କନକ ବ୍ୟୁରୋ: ଯେଉଁ ସ୍ଥାନକୁ ଯାଉଛନ୍ତି ମୋଦୀ, ବଢିଯାଉଛି ସେ ସ୍ଥାନର ଲୋକପ୍ରିୟତା । ସୋସିଆଲ ମିଡିଆରେ ଟ୍ରେଣ୍ଡ କରୁଛି ସେ ସ୍ଥାନ । ସେ ସ୍ଥାନକୁ ବଢୁଛି ପର୍ଯ୍ୟଟକଙ୍କ ଲମ୍ବା ଲାଇନ୍ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ଦ୍ୱାରିକା ଗସ୍ତ କରି ସେଠାରେ ଦ୍ୱାରିକାଧିଶଙ୍କ ପୂଜାର୍ଚ୍ଚନା କରିଛନ୍ତି । କେବଳ ସେତିକି ନୁହେଁ ସମୁଦ୍ରରେ ବୁଡି ପ୍ରାଚୀନ ଦ୍ୱାରିକା ନଗରୀର ଦର୍ଶନ ବି କରିଛନ୍ତି । ପ୍ରଧାନମନ୍ତ୍ରୀଙ୍କ ଏହି ସମୟର ଫଟୋ, ଭିଡିଓ ଏବେ ସୋସିଆଲ ମିଡିଆରେ ବେଶ୍ ଚର୍ଚ୍ଚା ସାଉଁଟିଛି ।
Kanak News is now on WhatsApp
Join and get latest news updates delivered to you via WhatsApp
ଲୋକେ ଦ୍ୱାରିକା ନଗରୀ ଆଉ ସମୁଦ୍ରରେ ବୁଡି ରହିଥିବା ପ୍ରାଚୀନ ଦ୍ୱାରିକା ନଗରୀ ବିଷୟରେ ଜାଣିବା ପାଇଁ ଇଣ୍ଟରନେଟରେ ସନ୍ଧାନ କରିବା ଆରମ୍ଭ କରି ଦେଇଛନ୍ତି । ମୋଦୀଙ୍କ ଭିଡିଓ ସୋସିଆଲ ମିଡିଆରେ ବେଶ ଲୋକପ୍ରିୟତା ହାସଲ କରିଛି । ୟୁଟ୍ୟୁବ ଓ ଇନଷ୍ଟାଗ୍ରାମରେ କୋଟି କୋଟି ଫଲୋଅର ମୋଦୀଙ୍କ ଏହି ଭିଡିଓ ଦେଖିଛନ୍ତି । ମୋଦୀ ନିଜେ ମଧ୍ୟ ଦ୍ୱାରିକା ନଗରୀର ଭୁରି ଭୁରି ପ୍ରଶଂସା ବି କରିଛନ୍ତି ।
ତେବେ ମୋଦୀ ଯେଉଁ ସ୍ଥାନକୁ ଯାଉଛନ୍ତି, ସେ ସ୍ଥାନ ଚର୍ଚ୍ଚା ସାଉଁଟିବା କିଛି ନୂଆ କଥା ନୁହେଁ । ପୂର୍ବରୁ ବି ଏମିତି ଅନେକ ଥର ଦେଖିବାକୁ ମିଳିଛି । ମୋଦୀ ଲାକ୍ଷାଦ୍ୱୀପ ଗଲେ, ସେଠାକାର ଭିତିଭୂମୀର ବିକାଶ ହେବା ସହ ଲୋକଙ୍କ ଲାକ୍ଷାଦୀପ ପ୍ରତି ଆଗ୍ରହ ବଢିଲା । କେବଳ ଲାକ୍ଷାଦ୍ୱୀପ ନୁହେଁ, ୨୦୧୯ରେ ମୋଦୀଙ୍କ କେଦାରନାଥ ଗସ୍ତ ପର୍ଯ୍ୟଟକଙ୍କ ଏହି ସ୍ଥାନ ପ୍ରତି ଆଗ୍ରହ ବଢାଇ ଦେଇଥିଲା ।
