ଡିଜେ ସାଉଣ୍ଡକୁ ସାବଧାନ: ଅତ୍ୟଧିକ ସାଉଣ୍ଡରେ ଯାଇପାରେ ଜୀବନ
କନକ ବ୍ୟୁରୋ: ଶବ୍ଦ ପ୍ରଦୂଷଣ ଆଜିର ଦିନରେ ଏକ ଚିନ୍ତାର ବିଷୟ ପାଲଟିଗଲାଣି । ଆଜି ସାରା ବିଶ୍ୱ ଯେତେବେଳେ, ସ୍ୱାସ୍ଥ୍ୟ ଦିବସ ପାଳନ କରୁଛି, ଆମେ ଆମ ସ୍ୱାସ୍ଥ୍ୟକୁ ନେଇ ଅଧିକ ଯତ୍ନବାନ ହେଉଛି, ସେତେବେଳେ କଟକ ମାହାଙ୍ଗା ଥାନା ଅଧୀନ ବରାହିପୁରରୁ ଆସିଛି ଏକ ଚିନ୍ତାଜନକ ଖବର । ଡିଜେର ତାଳେ ତାଳେ ନାଚୁଥିବାବେଳେ ଜଣେ ଯୁବକ ଟଳି ପଡିଛନ୍ତି । ମୃତ୍ୟୁର କାରଣ ସ୍ପଷ୍ଟ ହୋଇନଥିଲେ ବି ଡିଜେର ଅତ୍ୟଧିକ ଶଦ୍ଦ ଯୋଗୁଁ ତାଙ୍କର ମୃତ୍ୟୁ ହୋଇଥିବା ଆଶଙ୍କା କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ବାହାଘର ବେଳେ ବରଯାତ୍ରୀଙ୍କ ପ୍ରୋସେସନ ହେଉ କି କୌଣସି ଠାକୁର ଭସାଣୀ ଉତ୍ସବ, କିମ୍ବା ରାଜନୈତିକ, ସାଂସ୍କୃତିକ କାର୍ଯ୍ୟକ୍ରମ ସବୁଠି ବାଜୁଛି ଡିଜେ । ଆଉ ଡିଜେର ତାଳେ ତାଳେ ନାଚୁଛନ୍ତି ମତୁଆଲା ଯୁବପୀଢ଼ି । କିନ୍ତୁ ଏହି ଡିଜେ ଯେ ଜଣଙ୍କ ଜୀବନ ନେଇପାରେ ତାହା ହୁଏତ ସହଜରେ ବିଶ୍ୱାସ କରିବା କଷ୍ଟକର । କିନ୍ତୁ ସେମିତି ଏକ ଅଭିଯୋଗ ଆସିଛି କଟକ ଥାନା ମାହାଙ୍ଗା ଥାନା ଅଧିନ ବରାହିପୁରରେ ବିଦେଇ ବାବାଙ୍କର ଚଇତି ମେଲଣରୁ । ସୂଚନା ଅନୁସାରେ ମେଲଣରେ ଡିଜେ ବାଜୁଥିଲା । ଡିଜେ ଗୀତର ତାଳେ ତାଳେ ଯୁବପୀଢ଼ି ଝୁମୁଥିଲେ । ହେଲେ, ନାଚୁ ନାଚୁ ଟଳି ପଡିଥିଲେ ସେହି ଗାଁର ୨୧ ବର୍ଷିୟ ଯୁବକ ରାଜେନ୍ଦ୍ର ।
