ବିନା ସୂଚନାରେ କଟୁଛି ବିଜୁଳି, ହନ୍ତସନ୍ତ ହେଉଛନ୍ତି ଲୋକ । ବିଦ୍ୟୁତ କାଟକୁ ନେଇ ପାଠ ପଢ଼ାଇଲେ ମନ୍ତ୍ରୀ ପ୍ରତାପ ଦେବ । କହିଲେ, ପବନ ବହିଲେ କଟିବ ବିଜୁଳି
କନକ ବ୍ୟୁରୋ: ସାରା ରାଜ୍ୟରେ ଘନଘନ ବିଦ୍ୟୁତ କାଟ୍ ହେଉଛି । କୌଣସି ପୂର୍ବ ସୂଚନା ନଥାଇ ଘଣ୍ଟା ଘଣ୍ଟା ବିଜୁଳି କାଟି ଦିଆଯାଉଛି । ଅସହ୍ୟ ଗରମ ଓ ଗୁଳୁଗୁଳି ଭିତରେ ଅଘୋଷିତ ବିଜୁଳି କାଟ୍, ସାଧାରଣ ଲୋକଙ୍କ ସମସ୍ୟା ବଢାଇ ଦେଇଛି । ଗୁରୁବାର କାଳବୈଶାଖୀ ଝଡ଼ ପରେ ରାଜ୍ୟ ରାଜଧାନୀରେ ସାଢେ ତିନି ଘଣ୍ଟା ବିଜୁଳି କଟିଗଲା । ଖୋଦ୍ ମୁଖ୍ୟ ଶାସନ ସଚିବ ଟ୍ୱିଟ୍ କରି ବାରମ୍ବାର ପଚାରୁଥିଲେ, ବିଜୁଳି ଆସିବାକୁ ଆଉ କେତେ ସମୟ ଲାଗିବ? ହେଲେ ବିଭାଗୀୟ ମନ୍ତ୍ରୀ ଆଜି ଅଜବ ଉତ୍ତର ରଖିଛନ୍ତି । ମନ୍ତ୍ରୀ ପ୍ରତାପ ଦେବ କହିଛନ୍ତି, ଏହାର ପାୱାର କଟ୍ କୁହାଯିବ ନାହିଁ । ପବନ ହେଲେ ବିଜୁଳି କଟିବ । ଭିତିଭୂମି ଠିକ୍ ନଥିବାରୁ ବିଜୁଳି ଆସିବାରେ ବିଳମ୍ବ ହେବ । ସେପଟେ ପଶ୍ନ ଉଠିଛି ଗତ ୧୦ବର୍ଷରେ ବିଜୁଳି ଭିତିଭୂମିକ ସଜାଡିବା ପାଇଁ ଖର୍ଚ୍ଚର୍ ହୋଇଥିବା ୧୦ହଜାର କୋଟି ଟଙ୍କା ଗଲା କୁଆଡେ?
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପଟେ ଲାଗି ରହିଛି ଅଘୋଷିତ ବିଦ୍ୟୁତ୍ କାଟ । ଘଣ୍ଟା ଘଣ୍ଟା ଧରି ବିଜୁଳି ଯାଉଛି ଯେ କେତେବେଳେ ଆସିବ କାହାକୁ ଜଣାନାହିଁ । ଗାଁଠୁ ସହର, ସବୁଠି ସମାନ ଅବସ୍ଥା । ହେଲେ, ଏପଟେ ଅଜବ ଯୁକ୍ତି ରଖିଛନ୍ତି ବିଭାଗୀୟ ମନ୍ତ୍ରୀ ।
- ‘କେଉଁଠି ହେଉନି ପାୱାରକଟ୍’
- ‘ପବନ ହେଲେ କଟାଯାଉଛି ବିଦ୍ୟୁତ୍’
