ମାଓବାଦୀ କହି ଦିନ ମଜୁରିଆକୁ ମାରିଦେଲା କି ପୁଲିସ: ଦ୍ୱିତୀୟ ମୃତଦେହ ଚିହ୍ନଟ କରି ପରିବାର ଲୋକ ଆଣିଲେ ସାଂଘାତିକ ଅଭିଯୋଗ
କନକ ବ୍ୟୁରୋ: ପୁଲିସର ମାଓବାଦୀ ଥିଓରୀକୁ ମାନିବାକୁ ରାଜି ନୁହଁନ୍ତି ଗାଁ ଲୋକ । କୋରାପୁଟ ବୈପାରୀଗୁଡ଼ାରେ ପୁଲିସର ଏନକାଉଂଟର ଏବଂ ୨ ଜଣଙ୍କ ମୃତ୍ୟୁକୁ ନେଇ ବିବାଦ ତେଜିବାରେ ଲାଗିଛି । ନିରୀହ ଦିନ ମଜୁରିଆକୁ ମାଓବାଦୀ କହି ପୁଲିସ ମାରି ଦେଇଥିବା ଭଳି ସାଂଘାତିକ ଅଭିଯୋଗ ହେବା ପରେ ଉତେଜନା ପ୍ରକାଶ ପାଇଛି । ଜାତୀୟ ରାଜପଥ ଅବରୋଧ କରି ମୃତକଙ୍କ ପରିବାରକୁ ୩୦ ଲକ୍ଷ ଟଙ୍କା କ୍ଷତିପୂରଣ ଦେବାକୁ ଅଡ଼ି ବସିଛନ୍ତି ଗ୍ରାମବାସୀ । ଆଜି ଜୟକୁମାର ନାଗଙ୍କ ମୃତଦେହକୁ ଚିହ୍ନଟ କରିଛନ୍ତି ପରିବାର ଲୋକ । ସେ ମାଓବାଦୀ ନୁହଁନ୍ତି, ଦିନ ମଜୁରିଆ ଭାବେ ଗଂଜେଇ ବୋହିବା କାମ ପାଇଁ ଜଙ୍ଗଲକୁ ଯାଇଥିଲେ ବୋଲି କହିଛନ୍ତି ପରିବାର ଲୋକ । ତେବେ ଏ ନେଇ ପୁଲିସ ପକ୍ଷରୁ କିଛି ପ୍ରତିକ୍ରିୟା ମିଳିନାହିଁ ।
Kanak News is now on WhatsApp
Join and get latest news updates delivered to you via WhatsApp
ଶନିବାର ଦିନ ମାଥିଲି ବ୍ଲକର ସର୍ଗିଗୁଡ଼ା ଗାଁର ଧନ କମାରଙ୍କ ମୃତଦେହ ଚିହ୍ନଟ ହୋଇଥିବା ବେଳେ ରବିବାର ଦିନ ମୃତ ଜୟକୁମାର ନାଗଙ୍କ ପରିଚୟ ମିଳିଛି । ଏହି ଦୁଇ ଜଣଙ୍କ ଜୀବନ ଯାଇଛି ପୁଲିସ ଗୁଳିରେ । ୧୦ ତାରିଖ ରାତିରେ କୋରାପୁଟ ବୈପାରୀଗୁଡ଼ା ଥାନା ଅନ୍ତର୍ଗତ ମଳିପଦର ଗାଁ ନିକଟ ଜଙ୍ଗଲ ଅଂଚଳରେ ପୁଲିସ ଏନକାଉଂଟରରେ ଟଳି ପଡିଥିଲେ ଜୟକୁମାର ନାଗ ଓ ଧନ କମାର । ପୁଲିସ ଏମାନଙ୍କୁ ମାଓବାଦୀ କହୁଥିବା ବେଳେ ଦିନ ମଜୁରିଆ ଭାବେ ଦୁହେଁ କାମ କରୁଥିଲେ ବୋଲି କହିଛନ୍ତି ଗ୍ରାମବାସୀ ।
