କିଏ ହେବେ ଟିମ୍ ଇଣ୍ଡିଆର ପରବର୍ତୀ ମୁଖ୍ୟ ପ୍ରଶିକ୍ଷକ? । ଷ୍ଟିଫେନ୍ ଫ୍ଲେମିଂ, ଜଷ୍ଟିନ ଲାଙ୍ଗରଙ୍କୁ ନେଇ ଚର୍ଚ୍ଚା, ଦୌଡ଼ରେ ଭିଭିଏସ ଲକ୍ଷ୍ମଣ ଓ ଗୌତମ ଗମ୍ଭୀର
କନକ ବ୍ୟୁରୋ : ଟି-୨୦ ବିଶ୍ୱକପ ପରେ ଶେଷ ହେବାକୁ ଯାଉଛି । ଟିମ୍ ଇଣ୍ଡିଆର କୋଚ୍ ରାହୁଲ ଦ୍ରାବିଡଙ୍କ କାର୍ଯ୍ୟକାଳ । ପରବର୍ତୀ ମୁଖ୍ୟ ପ୍ରଶିକ୍ଷକ ନିଯୁକ୍ତି ନେଇ ବିସିସିଆଇ ପକ୍ଷରୁ ବିଜ୍ଞପ୍ତି ପ୍ରକ୍ରିୟା ଆରମ୍ଭ ହୋଇଛି । ରାହୁଲ ଦ୍ରାବିଡ ଚାହିଁଲେ ପୁଣିଥରେ ଆବେଦନ କରିପାରିବେ ବୋଲି ବିସିସିଆଇ ସମ୍ପାଦକ ଜୟ ଶାହ ସୂଚନା ଦେଇଥିବା ବେଳେ ରାହୁଲ ମନା କରିଥିବା ଜଣାପଡିଛି । ସେପଟେ ପୂର୍ବତନ ନ୍ୟୁଜିଲାଣ୍ଡ କ୍ରିକେଟର ତଥା ଆଇପିଏଲ ଟିମ୍ ଚେନ୍ନାଇ ସୁପର କିଙ୍ଗସର ମୁଖ୍ୟ ପ୍ରଶିକ୍ଷକ ଷ୍ଟିଫେନ ଫ୍ଲେମିଂ ଏବଂ ଅଷ୍ଟ୍ରେଲିଆ କୋଚ୍ ଜଷ୍ଟିନ ଲାଙ୍ଗରଙ୍କ ନାଁକୁ ନେଇ ଚର୍ଚ୍ଚା ବଢିଛି । ଏପରି ହେଲେ ଦୀର୍ଘ ୯ବର୍ଷ ପରେ ଭାରତୀୟ ଟିମକୁ ବିଦେଶୀ କୋଚ୍ ମିଳିପାରନ୍ତି । ଅନ୍ୟପଟେ ନ୍ୟାସନାଲ କ୍ରିକେଟ୍ ଏକାଡେମୀର ମୁଖ୍ୟ ଭିଭିଏସ ଲକ୍ଷ୍ମଣ ଓ ପୂର୍ବତନ ଖେଳାଳି ଗୌତମ ଗମ୍ଭୀର ମଧ୍ୟ ଏହି ରେସରେ ଆଗରେ ରହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଷ୍ଟିଫେନ୍ ଫ୍ଲେମିଂ
ଷ୍ଟିଫେନ୍ ଫ୍ଲେମିଂ ୨୦୦୯ରୁ ଆଇପିଏଲ ଟିମ୍ ସିଏସକେର ମଙ୍ଗ ଧରିବା ସହ ଦଳକୁ ୫ଥର ଚମ୍ପିୟାନ କରାଇବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି । ସେ ସିଏସକେର ଦୁଇ ବିଦେଶୀ ଫ୍ରାଚାଇଜି ଜୋବର୍ଗ ସୁପର କିଙ୍ଗ୍ସ ଓ ଟେକ୍ସାସ ସୁପର କିଙ୍ଗ୍ସର ପ୍ରଶିକ୍ଷକ ଦାୟିତ୍ୱ ମଧ୍ୟ ତୁଳାଉଛନ୍ତି । ଶାନ୍ତ ସ୍ୱଭାବ ସାଙ୍ଗକୁ ପ୍ରତିକୂଳ ପରିସ୍ଥିତିରେ ସଫଳ ରଣନୀତି ପ୍ରସ୍ତୁତ କରିବାରେ ବେଶ ମାହିର ନ୍ୟୁଜିଲାଣ୍ଡର ଏହି ପୂର୍ବତନ ଖେଳାଳି ।
