ସୁମିତ୍-ତପସ୍ୱିନୀ ବିବାଦ – ଗେଟ ଭାଙ୍ଗି ଭିଡ ଘରକୁ ପଶିବା ପରେ: ଏଫଆଇଆର ଦେଇ ସୁରକ୍ଷା ମାଗିଲେ ସୁମିତଙ୍କ ବାପା
କନକ ବ୍ୟୁରୋ: ବ୍ରହ୍ମପୁର ଡ଼ାକ୍ତର ସୁମିତ-ତପସ୍ୱିନୀ ପାରିବାରିକ ବିବାଦ ମାମଲାରେ ନୂଆ ମୋଡ । ସୋମବାର ରାତିରେ ଲୋକେ ସୁମିତଙ୍କ ଘରର ଗେଟ ଭାଙ୍ଗି ବଳପୂର୍ବକ ଭିତରକୁ ପଶିବା ପରେ ଆଜି ଥାନାରେ ଅଭିଯୋଗ କରିଛନ୍ତି ସୁମିତଙ୍କ ବାପା ପ୍ରମୋଦ ସାହୁ । ସେ ଏତଲାରେ ଦର୍ଶାଇଛନ୍ତି ଯେ, ତପସ୍ୱିନୀ ଓ ପ୍ରମିଳା ତ୍ରିପାଠୀ ବଳପୂର୍ବକ ଘର ଭିତରେ ପଶିଛନ୍ତି ଏବଂ ସେମାନେ ପୁଣି ଆକ୍ରମଣ କରିବାର ଆଶଙ୍କା ରହିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ବ୍ରହ୍ମପୁରରେ ଶ୍ୱଶୁର ଘର ଆଗରେ ଧାରଣା ଦେଇଥିବା ତପସ୍ୱିନୀଙ୍କୁ କିଏ ଦେବ ନ୍ୟାୟ? ସୋମବାର ରାତିରେ ଶ୍ୱଶୁର ଘରର ଗେଟ୍ ଭାଙ୍ଗି ଲୋକେ ଘରକୁ ଜବରଦସ୍ତ ପଶିବା ପରେ ଏଭଳି ପ୍ରଶ୍ନ ସାମ୍ନାକୁ ଆସିଛି । ଏପଟେ ସୁମିତଙ୍କ ବାପା ଗତକାଲିର ଘଟଣା ନେଇ ବୈଦ୍ୟନାଥପୁର ଥାନାରେ ଅନଲାଇନରେ ଅଭିଯୋଗ କରିଛନ୍ତି ।
ଏତଲାରେ ସେ ଦର୍ଶାଇଛନ୍ତି
- ତପସ୍ୱିନୀ ଓ ପ୍ରମିଳା ତ୍ରିପାଠୀ ବଳପୂର୍ବକ ଘର ଭିତରେ ପଶିଛନ୍ତି
- ସେମାନେ ପୁଣି ଆକ୍ରମଣ କରିବା ଆଶଙ୍କା ରହିଛି
- ଘର ଲୋକଙ୍କ ଜୀବନକୁ ବିପଦକୁ ଠେଲିଦେଇଛନ୍ତି
- ଜୀବନ ବିପଦରେ ଥିବାରୁ ସୁରକ୍ଷା ଦିଆଯାଉ
- ପୂରା ପରିବାର ଗୃହବନ୍ଦୀ ହୋଇ ରହିଥିବାରୁ ସହାୟତା ଯୋଗାଇ ଦିଆଯାଉ
ସେପଟେ ସୁମିତଙ୍କ ଜେଜେ ମା’ ବି ଏକ ଭିଡିଓ କରି ସେମାନଙ୍କୁ ଉଦ୍ଧାର କରିବାକୁ ଅପିଲ କରିଛନ୍ତି । ତେବେ ଗତକାଲିର ଘଟଣା ପରେ ଧାରଣାସ୍ଥଳ ଆଗରେ ୧୪୪ ଧାରା ଜାରି ହୋଇଛି । ପୁଲିସ ବି ମୁତୟନ ହୋଇଛନ୍ତି । ସେଠାରେ ଭିଡ ବଢୁଥିବାରୁ ପୁଲିସ ଏଭଳି ପଦକ୍ଷେପ ନେଇଛି । ବିବାଦ ବଢିବା ପରେ ପୁଣି ଥରେ ସାମ୍ନାକୁ ଆସିଛନ୍ତି ସୁମିତ । ସେ ପ୍ରଶ୍ନ କରିଛନ୍ତି…
- ମାମଲା କୋର୍ଟରେ ଥିବା ସତ୍ତ୍ୱେ ତପସ୍ୱିନୀ କାହିଁକି ଏମିତି ହେଉଛନ୍ତି?
- ପ୍ରମିଳା ତ୍ରିପାଠୀ କାହିଁକି ସମ୍ପୃକ୍ତ ହେଉଛନ୍ତି ଏବଂ ସେ ତାଙ୍କ ଘର ବିଷୟରେ କଣ ଜାଣିଛନ୍ତି ?
- ତପସ୍ୱିନୀଙ୍କ ଯଦି କିଛି ଅଧିକାର ରହିଛି ତେବେ ସେ କାହିଁକି କୋର୍ଟରେ କହୁନାହାନ୍ତି?
- କୋର୍ଟ ତାଙ୍କ ସପକ୍ଷରେ କୌଣସି ଟିପ୍ପଣୀ କରୁନଥିବାରୁ ତପସ୍ୱିନୀ ରାସ୍ତାରେ ଡ୍ରାମା କରୁଥିବା ସୁମିତ କହିଛନ୍ତି । ସେପଟେ ତପସ୍ୱିନୀ କହିଛନ୍ତି, ନ୍ୟାୟ ମିଳିବ ବୋଲି ସେ ଆଶାବାଦୀ ଅଛନ୍ତି ।
ତପସ୍ୱିନୀ, ସୁମିତଙ୍କ ଘର ସାମ୍ନାରେ ଧାରଣାରେ ବସି ରହିଥିବା ବେଳେ ସ୍ଥାନୀୟ ଲୋକଙ୍କ ଭିଡ ଜମିଥିଲା । ସୋମବାର ରାତିରେ ଅଚାନକ ଘର ଭିତରକୁ ଧସେଇ ପଶିଥିଲେ ଉତ୍ୟକ୍ତ ମହିଳା । ଏଠାରେ ବଡ ପ୍ରଶ୍ନ ଉଠୁଛି, ମାମଲା କୋର୍ଟରେ ବିଚାରଧୀନ ଥିବାବେଳେ ନ୍ୟାୟ ଦେବା ପାଇଁ କାହିଁକି ଆଇନକୁ ହାତକୁ ନିଆଯାଉଛି ।