- କେଦାରନାଥ ଗୁମ୍ଫାରେ ମୋଦୀଙ୍କ ଧ୍ୟାନ
- ଚର୍ଚ୍ଚାରେ ରହିଥିଲା ଆଦିଶଙ୍କରଙ୍କ ପୂଜାର୍ଚ୍ଚନା
୨୦୧୯ ଲୋକସଭା ନିର୍ବାଚନ ଫଳାଫଳ ଆସିବାର ଠିକ୍ ପୂର୍ବରୁ ପ୍ରଧାନମନ୍ତ୍ରୀ ମୋଦୀ ପହଁଚିଥିଲେ କେଦାରନାଥ । ଏଠାରେ ଗୁମ୍ଫାରେ ବସି ବେଶ କିଛି ସମୟ ଧରି ଧ୍ୟାନ କରିଥିଲେ ମୋଦୀ । କେଦାରନାଥଙ୍କ ପୂଜାର୍ଚ୍ଚନା ପରେ ଏହି ଗୁମ୍ଫାରେ ଧ୍ୟାନ କରିବା ସହ ସାରା ରାତି ଏହି ଗୁମ୍ଫାରେ ହିଁ ରହିଥିଲେ ପ୍ରଧାନମନ୍ତ୍ରୀ । ଏହାପରେ କେଦାରନାଥର ଏହି ଗୁମ୍ଫା ସାରା ବିଶ୍ୱରେ ଚର୍ଚ୍ଚାର କେନ୍ଦ୍ର ପାଲଟିଥିଲା । ସୋସିଆଲ ମିଡିଆରେ ମୋଦୀଙ୍କ ଧ୍ୟାନମୁଦ୍ରାର ଫଟୋ, ଭିଡିଓ ଭାଇରାଲ ହେବା ସହ ଏହି ସ୍ଥାନ ସ୍ୱତନ୍ତ୍ର ଭାବେ ପର୍ଯ୍ୟଟକଙ୍କ ଆକର୍ଷଣ ପାଲଟିଗଲା । ମେ ୧୮, ୨୦୧୯ରେ ଏହି ସ୍ଥାନକୁ ଯାଇଥିଲେ ପ୍ରଧାନମନ୍ତ୍ରୀ ମୋଦୀ । ଏହାପରେ ଏ ସ୍ଥାନର ଲୋକପ୍ରିୟତା ଏତେ ବଢ଼ିଗଲା ଯେ, ଅକ୍ଟୋବର ୨୦୧୯ ପର୍ଯ୍ୟନ୍ତ ସମସ୍ତ ବୁକିଂ ହୋଇ ଯାଇଥିଲା ।
କେବଳ ସେତିକି ନୁହେଁ ପ୍ରତ୍ୟେକ ବର୍ଷ କେଦାରନାଥକୁ ପର୍ଯ୍ୟଟକଙ୍କ ଆଗମନ ବି ବଢିବାରେ ଲାଗିଲା । ଗଢ଼ୱାଲ ମଣ୍ଡଳ ବିକାଶ ନିଗମ ଅନୁସାରେ ଏହି ଗୁମ୍ଫାରେ ଏକ ରାତ୍ରି ପାଇଁ ୩,୭୦୦ ଟଙ୍କା ଶୁଳ୍କ ରହିଛି । ଯେତେବେଳେ ମୋଦୀ ଏହି ସ୍ଥାନକୁ ଯାଇଥିଲେ, ସେତେବେଳେ ରାତ୍ରିଯାପନର ଶୁଳ୍କ ୧୫୦୦ ଟଙ୍କା ଏବଂ କେବଳ ଦିନ ପାଇଁ ୯୦୦ ଟଙ୍କା ରହିଥିଲା । ସମୁଦ୍ର ଭାଗରୁ ୧୨ ହଜାର ଫୁଟ ଉଚ୍ଚରେ ରହିଥିବା ଏହି ଗୁମ୍ଫାରେ ରହିଛି ଶୋଇବା ପାଇଁ ଖଟ ଓ ୱାଇ-ଫାଇ ବ୍ୟବସ୍ଥା ।
