କନକ ବ୍ୟୁରୋ: ଏପ୍ରିଲ ମାସର ଅସହ୍ୟ ତାତି, ମେ ମାସର ମୁଣ୍ଡଫଟା ଖରା । ସବୁଠି ଉତ୍ତପ୍ତ, ଅଣନିଶ୍ୱାସୀର ବାତାବରଣ । ଜୁଆଡେ ଚାହିଁଲେ ଖାଲି ନିଆଁ ଆଉ ନିଆଁ, ଗରମ ହିଁ ଗରମ । ଏହି ଖରାର ମୁକାବିଲା ପାଇଁ ମଣିଷ କେତେ କଣ କରୁଛି । ଘରେ ରହୁଛି, ଏସିରେ ଶୋଉଛି, ଫ୍ୟାନ ଚଲାଉଛି । ଆଉ ଶୋଷ ଲାଗିଲେ ପାଣି, ଲସି, ଥଣ୍ଡା ପାନୀୟ ପିଉଛି । ବାଟରେ ଗଲାବେଳେ ଯଦି ଅତି ଶୋଷ ହେଉଛି ତାହାଲେ ଆମେ ରାସ୍ତା କଡର ଟ୍ୟୁୱେଲରୁ ପାଣି ପିଇ ନିଜ ଶୋଷ ମେଣ୍ଟାଉଛେ । ହେଲେ ଥରେ ଭାବିଲେ ଏଇ ତତଲା ଖରାରେ ପଶୁଟିଏ କଣ କରୁଥିବ। ଡହଡହ ଖରାରେ କେମିତି, ଆଉ କେଉଁଠୁ ପାଣି ପିଉଥିବ ? ନିରୀହ ପଶୁ କେମିତି ନିଜ ଶୋଷ ମେଣ୍ଟାଉଥିବ? ନଈ, ନାଳ ତ ପୋତି ଗଲାଣି, ପୋଖରୀରେ ପାଣି ବି ଶୁଖି ଆସିଲାଣି ଏମିତି ସମୟରେ ଶୋଷ ହେଲେ ପଶୁଟି କଣ କରିବ ? ମଣିଷ ପରି ପାଟି ଖୋଲି କହିପାରୁ ନଥିବା ପଶୁଟି କେମିତି ବଞ୍ଚିବ… ?
Kanak News is now on WhatsApp
Join and get latest news updates delivered to you via WhatsApp
ପଶୁପକ୍ଷୀଙ୍କ ପାଇଁ ଏମିତି କିଛି ପ୍ରଶ୍ନ ନିଜ ମନ ଭିତରେ ଆଣି, ପଶୁଙ୍କ ପ୍ରାଣ ବଞ୍ଚାଇବାକୁ ଆଗେଇ ଯାଇଛି ଏକ ସ୍ୱେଚ୍ଛାସେବୀ ସଙ୍ଗଠନ । ପଶୁଙ୍କୁ ପାଣି ଟୋପେ ପିଆଇବାକୁ ଉଦ୍ୟମ ଆରମ୍ଭ କରିଛନ୍ତି ସଙ୍ଗଠନର ପ୍ରତିଟି କର୍ମକର୍ତ୍ତା । ଉଦେଶ୍ୟ ଗୋଟିଏ ଶୋଷିଲା ରହିବେନି ପଶୁ । ଖରା ସରିବା ଯାଏଁ ପଶୁଙ୍କ ଦାୟିତ୍ୱ ନେବ ନୂଆ ପ୍ରୟାସ । ସେଇଥିପାଇଁ ତ ବିଭିନ୍ନ ସ୍ଥାନରେ ପାଣି କୁଣ୍ଡର ବ୍ୟବସ୍ଥା କରିଛନ୍ତି ସଙ୍ଗଠନର ସଦସ୍ୟ ।
ତେବେ ସୋରୋ ଶିଙ୍ଗାଖୁଣ୍ଟା ପଞ୍ଚାୟତର ନୂଆ ପ୍ରୟାସ ସ୍ୱେଚ୍ଛାସେବୀ ସଙ୍ଗଠନ । ଦୀର୍ଘ ଚାରି ବର୍ଷ ହେବ ସ୍ଥାନୀୟ ଅଞ୍ଚଳରେ ବିଭିନ୍ନ କାର୍ଯ୍ୟକ୍ରମ ହାତକୁ ନେଇ ସମାଜର ହିତ ସାଧନ କରି ଆସିଛି । ରକ୍ତଦାନଠୁ ଆରମ୍ଭ କରି ବୃକ୍ଷରୋପଣ କରି ଆସୁଥିବା ନୂଆ ପ୍ରୟାସ ଏଥର ଗ୍ରୀଷ୍ମରେ ପଶୁଙ୍କ ପାଇଁ ନୂଆ ଉଦ୍ୟମ କରିଛି । ଅଞ୍ଚଳର ବିଭିନ୍ନ ସ୍ଥାନରେ ଜଳକୁଣ୍ଡର ବ୍ୟବସ୍ଥା କରାଯାଇଛି । ଯେଉଁଠି ଯେଉଁଠି ଗଛ ଛାଇ ରହିଛି ଆଉ ଗୋରୁ ଗାଈଙ୍କ ଗହଳି ଲାଗୁଛି ସେଠି ପାନୀୟ ଜଳର ବ୍ୟବସ୍ଥା କରାଯାଇଛି । ବିଭିନ୍ନ ସ୍ଥାନକୁ କୁଣ୍ଡ ନେଇ ସେଠାରେ ରଖାଯାଇ, ସ୍ଥାନୀୟ ଅଞ୍ଚଳର ଲୋକଙ୍କୁ ଦାୟିତ୍ୱ ଦିଆଯାଇଛି । ଯିଏ କି ପ୍ରତିଦିନ ପଶୁଙ୍କ ପାଇଁ ପାଣି ଭରିବେ ଏବଂ କୁଣ୍ଡର ସଫା ଦାୟିତ୍ୱ ନେବେ ।
ଗ୍ରୀଷ୍ମଦିନେ ପଶୁଙ୍କ ପାଇଁ ଏହି ବ୍ୟବସ୍ଥା ଅନେକଙ୍କୁ ପ୍ରେରଣା ଦେଇଥିବା ବେଳେ ପରିବେଶ ଓ ଜୀବ ଜଗତ ପାଇଁ ଏହା ନିଆରା ପରିକଳ୍ପନା । ତେବେ ଏ ଖରାଟାରେ ଯଦି ଆମେ ପଶୁଙ୍କ କଥା ବୁଝିବାନି ତେବେ ସେମାନଙ୍କ କଥା ଆଉ କିଏ ବୁଝିବ । ତେଣୁ ଆସନ୍ତୁ ଗ୍ରୀଷ୍ମ ସରିବା ଯାଏଁ ନିଜ ନିଜ ଅଞ୍ଚଳରେ ପଶୁପକ୍ଷୀଙ୍କ ପାଇଁ ପାଣିର ବ୍ୟବସ୍ଥା କରିବା ।