‘କୌରବ’ ଉପାଖ୍ୟାନକୁ ନେଇ ତେଜିଲା ରାଜନୀତି। ଧର୍ମେନ୍ଦ୍ରଙ୍କ ବୟାନକୁ ଦୋହରାଇଲେ ଜୟନାରାୟଣ
କନକ ବ୍ୟୁରୋ: ମଞ୍ଚ ଥିଲା ଦିଲ୍ଲୀର ପ୍ରେସ ବ୍ଲକ୍, ଅବସର ଥିଲା ପୁସ୍ତକ ଉନ୍ମଚୋନ । ଗୋଟିଏ ମଞ୍ଚରେ ଉପସ୍ଥିତ ଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ବିଜେଡି ସାଂସଦ ଭର୍ତୃହରି ମହତାବ । ସଭାମଞ୍ଚରେ ଭାଷଣ ଦେଉ ଦେଉ- ମହାଭାରତର ‘କୌରବ’ ଉପାଖ୍ୟାନର ପେଡ଼ି ଖୋଲିଥିଲେ କେନ୍ଦ୍ରମନ୍ତ୍ରୀ । କଟକ ସାଂସଦ ଭର୍ତୃହରି ମହତାବଙ୍କୁ ପ୍ରଶଂସା କରିବାକୁ ଯାଇ କହିଥିଲେ- ୬ ଥରର ସାଂସଦଙ୍କୁ କେହିଜଣେ କହିଛନ୍ତି ଯେ, ସେ କାଉନସିଲର ଭାବେ ମଧ୍ୟ ଜିତିପାରିବେନି । ଏକଥା ରାଜନୀତିରେ ମଝିରେ ମଝିରେ ହୁଏ । କିନ୍ତୁ ଭର୍ତ୍ତୃହରିଙ୍କ ପ୍ରତି ପ୍ରଧାନମନ୍ତ୍ରୀଙ୍କ ଆଦର ରହିଛି । ସେ, ହେଉଛନ୍ତି ଭୀଷ୍ମ ପିତାମହ । ଇଚ୍ଛାମୃତ୍ୟୁ ହେଲେ ସେ ଘରକୁ ଯିବେ । ସେ ଆହୁରି କହିଥିଲେ, ଓଡିଶାର କୌରବ ସେନା ଯେତେ ଚିକ୍ରାର କଲେ ବି ସେ ତାକୁ ମୁଣ୍ଡପାତି ସହିବାକୁ ପ୍ରସ୍ତୁତ । କୌରବ ସେନା ଯାଜ୍ଞସେନୀ ପଢିନାହାନ୍ତି ତେଣୁ ମହିଳା ସମ୍ବେଦନଶୀଳତାକୁ ବୁଝିପାରନ୍ତି ନାହିଁ ବୋଲି ତାତ୍ସଲ୍ୟ କରିଛନ୍ତି । ତେବେ ଧର୍ମେନ୍ଦ୍ରଙ୍କ ବକ୍ତବ୍ୟ ଉପରେ ଭର୍ତୃହରି ସିଧାସଳଖ କିଛି କହିନଥିଲେ । କେବଳ କହିଥିଲେ, ସେଦିନ ଗାନ୍ଧୀଜୀ ଓଡିଶାର ଭୟ ଦୂର କରିବାକୁ ଆହ୍ୱାନ ଦେଇଥିଲେ । କେନ୍ଦ୍ର ଶିକ୍ଷାମନ୍ତ୍ରୀ ମଧ୍ୟ ତାଙ୍କ ଭୟ ବିଷୟରେ ବକ୍ତବ୍ୟରେ ଉଲ୍ଲେଖ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କାହାକୁ ‘କୌରବ’ ସେନା କହିଲେ ଧର୍ମେନ୍ଦ୍ର? କାହାକୁ ‘ଯାଜ୍ଞସେନୀ’ ପଢ଼ି ନାହାଁନ୍ତି କହିଲେ କେନ୍ଦ୍ରମନ୍ତ୍ରୀ? ଯଦିଓ ଏହି ଦୁଇଟି ପ୍ରଶ୍ନର ସିଧାସଳଖ ନିଦ୍ଦିଷ୍ଟ ଉତ୍ତର ରଖିନାହାଁନ୍ତି ଧର୍ମେନ୍ଦ୍ର ପ୍ରଧାନ, ତଥାପି ଏହାକୁ ନେଇ ସରଗରମ ହୋଇଛି ରାଜ୍ୟ ରାଜନୀତି । ଧର୍ମେନ୍ଦ୍ରଙ୍କ କଥାରେ ସ୍ୱର ମିଳାଇ ବିରୋଧୀ ଦଳ ନେତା ଅଭିଯୋଗ କରି କହିଛନ୍ତି- ଯେଉଁମାନେ କ୍ଷମତାରେ ଅଛନ୍ତି ସେମାନେ ହିଁ କୌରବ । କୌରବମାନେ ଯେମିତି ଅଧିକ ଗର୍ବ ଏବଂ ଅହଙ୍କାରରେ ବୁଡ଼ିଗଲେ ସେମିତି ଏମାନଙ୍କର ଅବସ୍ଥା ହେବ । କଂଗ୍ରେସ ବିଧାୟକ ମହମ୍ମଦ ମୋକିମ ମଧ୍ୟ ଏହି ପ୍ରସଙ୍ଗରେ ପ୍ରତିକ୍ରିୟା ରଖି କହିଛନ୍ତି ଭର୍ତ୍ତୃହରି ମହତାବ ଜଣେ ଦକ୍ଷ ଓ ଜ୍ଞାନୀ ଲୋକ । କିଛି ଅସହିଷ୍ଣୁ ତାଙ୍କୁ ସହ୍ୟ କରିପାରୁ ନାହାଁନ୍ତି ବୋଲି କହିଛନ୍ତି । ଶାସକ ବିଜେଡି ଦଳ ଏହି ବୟାନକୁ ନେଇ କଡ଼ା ପ୍ରତିକ୍ରିୟା ରଖିଛି । ବିଧାୟକ ଭାଗିରଥୀ ସେଠୀ କେନ୍ଦ୍ରମନ୍ତ୍ରୀଙ୍କୁ ପରାମର୍ଶ ଦେଇକହିଛନ୍ତି-ସେ ନିଜ ଦଳ ବିଷୟରେ ମୁଣ୍ଡ ଖେଳାନ୍ତୁ ।
ରାଜନୀତିର ଏହି ବୟାନବାଜି ଭିତରେ, କଟକର ବିଜେଡି ସାଂସଦଙ୍କ ସପକ୍ଷରେ ବିଜେପି ସାଂସଦ ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଛିଡ଼ା ହେବା, ଅନେକ ଗୁଡିଏ କଳ୍ପନା-ଜଳ୍ପନା ପାଇଁ ଖୋରାକ୍ ଯୋଗାଇଛି ।