତେବେ ସମ୍ବିଧାନ ଦିବସ ସମାରୋହରେ କ୍ଷୋଭ ପ୍ରକାଶ କରି ରାଷ୍ଟ୍ରପତି ଦ୍ରୌପଦୀ ମୁର୍ମୁ କହିଛନ୍ତି, ଏ କେଉଁ ଭଳି ବିକାଶ, ଆମେ ଅଧିକ ସଂଖ୍ୟକ ଜେଲ କରିବାକୁ ଚାହୁଁଛୁ । ବରଂ ଯେଉଁ ଗରିବ ଲୋକ ଛୋଟ ଛୋଟ ମାମଲାରେ ବର୍ଷ ବର୍ଷ ଧରି ଜେଲର ଚାରିକାନ୍ଥ ଭିତରେ ଦିନ କାଟୁଛି, ସେ ସଂପର୍କରେ ଚିନ୍ତା କରିବାର ସମୟ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ସମ୍ବିଧାନ ଦିବସ ସମାରୋହରେ ପ୍ରଧାନ ବିଚାରପତି ଜଷ୍ଟିସ୍ ଡି.ୱାଇ. ଚନ୍ଦ୍ରଚୂଡ଼, ଆଇନ ମନ୍ତ୍ରୀଙ୍କ ସମେତ ବରିଷ୍ଠ ବିଚାରପତି, ସମ୍ବିଧାନ ବିଶେଷଜ୍ଞ ଉପସ୍ଥିତ ଥିଲେ । ରାଷ୍ଟ୍ରପତିଙ୍କ ଭାବବିହ୍ୱଳ ଅଭିଭାଷଣ ସମସ୍ତଙ୍କୁ ମନ୍ତ୍ର ମୁଗ୍ଧ କରି ଦେଇଥିଲା, ସମସ୍ତେ ଛିଡ଼ାହୋଇ ତାଳି ମାରିଥିଲେ । ଅତି ଭାବୁକ ଅନ୍ଦାଜରେ ଦ୍ରୌପଦୀ ମୁର୍ମୁ କହିଛନ୍ତି, ଜେଲରେ ରହିଥିବା ଲୋକଙ୍କ ସମ୍ପର୍କରେ ଭାବନ୍ତୁ, ଯେଉଁମାନେ କାହାକୁ ଚାପୁଡ଼ା ମାରି ବର୍ଷ ବର୍ଷ ଧରି ଜେଲରେ ଦିନ କାଟୁଛନ୍ତି । କିପରି ଏହି ସମସ୍ୟା ଦୂର ହେବ, ସମସ୍ତଙ୍କୁ ଚିନ୍ତା କରିବାକୁ ସେ ଆହ୍ୱାନ ଦେଇଥିଲେ ।
ଅବସରପ୍ରାପ୍ତ ବିଚାରପତି ଜଷ୍ଟିସ୍ ଏ.ଏସ.ଏନ. ନାଇଡୁ କହିଛନ୍ତି, ରାଷ୍ଟ୍ରପତିଙ୍କ କଥା ଅନେକଙ୍କ ହୃଦୟକୁ ଛୁଇଁଛି । କିନ୍ତୁ ଅପରାଧ ବଢୁଥିବାରୁ ଜେଲରେ ଅପରାଧୀଙ୍କ ସଂଖ୍ୟା ବଢୁଛି । ପୁଲିସର ତଦନ୍ତ ଠିକ ଭାବେ ହେଉନଥିବାରୁ ଅଭିଯୁକ୍ତଙ୍କୁ ଜେଲ ପଠାଇବାକୁ ପଡୁଛି ।
ନ୍ୟାସନାଲ କ୍ରାଇମ୍ ରେକର୍ଡ ବ୍ୟୁରୋ ବା ଏନ୍ସିଆରବି-୨୦୨୧ ରିପୋର୍ଟ ଉପରେ ନଜର ପକାନ୍ତୁ …
ପ୍ରତି ୧୦ ଜଣ କଏଦୀଙ୍କ ମଧ୍ୟରୁ ପ୍ରାୟ ୮ ଜଣ ବିଚାରଧୀନ କଏଦୀ
୫ ଲକ୍ଷ ୫୦ ହଜାର କଏଦୀଙ୍କ ମଧ୍ୟରୁ ବିଚାରଧୀନ କଏଦୀ ୪ ଲକ୍ଷ ୨୭ ହଜାର
୨ ଲକ୍ଷରୁ ଅଧିକ ବିଚାରଧୀନ କଏଦୀ ୨ ବର୍ଷରୁ ଅଧିକ ସମୟ ଜେଲରେ କାଟି ସାରିଲେଣି
ସେଥିରୁ ୨୪ ହଜାର କଏଦୀ ପାଖାପାଖି ୫ ବର୍ଷ ଜେଲରେ ରହିଲେଣି
ନା’ ଏମାନଙ୍କ ବିଚାର ସରୁଛି, ନା ସେମାନେ ଜେଲରୁ ବାହାରି ପାରୁଛନ୍ତି