- ଚହଳ ପକାଇଥିଲା ମୋଦୀଙ୍କ ଲାକ୍ଷାଦ୍ୱୀପ ଗସ୍ତ
- ପର୍ଯ୍ୟଟକଙ୍କୁ ଆକର୍ଷିତ କଲା ଲାକ୍ଷାଦ୍ୱୀପ
ଭାରତର କେନ୍ଦ୍ରଶାସିତ ଅଞ୍ଚଳ ଲାକ୍ଷାଦ୍ୱୀପ ସେତେବେଳେ ଚର୍ଚ୍ଚାର ପରିସରକୁ ଆସିଲା, ଯେତେବେଳେ ପ୍ରଧାନମନ୍ତ୍ରୀ ମୋଦୀ ଲାକ୍ଷାଦ୍ୱୀପର ସୁନ୍ଦର ବେଳାଭୂମୀରେ ବସି ଏହାକୁ ଉପଭୋଗ କରୁଥିବାର ନଜର ଆସିଲେ । ମୋଦୀଙ୍କ ଲାକ୍ଷାଦ୍ୱୀପ ଗସ୍ତର ଫଟୋ, ଭିଡିଓ ସାମ୍ନାକୁ ଆସିବା ପରେ ଏହି ସ୍ଥାନକୁ ଇଣ୍ଟରନେଟରେ ଖୋଜିବା ଆରମ୍ଭ କଲେ ଲୋକେ । କେବଳ ସେତିକି ନୁହେଁ ଭାରତର ଲାକ୍ଷାଦ୍ୱୀପ ମାଳଦ୍ୱୀପ ଠାରୁ ଆହୁରି ସୁନ୍ଦର ଓ ଆକର୍ଷଣୀୟ ବୋଲି କହିବା ଆରମ୍ଭ କଲେ ୟୁଜର । ଚାହୁଁ ଚାହୁଁ ଲାକ୍ଷାଦ୍ୱୀପ ପାଲଟିଗଲା ପର୍ଯ୍ୟଟକଙ୍କ ମୁଖ୍ୟ ଆକର୍ଷଣ । ବ୍ୟାପକ ସଂଖ୍ୟାରେ ବିମାନ ଓ ହୋଟେଲ ବୁକିଂ ହେବାରେ ଲାଗିଲା । ମାର୍ଚ୍ଚ-୨୦୨୪ ପର୍ଯ୍ୟନ୍ତ ଲାକ୍ଷାଦ୍ୱୀପକୁ ବିମାନ ଯାତ୍ରା ପାଇଁ ବୁକିଂ ଅନେକ ଦିନ ପୂର୍ବରୁ ହିଁ ଶେଷ ହୋଇ ସାରିଛି । ସେହିପରି ଅକ୍ଟୋବର ୨୦୨୩ରେ ମୋଦୀ ଉତ୍ତରାଖଣ୍ଡର ପିଥୋରଗଡ ସ୍ଥିତ ପାର୍ବତୀକୁଣ୍ଡ ଯାଇ ପୂଜାର୍ଚ୍ଚନା କରିଥିଲେ । ମୋଦୀଙ୍କ ଏହି ଗସ୍ତ କୈଳାଶ ପର୍ବତମାଳାର ଅପରୂପ ସୌନ୍ଦର୍ଯ୍ୟ ଦର୍ଶାଇଥିଲା । ଆଉ ତାଙ୍କର ଏହି ଗସ୍ତ ପରେ ପାର୍ବତୀକୁଣ୍ଡ ଉତରାଖଣ୍ଡର ଏକ ପ୍ରମୁଖ ପର୍ଯ୍ୟଟନସ୍ଥଳୀ ପାଲଟିଗଲା ।
ଏଥିରୁ ପ୍ରମାଣିତ ହୋଇଛି ଯେ, ଯୁଆଡେ ବି ମୋଦୀ ଯାଉଛନ୍ତି ସେ ସ୍ଥାନର ବି ଲୋକପ୍ରିୟତା ବଢି ଯାଉଛି । ଦେଶର ପର୍ଯ୍ୟଟନ କ୍ଷେତ୍ର ବିକାଶ କରିବା ପାଇଁ ଏହା ପ୍ରଧାନମନ୍ତ୍ରୀଙ୍କ ବଡ ଭୂମିକା କହିବା ଅତ୍ୟୁକ୍ତି ହେବ ନାହିଁ ।