ଅଘୋଷିତ ବିଦ୍ୟୁତ କାଟକୁ ନେଇ ଲୋକ ହନ୍ତସନ୍ତ ହେଉଥିବାବେଳେ, ମାନିବାକୁ ନାରାଜ ଶକ୍ତି ମନ୍ତ୍ରୀ ପ୍ରତାପ ଦେବ । କହିଛନ୍ତିି, ପାୱାରକଟ୍ କେଉଁଠି ହେଉନି । ବାରମ୍ବାର ଗଣମାଧ୍ୟମକୁ କହିଛି, ପାୱାରକଟ୍ ଶବ୍ଦ ବ୍ୟବହାର କରନ୍ତୁ ନାହିଁ । ପବନ ବହିଲେ ବିଦ୍ୟୁତ୍ କାଟିବାକୁ ବାଧ୍ୟ । କାଳବୈଶାଖୀ ଯେଉଁଭଳି ହେଉଛି, ଖୁଣ୍ଟ ଉପୁଡୁଛି । ଆଖି ପିଛୁଳାକେ ଏ କାମ ହୋଇଯିବନି । ପାୱାର ସର୍ଟେଜ୍ ଅଛି ଏକଥା କହିବା ଭୁଲ୍ । ଭିତ୍ତିଭୂମିର ତ୍ରୁଟି ରହିଛି । ରାଜ୍ୟ ସରକାରଙ୍କ କାମ ହେଉଛି କମ୍ପାନୀଗୁଡିକୁ ତାଗିଦ୍ କରି କାମ କରିବା । ଅନ୍ୟପଟେ ପାୱାରକଟ୍ ହେଉନଥିବା ମନ୍ତ୍ରୀଙ୍କ ଦାବିକୁ ସହଜରେ ଗ୍ରହଣ କରିପାରି ନାହାନ୍ତିି, ଶକ୍ତି ସମୀକ୍ଷକ ଓ ଉପଭୋକ୍ତା ମହାସଂଘ ।
- କେମିତି ହେବ ବିଜୁଳି କାଟର ସମାଧାନ?
- ବୈଠକ ଡାକିଲେ ମୁଖ୍ୟ ଶାସନ ସଚିବ
ଗୁରୁବାର କାଳବୈଶାଖୀ ପରେ ଘଣ୍ଟା ଘଣ୍ଟା ଲାଇନ କଟିବା ନେଇ ଟୁଇଟ୍ କରି ଉଦବେଗ ପ୍ରକାଶ କରିବା ପରେ, ଜରୁରୀ ବୈଠକ ଡାକିଛନ୍ତି ମୁଖ୍ୟ ଶାସନ ସଚିବ । ରାଜ୍ୟରେ ବାରମ୍ବାର ବିଦ୍ୟୁତ୍ କାଟ ହେଉଥିବାରୁ ଏହାର କିପରି ସମାଧାନ କରାଯିବ ସେନେଇ ବୈଠକରେ ଆଲୋଚନା ହେବ । ବୈଠକରେ ରାଜ୍ୟର ୪ ବିତରଣ କମ୍ପାନୀର ସିଇଓଙ୍କୁ ଡକାଯାଇଥିବା ସୂଚନା ମିଳିଛି । ତେବେ ମୁଖ୍ୟ ଶାସନ ସଚିବଙ୍କ ପଦକ୍ଷେପକୁ ସ୍ୱାଗତ କରିଛି ଉପଭୋକ୍ତା ମହାସଂଘ ।
ମନ୍ତ୍ରୀଙ୍କ ବୟାନ ପରେ, ସାଧାରଣରେ ପ୍ରଶ୍ନ ଉଠିଛି । ଗୋଟିଏ ପଟେ ମନ୍ତ୍ରୀ ପାୱାରକଟ ହେଉନଥିବା କହୁଥିବାବେଳେ ଆଉ ଗୋଟିଏ ପଟେ ଭିତ୍ତିଭୂମିକୁ ଦାୟୀ କରୁଛନ୍ତି । ପ୍ରଶ୍ନ ଉଠୁଛି, ମନ୍ତ୍ରୀଙ୍କ କଥା ସତ ହୋଇଥିଲେ…
- ଦୁର୍ବଳ ଭିତ୍ତିଭୂମି ପାଇଁ ଦାୟୀ କିଏ?
- ଭିତ୍ତିଭୂମିକୁ ସୁଦୃଢ଼ କରିବା କାହାର ଦାୟିତ୍ୱ ?
- ଭିତ୍ତିଭୂମି ସଜାଡିବାକୁ ଖର୍ଚ୍ଚ ହୋଇଥିବା କୋଟି କୋଟି ଟଙ୍କା କୁଆଡେ ଗଲା?