ହାଇକୋର୍ଟ ବେଞ୍ଚ ସ୍ଥାପନ ପ୍ରସଙ୍ଗକୁ ନେଇ ତେଜିଲା ରାଜନୀତି: ରାଜ୍ୟ ସରକାରଙ୍କୁ ଦାୟୀ କଲେ ପଶ୍ଚିମ ଓଡ଼ିଶାର ବିଜେପି ସାଂସଦ
କନକ ବ୍ୟୁରୋ: ଓଡ଼ିଶା ହାଇକୋର୍ଟ ବେଂଚ୍ ସ୍ଥାପନ ଉପରେ ସୁପ୍ରିମକୋର୍ଟଙ୍କ ନାଲିଗାର ପଡ଼ିବା ପରେ, ସମସ୍ତଙ୍କର ନଜର ଥିଲା, ଏହି ଦାବି କେଉଁ ରୁପରେ ସାମ୍ନାକୁ ଆସିବ । ଆଇନଜୀବୀ-ହାଇକୋର୍ଟ- ସୁପ୍ରିମକୋର୍ଟ, ଏହି ୩ଟି ବିନ୍ଦୁରେ ପ୍ରାୟ ୫୦ ବର୍ଷ ଧରି ଘୁରି ବୁଲୁଥିବା ଏହି ଆନ୍ଦୋଳନରେ ଏବେ, ପୁଣି ଥରେ ଧସେଇ ପଶିଛି ରାଜନୀତି । ସୁରେଶ ପୂଜାରୀଙ୍କ ନେତୃତ୍ୱରେ ବିଜେପି ସାଂସଦମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖିଛନ୍ତି । ଏଥିରେ କୁହାଯାଇଛି-
Kanak News is now on WhatsApp
Join and get latest news updates delivered to you via WhatsApp
ହାଇକୋର୍ଟ ବେଂଚ ସ୍ଥାପନ ନେଇ କେନ୍ଦ୍ର ଆଇନମନ୍ତ୍ରୀ ସମସ୍ତ ସହଯୋଗ କରିବାକୁ ରାଜି ଥିଲେ ମଧ୍ୟ ରାଜ୍ୟ ସରକାରଙ୍କ ଅନାଗ୍ରହ ଯୋଗୁଁ ସମସ୍ୟାର ସମାଧାନ ହୋଇପାରୁନାହିଁ । ହାଇକୋର୍ଟର ମୁଖ୍ୟ ବିଚାରପତି ଏବଂ ରାଜ୍ୟପାଳଙ୍କ ସହ ପରାମର୍ଶ କରି ପୂର୍ଣ୍ଣାଙ୍ଗ ରିପୋର୍ଟ ଦେବାକୁ ଆଇନ ମନ୍ତ୍ରଣାଳୟ ପକ୍ଷରୁ କୁହାଯାଇଥିଲା । କେଉଁ ସ୍ଥାନରେ ବେଂଚ ଗଠନ ହେବ, ଭିତ୍ତିଭୂମି ଏବଂ ଅନ୍ୟାନ୍ୟ ଖର୍ଚ୍ଚ ବାବଦରେ ରିପୋର୍ଟ ଦେବାକୁ କୁହାଯାଇଥିଲା । ହେଲେ ରାଜ୍ୟ ସରକାରଙ୍କ ଅବହେଳା ଯୋଗୁଁ ସମ୍ବଲପୁରରେ ଅପ୍ରୀତିକର ପରିସ୍ଥିତି ଦେଖିବାକୁ ମିଳିଛି, ବୋଲି ବିଜେପି ସାଂସଦମାନେ ଅଭିଯୋଗ କରିଛନ୍ତି ।
ସେହିପରି ଗିରଫ ଆଇନଜୀବୀଙ୍କୁ ଛାଡ଼ିବା ଦିଗରେ ପଦକ୍ଷେପ ନେବା ସହ ଲାଇସେନ୍ସ ଫେରାଇ ଦେବା ପାଇଁ ବାର କାଉନସିଲ ଅଫ୍ ଇଣ୍ଡିଆ ସହ କଥା ହେବାକୁ ଦାବି କରିଛନ୍ତି ବିଜେପି ସାଂସଦ । ଏପଟେ କଂଗ୍ରେସ ବିଧାୟକ ନରସିଂହ ମିଶ୍ର କହିଛନ୍ତି- ହାଇକୋର୍ଟ ହେବ ନା ନାହିଁ ରାଜ୍ୟ ସରକାର ନିଷ୍ପତି ନେବେ ଏବଂ କେନ୍ଦ୍ରକୁ ସୁପାରିଶ କରିବେ । ବିଜେପି ସାଂସଦଙ୍କ ଚିଠି ପ୍ରସଙ୍ଗରେ କହିଛନ୍ତି-ମୁଖ୍ୟମନ୍ତ୍ରୀଙ୍କୁ ଚିଠି ଲେଖିବା ବଦଳରେ କେନ୍ଦ୍ରକୁ ଚିଠି ଲେଖିବା କଥା । ଏସବୁ ଭିତରେ ବିଜେପି ଓ ବିଜେଡି ଆଣୁଥିବା ଅଭିଯୋଗ ଉପରେ ପ୍ରତିକ୍ରିୟା ରଖିଛି ବିଜେଡି ।
ରାଜନୀତିର ଏହି ବୟାନବାଜି ଭିତରେ କିନ୍ତୁ ହାଇକୋର୍ଟ ବେଂଚ ସ୍ଥାପନ ନେଇ ଥିବା ଅବଶିଷ୍ଟ ବିକଳ୍ପ ନେଇ ମନ୍ଥନ ଆରମ୍ଭ କରି ଦେଇଛି କେନ୍ଦ୍ରୀୟ କ୍ରିୟାନୁଷ୍ଠାନ କମିଟି । କମିଟିର ଆବାହକ କହିଛନ୍ତି- ସମ୍ବିଧାନିକ ବେଂଚରେ ମାମଲାର ପୁନଃବିଚାର ପାଇଁ ଆବେଦନ କରାଯିବ ।
ଆଇନଜୀବୀ ସଙ୍ଗଠନ ଗୁଡ଼ିକ ବିକଳ୍ପ ବାଟ ଖୋଜୁଥିବା ବେଳେ ବିଜେପି-ବିଜେପିର ଆରୋପ-ପ୍ରତ୍ୟାରୋପ ତୀବ୍ର ହୋଇଛି । ଏସବୁ ଦେଖିଲା ବେଳେ ଲାଗୁଛି, ହାଇକୋର୍ଟ ବେଂଚ ଦାବିର ଲଢ଼େଇ ହୁଏତ, ଆହୁରି ଲମ୍ବା ଚାଲିବ ।