ଆସିଲା ବିଜେପିର ଦ୍ୱିତୀୟ ବିଧାନସଭା ପ୍ରାର୍ଥୀ ତାଲିକା: ୩ଜଣଙ୍କୁ ରିପିଟ୍ କରିଛି ବିଜେପି, ରାଉରକେଲାରୁ ଲଢ଼ିବେ ଦିଲ୍ଲୀପ
କନକ ବ୍ୟୁରୋ: ପ୍ରାୟ ଦୁଇ ସପ୍ତାହ ହେଲା, ବିଜେପିର ଦ୍ୱିତୀୟ ବିଧାନସଭା ପ୍ରାର୍ଥୀ ତାଲିକାକୁ ସମସ୍ତେ ଅପେକ୍ଷା କରିଥିଲେ । କାହାକୁ ଟିକେଟ ବଦଳିବ, କାହାର ଟିକେଟ କଟିବ, ସେ ନେଇ ବହୁ ନେତା ଆଶା ଆଶଙ୍କାରେ ଥିଲେ? ଶେଷରେ ଆଜି ବିଜେପି ତାର ଦ୍ୱିତୀୟ ବିଧାନସଭା ପ୍ରାର୍ଥୀ ତାଲିକା ଜାରି କରିବା ପରେ ଚିତ୍ର ସ୍ପଷ୍ଟ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମ ପର୍ଯ୍ୟାୟ ବିଧାନସଭା ପ୍ରାର୍ଥୀ ତାଲିକା ଜାରି କରିବାର ପ୍ରାୟ ଦୁଇ ସପ୍ତାହ ପରେ, ଦ୍ୱିତୀୟ ପର୍ଯ୍ୟାୟ ତାଲିକା ଜାରି କରିଛି ଭାରତୀୟ ଜନତା ପାର୍ଟି । ଏଥର ୧୯ ଆସନ ପାଇଁ ପ୍ରାର୍ଥୀଙ୍କ ନାଁ ଘୋଷଣା କରିଛି ଦଳ ।
ବିଜେପି ପ୍ରକାଶ କରିଥିବା ପ୍ରାର୍ଥୀ ତାଲିକା ମଧ୍ୟରେ ୧୬ଜଣ ନୂଆ ଚେହେରା ରହିଛନ୍ତି । ସେମାନଙ୍କୁ ବିଜେପି ପ୍ରଥମ ଥର ପାଇଁ ବିଧାନସଭା ପାଇଁ ପ୍ରାର୍ଥୀ କରିଛି । ତେବେ ୩ଜଣଙ୍କୁ ରିପିଟ୍ କରିଛି ଦଳ । ବଡ କଥା ହେଉଛି, ରାଉରକେଲା ବିଧାନସଭା ଆସନରୁ ହେଭିୱେଟ ଦିଲ୍ଲୀପ ରାୟଙ୍କୁ ପ୍ରାର୍ଥୀ କରିଛି ବିଜେପି । ଦିଲ୍ଳୀପଙ୍କୁ ଟିକେଟ ମିଳିବା ପରେ ତାଙ୍କ ସମର୍ଥକମାନେ ରାଉରକେଲାରେ ଖୁସି ମନାଇଛନ୍ତି । ରାଉରକେଲାରେ ମନ୍ତ୍ରୀ ସାରଦା ନାୟକ ବିଜେଡିର ପ୍ରାର୍ଥୀ ହୋଇଥିବାରୁ, ଏଥର ବଡ ଲଢ଼େଇ ହୋଇପାରେ ବୋଲି କୁହାଯାଉଛି । ଏଥିସହ ବିଜେଡି ଛାଡି ବିଜେପିରେ ଯୋଗ ଦେଇଥିବା କୈଳାସ କୁଲେସିକାଙ୍କ ସମେତ ୫ଜଣଙ୍କୁ ପ୍ରାର୍ଥୀ କରିଛି ବିଜେପି ।
ବିଜେପି ପ୍ରଥମ ପର୍ଯ୍ୟାୟରେ ଦେଇଥିବା ୧୧୨ ପ୍ରାର୍ଥୀଙ୍କ ମଧ୍ୟରୁ ୨ ଆସନରେ ପ୍ରାର୍ଥୀ ବଦଳାଇ ଦେଇଛି । କୋରାପୁଟ ପଟ୍ଟାଙ୍ଗି ଆସନରେ ଚୈତନ ହନ୍ତାଳକୁ ବଦଳାଇ ଚୈତନ୍ୟ ନାନ୍ଦବାଲି ଓ ନୟାଗଡ ରଣପୁର ଆସନରେ ତାପସ ମାର୍ଥାଙ୍କ ବଦଳରେ ସୁରମା ପାଢ଼ୀଙ୍କୁ ଦଳ ଟିକେଟ ଦେଇଛି ।
ବିଜେପି ଦୁଇଟି ପର୍ଯ୍ୟାୟରେ ମୋଟ ୧୩୧ ପ୍ରାର୍ଥୀ ଘୋଷଣା କରିଛି । କିନ୍ତୁ ଏବେ ବି ୧୬ଟି ଆସନରେ ପ୍ରାର୍ଥୀ ଘୋଷଣା କରିନି ଭାରତୀୟ ଜନତା ପାର୍ଟି । ଏହି ଆସନ ଭିତରୁ କେତୋଟି ଆସନରେ ବହୁ ହେଭିୱେଟ ଆଶାୟୀ ରହିଛନ୍ତି । ତେଣୁ ପ୍ରାର୍ଥୀ ଘୋଷଣା କରିବା ପୂର୍ବରୁ ସବୁ ଦିଗରୁ ଦଳ ଅଙ୍କ କଷୁଥିବା କୁହାଯାଉଛି ।