ପରିବାରର ଏକମାତ୍ର ରୋଜଗାରିଆ ପୁଅ ଥିଲା ଜୟକୁମାର । ମୂଲ ମଜୁରୀ ଲାଗି ବୃଦ୍ଧ ବାପା, ମାଆଙ୍କ ସମେତ ପତ୍ନୀ ଓ ୭ ମାସର ଝିଅ ମୁହଁରେ ସେ ଆହାର ଯୋଗାଉଥିଲେ । ମାଫିଆମାନଙ୍କ ଗଂଜେଇ ଚାଲଣରେ ଶ୍ରମିକ ଭାବେ ସେ କାମ କରୁଥିଲେ । ଗଂଜେଇ ବୋହିବା ପାଇଁ ଘରୁ ବାହାରି ଥିଲେ, ହେଲେ ଜଙ୍ଗଲ ଭିତରୁ ତାଙ୍କ ମୃତଦେହ ଉଦ୍ଧାର କରାଯାଇଥିଲା । ଶବ ହସ୍ତାନ୍ତର ବେଳେ ପରିବାର ଲୋକ ଅଭିଯୋଗ କରିଛନ୍ତି, ଜୟ କୁମାର ମାଓବାଦୀ ନୁହଁନ୍ତି, ତାଙ୍କୁ ମିଛ ଏନକାଉଂଟର କରି ମାରିିଛି ପୁଲିସ ।
ଧନ କମାରଙ୍କ ମୃତ୍ୟୁକୁ ନେଇ ତାତି ଉଠିଛନ୍ତି ଗାଁ ଲୋକ । ପୁଲିସ ମୃତଦେହ ଦେଉନଥିବାରୁ ପ୍ରତିବାଦ ତୀବ୍ର ହୋଇଛି । ମାଲକାନଗିରି-ଜୟପୁର ୩୨୬ ନମ୍ବର ରାଜପଥକୁ ଅବରୋଧ କରି ମୃତକଙ୍କ ପରିବାରକୁ ନ୍ୟାୟ ଦେବା ଲାଗି ଦାବି କରିଛନ୍ତି । ଧନ କମାରଙ୍କ ମୃତଦେହ ହସ୍ତାନ୍ତର କରିବା ସହ ମୃତକଙ୍କ ପରିବାରକୁ ୩୦ ଲକ୍ଷ ଟଙ୍କାର କ୍ଷତିପୂରଣ ଦେବାକୁ ଅଡି ବସିଛନ୍ତି । ମାଲକାନଗିରି ପୁଲିସ, ପ୍ରଶାସନିକ ଅଧିକାରୀ ଲୋକଙ୍କୁ ବୁଝାଇବାକୁ ଉଦ୍ୟମ କରି ବିଫଳ ହୋଇଛନ୍ତି ।
ଏହି ଅଂଚଳରେ ପୂର୍ବରୁ ମଧ୍ୟ ଫେକ୍ ଏନକାଉଂଟର ଅଭିଯୋଗ ହୋଇଛି । ବୈପାରିଗୁଡ଼ା ବ୍ଳକ ଘୋଡ଼ାବେଡ଼ା ଗାଁରେ ଜଣେ ନିରୀହ ଆଦିବାସୀ ପୁଲିସ ଗୁଳିରେ ପ୍ରାଣ ହରାଇଥିଲେ । ମାଳକାନଗିରି ପାପୁଲର ଓର୍କେଲରେ ମଧ୍ୟ ପୁଲିସ ଗୁଳିରେ ପ୍ରାଣ ହରାଇଥିଲେ । ପୁଣିଥରେ ମାଓବାଦୀ ନାଁରେ ପୁଲିସ ଫେକ୍ ଏନକାଉଂଟର କରିଥିବା ନେଇ ସାଂଘାତିକ ଅଭିଯୋଗ ଆଣିଛନ୍ତି ସ୍ଥାନୀୟ ଲୋକେ ।
କୋରାପୁଟ ବୈପାରୀଗୁଡ଼ା ଥାନା ଅନ୍ତର୍ଗତ ଜଙ୍ଗଲରେ ଏସଓଜିର କୁମ୍ବିଂ ଅପରେସନ ବେଳେ ୨ ଜଣ ମାଓବାଦୀ ମୃତ ବୋଲି ପ୍ରେସମିଟ୍ କରି କହିଥିଲେ ଦକ୍ଷିଣ-ପଶ୍ଚିମାଂଚଳ ଡିଆଇଜି ରାଜେଶ ପଣ୍ଡିତ । ଘଟଣାସ୍ଥଳରୁ ଗୁଳି, ବନ୍ଧୁକ, ବୋମା, ଡିଟୋନେଟର ଆଦି ଜବତ କରାଯାଇଥିବା କହିଥିଲା ପୁଲିସ । ଗାଁ ଲୋକଙ୍କ ଅଭିଯୋଗ ପରେ ପୂରା ମାମଲା ବଦଳି ଯାଇଛି । ଏ ନେଇ ପୁଲିସ କର୍ତୃପକ୍ଷ କୌଣସି ସ୍ପଷ୍ଟୀକରଣ ଦେଇନାହାନ୍ତି ।