ସଂକଟରେ ହରିଆଣାର ବିଜେପି ମେଣ୍ଟ ସରକାର, ଦୁଷ୍ମନ୍ତ ଚୌତାଲାଙ୍କ ବୟାନ ପରେ ୪ ନିର୍ଦ୍ଦଳୀୟ ବିଧାୟକଙ୍କୁ ଭେଟିଲେ ବିପ୍ଳବ ଦେବ
କନକ ବ୍ୟୁରୋ : ହରିଆଣାରେ ବିଜେପି ଓ ଜନନାୟକ ଜନତା ପାର୍ଟି (ଜେଜେପି) ମଧ୍ୟରେ ବିବାଦ ବଢିବାରେ ଲାଗିଛି । ଉଭୟ ଦଳର ନେତା ଓ ବିଧାକୟମାନେ ପରସ୍ପର ବିରୋଧୀ ମନ୍ତବ୍ୟ ଦେଉଛନ୍ତି । ଏହାକୁ ନେଇ ବିଜେପି ଓ ଜେଜେପି ମଧ୍ୟରେ ଚାଲିଥିବା ମେଣ୍ଟ ସରକାର ସଂକଟରେ ପଡିଛି । ହରିଆଣା ବିଧାନସଭା ନିର୍ବାଚନକୁ ଗୋଟିଏ ବର୍ଷ ବାକିଥିବା ବେଳେ ବିଜେପି କୌଣସି ପରିସ୍ଥିତିରେ ସରକାର ବଞ୍ଚାଇବାକୁ ପ୍ରଚେଷ୍ଠା ଆରମ୍ଭ କରିଛି । ହରିଆଣା ବିଜେପି ପ୍ରଭାରୀ ବିପ୍ଳବ ଦେବ ଏନେଇ ଦିଲ୍ଲୀରେ ୪ ଜଣ ସ୍ୱାଧୀନ ବିଧାୟକଙ୍କ ସହ ଆଲୋଚନା କରିଛନ୍ତି । ବୈଠକ ପରେ ବିପ୍ଳବ ଦେବ କହିଛନ୍ତି କି, ନିର୍ଦ୍ଦଳୀୟ ବିଧାୟକମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱ ଉପରେ ଭରସା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଯଦି ବିଧାନସଭାର ବିଧାୟକ ଗଣିତକୁ ହିସାବ କରାଯାଏ ତେବେ ହରିଆଣା ବିଧାନସଭାର ମୋଟ ୯୦ ବିଧାୟକଙ୍କ ମଧ୍ୟରୁ ବିଜେପିର ୪୧ ଜଣ ବିଧାୟକ ରହିଛନ୍ତି । ତେଣୁ ସ୍ଥିର ସରକାର ପାଇଁ ବିଜେପିକୁ ମାତ୍ର ୫ଜଣ ବିଧାୟକଙ୍କ ସମର୍ଥନ ଆବଶ୍ୟକ ରହିଛି । ସେପଟେ ବିଜେପିକୁ ସମର୍ଥନ ଦେଇଥିବା ଜେଜେପି ପାଖରେ ୧୦ ବିଧାୟକ ରହିଛନ୍ତି । ଜେଜେପି ଯଦି ବିଜେପି ନିକଟରୁ ସମର୍ଥନ ପ୍ରତ୍ୟାହାର କରେ ତେବେ ସ୍ୱାଧୀନ ବିଧାୟକଙ୍କ ସମର୍ଥନରେ ବିଜେପି ସରକାର ବଞ୍ଚାଇ ପାରିବ ।
ସେପଟେ ଯଦି କଂଗ୍ରେସ କଥା ଚିନ୍ତା କରାଯିବ ତେବେ କଂଗ୍ରେସ ପାଖରେ ୩୦ ଜଣ ବିଧାୟକ ରହିଛନ୍ତି । ଯଦି ଜେଜେପି ସମର୍ଥନ କରେ ତେବେ ମୋଟ ୪୦ ଜଣ ବିଧାୟକଙ୍କ ସମର୍ଥନ କଂଗ୍ରେସ ପାଇବ । ହେଲେ ସରକାର ଗଠନ କରିବାକୁ ୪୬ ଜଣ ବିଧାୟକଙ୍କ ସମର୍ଥନର ଆବଶ୍ୟକତା ରହିଛି ।
ଏବେ ଜାଣିବା ବିଜେପି ଓ ଜେଜେପି ମଧ୍ୟରେ କାହିଁକି ହେଲା ବିବାଦ । ମୁଖ୍ୟମନ୍ତ୍ରୀ ମନୋହରଲାଲ ଖଟ୍ଟର କହିଥିଲେ କି ହରିଆଣାରେ ବିଜେପି ସରକାର ରହିଛି ଜେଜେପିର ନୁହେଁ , ଜେଜେପି ବିଜେପିର ଏକ ସହଯୋଗୀ ଦଳ । ସେହିଭଳି ବିପ୍ଳବ ଦେବ ଜିନ୍ଦ ଜିଲ୍ଲାର ଏକ କାର୍ଯ୍ୟକ୍ରମରେ ଯୋଗ ଦେଇ କହିଥିଲେ କି ଆଗାମୀ ନିର୍ବାଚନରେ ଏଠାରୁ ବିଜେପି ପ୍ରାର୍ଥୀ ବିଧାୟକ ଜିତିବେ, ହେଲେ ଏବେ ସେଠାରେ ଉପ ମୁଖ୍ୟମନ୍ତ୍ରୀ ଦୁଷ୍ମନ୍ତ ଚୌତାଲା ଏବେ ବିଧାୟକ ରହିଛନ୍ତି । ଏହାର ଜବାବରେ ଦୁଷ୍ମନ୍ତ ଚୌତାଲା କହିଥିଲେ କି କାହା ପେଟରେ ଯଦି ଯନ୍ତ୍ରଣା ହେଉଛି ତେବେ ମୁଁ ଔଷଧ ଦେଇପାରିବି ନାହିଁ, ହେଲେ ମୋ ପେଟରେ ଯନ୍ତ୍ରଣା ହେଲେ ବି ତାର ଚିକିତ୍ସା ଡାକ୍ତର କରିବେ । ମୋର କାମ ହେଉଛି ମୋ ପାର୍ଟିକୁ ମଜବୁତ କରିବା ।