ଜଷ୍ଟିନ୍ ଲାଙ୍ଗର
ଏହି ପୂର୍ବତନ ଅଷ୍ଟ୍ରେଲୀୟ ଖେଳାଳିଙ୍କ ପାଖରେ ୧୦୫ଟି ଟେଷ୍ଟ ଓ ୮ଟି ଏକ ଦିବସୀୟ ମ୍ୟାଚ ଖେଳିବାର ଅଭିଜ୍ଞତା ରହିଛି । ଜଷ୍ଟିନ ଲାଙ୍ଗର ୨୦୧୮ରୁ ୨୦୨୨ ପର୍ଯ୍ୟନ୍ତ ଅଷ୍ଟ୍ରେଲିଆ କ୍ରିକେଟ ଟିମର ମୁଖ୍ୟ ପ୍ରଶିକ୍ଷକ ଦାୟିତ୍ୱରେ ରହିଥଲେ । ତାଙ୍କ ତତ୍ତ୍ୱାବଧାନରେ ଦଳ ୨୦୨୧ରେ ଟି-୨୦ ବିଶ୍ୱକପ୍ ହାତେଇବାରେ ସକ୍ଷମ ହୋଇଥିଲା ।
ଭିଭିଏସ ଲକ୍ଷ୍ମଣ
ନ୍ୟାସନାଲ କ୍ରିକେଟ ଏକାଡେମୀର ମୁଖ୍ୟ ତଥା ପୂର୍ବତନ ଭାରତୀୟ ଖେଳାଳି ଭିଭିଏସ ଲକ୍ଷ୍ମଣ ମଧ୍ୟ ଟିମ୍ ଇଣ୍ଡିଆର ମୁଖ୍ୟ ପ୍ରଶିକ୍ଷକ ପଦ ପାଇଁ ପ୍ରମୁଖ ଦାବିଦାର ରହିଛନ୍ତି । ପୂର୍ବରୁ ଲକ୍ଷ୍ମଣ ଭାରତୀୟ ‘ଏ’ ଟିମ୍ ଏବଂ ୧୯ ବର୍ଷରୁ କମ୍ ଭାରତୀୟ ଦଳର ଦାୟିତ୍ୱ ନେବା ସହିତ ଦ୍ରାବିଡଙ୍କ ଅନୁପସ୍ଥିତିରେ ସିନିୟର ଟିମର କୋଚ ଭାବେ ମଧ୍ୟ କାର୍ଯ୍ୟଭାର ସମ୍ଭାଳିଛନ୍ତି । ଏହା ବ୍ୟତୀତ ଦଳୀୟ ଖେଳାଳିଙ୍କ ସହ ମଧ୍ୟ ତାଙ୍କର ଉତ୍ତମ ସମ୍ପର୍କ ରହିଛି ।
ଗୌତମ ଗମ୍ଭୀର
ଦୀର୍ଘ ବର୍ଷ ଧରି ଭାରତୀୟ ଦଳକୁ ପ୍ରତିନିଧିତ୍ୱ କରିଥିବା ଏହି ପୂର୍ବତନ ଖେଳାଳି ୨୦୧୧ ଓ ୨୦୧୫ ବିଶ୍ୱକପ୍ ଦଳର ମଧ୍ୟ ସଦସ୍ୟ ରହି ସାରିଛନ୍ତି । ଏହା ବ୍ୟତୀତ ଗମ୍ଭୀର ଆଇପିଏଲ ଟିମ୍ କୋଲକାତାକୁ ମଧ୍ୟ ଦୁଇଥର ଚମ୍ପିୟାନ କରାଇବା ସହିତ ଚଳିତ ବର୍ଷ ଦଳର ମେଂଟର ଭାବେ କାର୍ଯ୍ୟ ତୁଲାଉଛନ୍ତି ।
ଟିମ୍ ଇଣ୍ଡିଆର ପରବର୍ତୀ ମୁଖ୍ୟ ପ୍ରଶିକ୍ଷକ ପଦ ପାଇଁ ଏହି ୪ ମହାରଥୀଙ୍କ ବ୍ୟତୀତ ଅନ୍ୟ କିଛି ନାଁକୁ ନେଇ ମଧ୍ୟ ଚର୍ଚ୍ଚା ହେଉଛି । ମେ ୨୭ ତାରିଖ ଆବେଦନର ଶେଷ ତାରିଖ ରହିଥିବା ବେଳେ ଆଗକୁ କିଏ ଟିମ୍ ଇଣ୍ଡିଆର ମଙ୍ଗ ଧରୁଛି ଦେଖିବାକୁ ବାକି ।