ନିର୍ବାଚନୀ ମଇଦାନରେ ପ୍ରଚାର ଜୋରଦାର । ସ୍ୱାମୀଙ୍କ ପାଇଁ ଘର ଘର ବୁଲି ପ୍ରଚାର କଲେ ସ୍ତ୍ରୀ, ବିଭିନ୍ନ ପ୍ରସଙ୍ଗ ନେଇ ସ୍ତ୍ରୀ ମାଗିଲେ ଭୋଟ ।
କନକବ୍ୟୁରୋ:ଜମୁଛି ପ୍ରଚାର । ଭୋଟ ହାତେଇବାକୁ ପ୍ରାର୍ଥୀଙ୍କ ପ୍ରୟାସ ଜାରି ରହିଛି । ଚତୁର୍ଥ ପର୍ଯ୍ୟାୟ ନିର୍ବାଚନ ପାଇଁ ଜୋରଦାର ରଣନୀତି ଆରମ୍ଭ ହୋଇଛି । ଭିନ୍ନ ଭିନ୍ନ ପ୍ରସଙ୍ଗ ନେଇ ସମର୍ଥକ ଯୋଗାଡ କରୁଛନ୍ତି ପ୍ରାର୍ଥୀ ମାନେ । ହେଲେ ସେପଟେ ପ୍ରଚାର ସମୟରେ କିଛି ଦୃଶ୍ୟ ସାମନାକୁ ଆସିଛି । ମଇଦାନରେ ସ୍ୱାମୀଙ୍କ ପାଇଁ ପ୍ରଚାର କରୁଛନ୍ତି ସ୍ତ୍ରୀ ମାନେ । ସ୍ୱାମୀଙ୍କ ପାଇଁ ବୁଲି ବୁଲି ଭୋଟ ମାଗୁଛନ୍ତି ସ୍ତ୍ରୀ । ଜଗତସିଂହପୁର ଲୋକସଭା ଓ କାକଟପୁର ବିଧାନସଭା ନିର୍ବାଚନ ମଣ୍ଡଳୀରେ ଜୁନ ୧ରେ ପଡ଼ିବ ଭୋଟ । ଏହା ପୂର୍ବରୁ ଚାଲିଛି ଜୋରଦାର ପ୍ରଚାର । ମୈଦାନରେ ଏବେ ସ୍ୱାମୀଙ୍କ ପାଇଁ ଭୋଟ ଭିକ୍ଷା କରୁଛନ୍ତି ସ୍ତ୍ରୀ ମାନେ । ଘରଘର ବୁଲି ଲୋକଙ୍କୁ ଭେଟିବା ସହ ସମର୍ଥନ ଲୋଡ଼ିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଜଗତସିଂହପୁର ବିଜେପି ସାଂସଦ ପ୍ରାର୍ଥୀ ବିଭୁପ୍ରସାଦ ତରାଇଙ୍କ ପତ୍ନୀ ତନୁଶ୍ରୀ ତରାଇ ନିଜ ସ୍ୱାମୀଙ୍କ ପାଇଁ ପ୍ରଚାର କରୁଛନ୍ତି । ସେହିଭଳି କାକଟପୁର ବିଜେଡି ବିଧାୟକ ପ୍ରାର୍ଥୀ ତୁଷାରକାନ୍ତି ବେହେରାଙ୍କ ପତ୍ନୀ ନନ୍ଦିନୀ ବେହେରା ମଧ୍ୟ ନିଜ ସ୍ୱାମୀଙ୍କ ପାଇଁ ଘରଘର ବୁଲି ପ୍ରଚାରରେ ଲାଗିଛନ୍ତି । କଂଗ୍ରେସ ବିଧାୟକ ପ୍ରାର୍ଥୀ ବିଶ୍ୱଭୂଷଣ ଦାସଙ୍କ ସ୍ତ୍ରୀ ଶ୍ରାବଣୀ ଦାସ କଂଗ୍ରେସ ଗ୍ୟାରେଂଟିକୁ ଆଧାର କରି ନିଜ ସ୍ୱାମୀଙ୍କୁ ବିଜୟୀ କରାଇବା ପାଇଁ ଲୋକଙ୍କ ସମର୍ଥନ ଲୋଡ଼ିଛନ୍ତି ।
ମଇଦାନରେ ତିନି ଦଳର ପ୍ରାର୍ଥୀଙ୍କ ଲଢେଇ ଜାରି ରହିଥିବା ବେଳେ ଭିନ୍ନ ଭିନ୍ନ ପ୍ରସଙ୍ଗ ନେଇ ଭୋଟ୍ ହାତେଇବାର ପ୍ରୟାସ ଜାରି ରହିଛି । ପ୍ରାର୍ଥୀ ମାନଙ୍କ ସମର୍ଥକଙ୍କ ସହ ଏବେ ପ୍ରାର୍ଥୀଙ୍କ ସ୍ତ୍ରୀ ମାନେ ଜୋରଦାର ପ୍ରଚାର କରୁଛନ୍ତି । ନିର୍ବାଚନ ମଣ୍ଡଳି ସାରା ବୁଲି ବୁଲି ନିର୍ବାଚନ ଲଢୁଥିବା ସ୍ୱାମୀଙ୍କ ପାଇଁ ଭୋଟ୍ ମାଗୁଛନ୍ତି ସ୍ତ୍ରୀ ମାନେ । ଯାହାକି ନିର୍ବାଚନ ମଣ୍ଡଳିରେ ଚର୍ଚ୍ଚାର ବିଷୟ ପାଳଟିଛି ।