୧୧ ଜଣ ଆଦିବାସୀ ମହିଳାଙ୍କ ସହ ୨୧ ପୋଲିସ କର୍ମୀ କରିଥିଲେ ଦୁଷ୍କର୍ମ ! ପ୍ରମାଣ ଅଭାବରୁ ନିର୍ଦ୍ଦୋଷରେ ଛାଡ ପାଇଲେ ସମସ୍ତ ଅଭିଯୁକ୍ତ
କନକ ବ୍ୟୁରୋ : ୧୧ ଜଣ ଆଦିବାସୀ ମହିଳାଙ୍କୁ ଦୁଷ୍କର୍ମ କରିଥିବା ଅଭିଯୋଗରେ ୨୧ ଜଣ ପୋଲିସକର୍ମୀଙ୍କ ପ୍ରମାଣ ଅଭାବରୁ ନିର୍ଦ୍ଦୋଷରେ ଖଲାସ କରିଛନ୍ତି କୋର୍ଟ । ଏହି ମାମଲା ୨୩ବର୍ଷ ତଳେ ଆନ୍ଧ୍ରପ୍ରଦେଶର ଅଲ୍ଲୁରୀ ସୀତାରାମରାଜୁ ଜିଲ୍ଲାରେ ଘଟିଥିଲା । ଏବେ କୋର୍ଟ ଅଭିଯୁକ୍ତମାନଙ୍କୁ ଯାଂଚ ଅଧିକାରୀଙ୍କ ବିଫଳତା କାରଣରୁ ଛାଡ କରାଯାଇଥିବା ଆଲୋଚନା ହେଉଛି ।
Kanak News is now on WhatsApp
Join and get latest news updates delivered to you via WhatsApp
୨୦୦୭ ମସିହା ଅଗଷ୍ଟ ମାସରେ ଏକ ବିଶେଷ ଟିମ୍ ଗ୍ରେହାଉଣ୍ଡରେ ଚାକିରୀ କରିଥିବା ୨୧ ଜଣ ପୋଲିସ କର୍ମୀ ଏହି ଆଦିବାସୀ ମହିଳାମାନଙ୍କ ସହ ଦୁଷ୍କର୍ମ କରିଥିବା ଅଭିଯୋଗ ହୋଇଥିଲା । ଏନେଇ ରୁଜୁ ହୋଇଥିବା ମାମଲାର ଶୁଣାଣି ୨୦୧୮ ମସିହାରେ ବିଶାଖପାଟନମ୍ କୋର୍ଟରେ ଆରମ୍ଭ ହୋଇଥିଲା । ହେଲେ ଚଳିତମାସ ୬ ତାରିଖରେ ଅନୁସୂଚିତ ଜାତି ଓ ଜନଜାତି ଅଧିନିୟମ କ୍ରମରେ ଅତିରିକ୍ତ ଜିଲ୍ଲା ଓ ସେସନ୍ ଜର୍ଜ ପ୍ରମାଣ ଅଭାବରୁ ଅଭିଯୁକ୍ତମାନଙ୍କୁ ନିର୍ଦ୍ଦୋଷରେ ଖଲାସ କରିବା ସହ ମାମଲାର ଶୁଣାଣି ସମାପ୍ତ କରିଛନ୍ତି । ଏହାସହ କୋର୍ଟ ଜିଲ୍ଲା ବୈଧିକ ସେବା ପ୍ରାଧୀକରଣକୁ ପୀଡିତାମାନଙ୍କୁ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି ।
ସେପଟେ ଏହି ମାମଲାରେ ଅଭିଯୁକ୍ତ ଥିବା ପୋଲିସକର୍ମୀମାନଙ୍କ ମଧ୍ୟରୁ କାହାରିକୁ ଗିରଫ କରାଯାଇ ନଥିଲା ଓ ଏବେ ଅନେକ ଅଭିଯୁକ୍ତ ପୋଲିସକର୍ମୀ ଅବସର ନେଇସାରିଥିବା କଥା ଜଣେ ମାନବାଧିକାର କର୍ମୀ କହିଛନ୍ତି ।
କହିରଖୁ କି ୨୩ ବର୍ଷ ତଳେ ଅଭିଯୋଗ ହୋଇଥିଲା କି ୨୧ ସଦସ୍ୟ ବିଶିଷ୍ଠ ବିଶେଷ ପୋଲିସ ଟିମ୍ ତଲାସୀ ଅଭିଯାନ କ୍ରମରେ ଗାଁକୁ ଯାଇଥିଲା । ସେଠାରେ ରହୁଥିବା ଆଦିବାସୀ ବସ୍ତି ଭିତରେ ପଶି ପୋଲିସ ୧୧ଜଣ ଆଦିବାସୀ ମହିଳାଙ୍କ ସହ ଦୁଷ୍କର୍ମ କରିଥିଲା । ହେଲେ କୋର୍ଟ ଏବେ ପୀଡିତା ମହିଳାମାନଙ୍କୁ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେବା ପରେ ଏହା ପ୍ରମାଣିତ ହୋଇଛି ଯେ ବାସ୍ତବରେ ସେମାନଙ୍କ ସହ ଦୁଷ୍କର୍ମ ହୋଇଥିଲା ।