କନକ ବ୍ୟୁରୋ : ବିସିସିଆଇ ଅଧ୍ୟକ୍ଷ ପଦକୁ ନେଇ ଆରମ୍ଭ ହୋଇଛି ରାଜନୀତି । ସୌରଭ ଗାଙ୍ଗୁଲିଙ୍କ ସ୍ଥାନରେ ପୂର୍ବତନ କ୍ରିକେଟର ରୋଜର ବିନ୍ନି ବିସିସିଆଇର ନୂଆ ହେବା ସମ୍ଭାବନାକୁ ନେଇ ଟିଏମସି, ଭାରତୀୟ ଜନତା ପାର୍ଟିକୁ ଟାର୍ଗେଟ୍ କରିଛି । ଟିଏମସିର ମୁଖପାତ୍ର କୃଣାଲ ଘୋଷ କହିବା ଅନୁସାରେ, ଗତବର୍ଷ ପଶ୍ଚିମବଙ୍ଗ ବିଧାନସଭା ନିର୍ବାଚନ ପୂର୍ବରୁ ଗାଙ୍ଗୁଲି ବିଜେପିରେ ସାମିଲ୍ ହେବା ନେଇ ବିରୋଧୀ ଦଳ ବାର୍ତା ଦେଇଥିଲେ । କିନ୍ତୁ ଗାଙ୍ଗୁଲି ବିଜେପିରେ ସାମିଲ ହୋଇନଥିଲେ । ସେଥିପାଇଁ ବିଜେପି ପ୍ରତିଶୋଧ ପରାୟଣ ହୋଇ ଗାଙ୍ଗୁଲିଙ୍କୁ ବିସିସିଆଇ ଅଧ୍ୟକ୍ଷ ପଦରୁ କାଢ଼ି ହୀନ ଚକ୍ରାନ୍ତ କରୁଥିବା କୃଣାଲ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେହିପରି ଟିଏମସି ସାଂସଦ ଶାନ୍ତନୁ ସେନ୍ ପ୍ରଶ୍ନ କରିଛନ୍ତି ଯେ, ଯଦି ଜୟ ଶାହ ଦ୍ୱିତୀୟଥର ପାଇଁ ସମ୍ପାଦକ ପଦରେ ରହିପାରୁଛନ୍ତି, ତାହେଲେ ଗାଙ୍ଗୁଲିଙ୍କୁ କାହିଁକି ଅଧ୍ୟକ୍ଷ ପଦରେ ପୁନଃନିଯୁକ୍ତି ମିଳିବ ନାହିଁ । ସେପଟେ ଟିଏମସିର ଅଭିଯୋଗକୁ ଖଣ୍ଡନ କରିଛି ବିଜେପି । ବିଜେପିର ରାଷ୍ଟ୍ରୀୟ ଉପାଧ୍ୟକ୍ଷ ଦିଲ୍ଲୀପ ଘୋଷ କହିଛନ୍ତି, ବିଜେପି କେବେ ଗାଙ୍ଗୁଲିଙ୍କୁ ପାର୍ଟିରେ ସାମିଲ୍ କରିବାକୁ ପ୍ରୟାସ କରିଛି, ତାହା ଆମେ ଜାଣିନାହୁଁ । ଗାଙ୍ଗୁଲି ଜଣେ କିମ୍ବଦନ୍ତୀ କ୍ରିକେଟର । ବିସିସିଆଇରେ ପରିବର୍ତନକୁ ନେଇ କିଛି ଲୋକେ ତୁଚ୍ଛା ରାଜନୀତି କରୁଥିବା କହିଛନ୍ତି ଦିଲ୍ଲୀପ ।