ରାଜେନ୍ଦ୍ର ସେଠୀ । ବୟସ ୨୧ । ଗାଁ ମେଲଣରେ, ଯେତେବେଳେ ଡିଜେ ତାଳେ ତାଳେ ସେ ନାଚୁଥିଲେ, ସେତେବେଳେ ହୁଏତ ଭାବିନଥିବ ଏହା ହିଁ ତାଙ୍କ ଶେଷ ନାଚ ହେବ । କିନ୍ତୁ ଡିଜେ ଗୀତରେ ନାଚିବା ତାଙ୍କ ପାଇଁ ମହଙ୍ଗା ପଡିଲା । ଆଉ ନାଚୁ ନାଚୁ ଟଳି ପଡିଥିଲେ । ହସ୍ପିଟାଲରେ ଭର୍ତି କରାଯାଇଥିଲେ ବି ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ରାଜେନ୍ଦ୍ରଙ୍କ ମୃତ୍ୟୁର କାରଣ କଣ ସ୍ପଷ୍ଟ ହୋଇନଥିଲେ ବି ଡିଜେରେ ନାଚିବାବେଳେ ଟଳି ପଡିବା ଓ ମୃତ୍ୟୁ ହେବା ଅନେକ ସନ୍ଦେହ ସୃଷ୍ଟି କରିଛି । କାରଣ ଯେତେ ଜୋରରେ ଡିଜେ ବାଜୁଛି ତାହା ଜଣଙ୍କ ମୃତ୍ୟୁର କାରଣ ହେବାର ଯଥେଷ୍ଟ ଆଶଙ୍କା ରହିଛି ।
ଡିଜେ ଗୀତରେ ନାଚୁଥିବାବେଳେ ରାଜେନ୍ଦ୍ରଙ୍କ ମୃତ୍ୟୁ ପରେ, ଡିଜେ ସାଉଣ୍ଡ ସ୍ୱାସ୍ଥ୍ୟ ଉପରେ କେମିତି ପ୍ରଭାବ ପକାଇଥାଏ, ସେନେଇ ହୃଦରୋଗ ବିଶେଷଜ୍ଞ ପ୍ରତିକ୍ରିୟା ରଖିଛନ୍ତି । କହିଛନ୍ତି,
ଡିଜେ ସାଉଣ୍ଡର ପ୍ରଭାବ..
– ଅତ୍ୟଧିକ ଡିଜେ ସାଉଣ୍ଡ ସ୍ୱାସ୍ଥ୍ୟ ଉପରେ ଗୁରତର ସମସ୍ୟା ସୃଷ୍ଟି କରିପାରେ
– ମଣିଷ ଶରୀରରେ ଥିବା ସିମ୍ପାଥେଟିକ୍ ନର୍ଭ ସିଷ୍ଟମ ଅଧିକ ସକ୍ରିୟ ହୋଇଯାଏ
– ହୃଦସ୍ପନ୍ଦନ ଅସ୍ୱାଭାବିକ ଭାବେ ବଢ଼ିଯାଏ
– ରକ୍ତଚାପ ବଢ଼ିପାରେ କିମ୍ବା କମିପାରେ
– ଫଳରେ ଜୀବନ ଯିବାର ଆଶଙ୍କ ରହିଛି
ସେହିପରି ଇଏନଟି ସ୍ପେଶାଲିଷ୍ଟ କହିଛନ୍ତି, ଡିଜେ ସାଉଣ୍ଡ ୬୫ରୁ ୭୦ ଡେସିମେଲ ଅତିକ୍ରମ କଲେ କାନ ଉପରେ ବହୁତ ପ୍ରଭାବ ପକାଇବ । ସ୍ୱାଭାବିକ ଡେସିମେଲରୁ ଅଧିକ ଶବ୍ଦ ବିପଦଜ୍ଜନକ ।
ତେଣୁ ଦିନକୁ ଦିନ ଯେଉଁଭଳି ଡିଜେ ବ୍ୟବହାର ବଢ଼ି ଚାଲିଛି, କେତେ ଡେସିମେଲ ପର୍ଯ୍ୟନ୍ତ ବାଜି ପାରିବ, ସେଥିପାଇଁ ସରକାର ସ୍ୱତନ୍ତ୍ର ନିୟମ ଆଣିବାର ଆବଶ୍ୟକତା ରହିଛି ।