ଆଜିଠୁ ଭାରତ ଓ ୱେଷ୍ଟଇଣ୍ଡିଜ ପ୍ରଥମ ଟେଷ୍ଟ : ନୂଆ ସିଜିନରେ ନବାଗତଙ୍କୁ ମିଳିପାରେ ସୁଯୋଗ
କନକ ବ୍ୟୁରୋ : ଅଷ୍ଟ୍ରେଲିଆ ବିପକ୍ଷ ବିଶ୍ୱ ଟେଷ୍ଟ ଚାମ୍ପିୟନସିପ୍ ଫାଇନାଲର ମାସକ ପରେ ପୁଣି ଥରେ ମଇଦାନକୁ ଓହ୍ଲାଇଛି ଟିମ୍ ଇଣ୍ଡିଆ । ଏଥର ଭାରତ ସାମ୍ନାରେ ଅଛି ଅପେକ୍ଷାକୃତ ଦୁର୍ବଳ ୱେଷ୍ଟଇଣ୍ଡିଜ୍ । ପ୍ରାୟ ଦେଢ଼ ମାସର କ୍ୟାରିବିଆନ ଗସ୍ତରେ ଭାରତ ତା’ର ପ୍ରଥମ ଟେଷ୍ଟ ଆଜି ୱେଷ୍ଟଇଣ୍ଡିଜ୍ ବିପକ୍ଷରେ ଖେଳିବ । ମ୍ୟାଚଟି ଡୋମିନିକାର ୱିଣ୍ଡସର ପାର୍କରେ ଖେଳାଯିବ ।
Kanak News is now on WhatsApp
Join and get latest news updates delivered to you via WhatsApp
ନିକଟରେ ବିଶ୍ୱକପ୍ ଟିକେଟରୁ ବଞ୍ଚିତ ହୋଇଥିବା ୱେଷ୍ଟଇଣ୍ଡିଜ୍ ବିପକ୍ଷ ଏହି ସିରିଜ୍ ଭାରତ ପାଇଁ ସେଭଳି ଚ୍ୟାଲେଞ୍ଜିଂ ହେବ ନାହିଁ । ତଥାପି ରୋହିତ ଶର୍ମାଙ୍କୁ ଇଣ୍ଡିଜ୍ ପେସ୍ ଆଟାକ୍ ଠାରୁ ସତର୍କ ରହିବାକୁ ପଡ଼ିବ । ଚଳିତ ବର୍ଷ ଶେଷଭାଗରେ ଦକ୍ଷିଣ ଆଫ୍ରିକା ଗସ୍ତ ପୂର୍ବରୁ ଭାରତୀୟ ବ୍ୟାଟରଙ୍କ ପାଇଁ ଅଭିଜ୍ଞ କେମାର ରୋଚ୍, ଶାନନ୍ ଗାବ୍ରିଏଲ, ଅଲଜାରୀ ଜୋସେଫ ଓ ଜେସନ୍ ହୋଲଡରଙ୍କ ଭଳି ପେସରଙ୍କୁ ସାମ୍ନା କରିବାକୁ ପଡ଼ିବ । ଭାରତର ନୂଆ ବିଶ୍ୱ ଟେଷ୍ଟ ଚାମ୍ପିୟନସିପ୍ ପର୍ଯ୍ୟାୟ ଗତ ଦୁଇଟି ପର୍ଯ୍ୟାୟ ତୁଳନାରେ କଷ୍ଟସାଧ୍ୟ ହେବ ।
ଗତ ଦୁଇଟି ସିଜନରେ ଭାରତୀୟ ଟିମ୍ ଦମଦାର ପେସ୍ ଆଟାକ୍ ଓ ମଜଭୁତ ବ୍ୟାଟିଂ ଦମରେ ଫାଇନାଲ ଟିକେଟ୍ କାଟିଥିଲା । ବର୍ତ୍ତମାନ ଯଶପ୍ରୀତ ବୁମରା ଆହତ ଥିବା ବେଳେ ମହମ୍ମଦ ଶାମିଙ୍କୁ ବିଶ୍ରାମ ଦିଆଯାଇଛି । ବ୍ୟାଟିଂରେ ସାମାନ୍ୟ ପରିବର୍ତ୍ତନ ଦେଖିବାକୁ ମିଳିପାରେ । ଯୁବ ଓପନର ଯଶସ୍ୱୀ ଜୈସୱାଲଙ୍କୁ ଅଧିନାୟକ ରୋହିତ ଶର୍ମାଙ୍କ ସହ ପଦାର୍ପଣ କରିବାକୁ ସୁଯୋଗ ମିଳିପାରେ । ସେହିପରି ଚେତେଶ୍ୱର ପୂଜାରାଙ୍କ ସ୍ଥାନ ନେଇପାରନ୍ତି ଶୁଭମନ ଗିଲ । ମଧ୍ୟକ୍ରମରେ ସେଭଳି ବିଶେଷ ପରିବର୍ତନ ହେବାର ସମ୍ଭାବନା ନାହିଁ । ବିରାଟ କୋହଲି ଚତୁର୍ଥ, ଉପଅଧିନାୟକ ଆଜିଙ୍କ୍ୟ ରାହାଣେ ୫ମ ସ୍ଥାନରେ ଆସିବେ । ସେପଟେ ୱେଷ୍ଟଇଣ୍ଡିଜ୍ ପାଇଁ ଏହି ସିରିଜ୍ ଆହ୍ୱାନ ସଦୃଶ ହେବ ।